(ສພຊ) – ກອງປະຊຸມໃຫຍ່ຄັ້ງທີ II ຂອງໜ່ວຍກໍາມະບານຮາກຖານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ (ກສຕສ) ໄດ້ດໍາເນີນໃນຕອນບ່າຍວັນສຸກທີ 17 ມັງກອນຜ່ານມາ ໂດຍການເປັນປະທານຂອງສະຫາຍ ນາງ ກິ່ງນະຄອນ ຈັນທະກຸມມານ ປະທານກໍາມະບານຮາກຖານ ກສຕສ; ມີສະຫາຍ ນາງ ປິ່ງຄຳ ລາຊະສິມມາ ກໍາມະການສູນກາງພັກ, ຄະນະພັກສະພາແຫ່ງຊາດ (ສພຊ), ເລຂາໜ່ວຍພັກຮາກຖານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ, ສະຫາຍ ໂພສີ ເຕັມເມລາດ ຮອງປະທານຄະນະບໍລິຫານງານສະຫະພັນກໍາມະບານສະພາແຫ່ງຊາດ, ບັນດາສະຫາຍຕາງໜ້າຈາກໜ່ວຍກໍາມະບານຮາກຖານພາຍໃນ ສພຊ ລວມຜູ້ເຂົ້າຮ່ວມທັງໝົດ 33 ສະຫາຍ ເປັນຍິງ 16 ສະຫາຍ.
ກອງປະຊຸມໄດ້ພ້ອມກັນຄົ້ນຄວ້າ, ປະກອບຄຳຄິດຄຳເຫັນ ແລະ ຮັບຮອງເອົາບົດລາຍງານການເມືອງ ເຊິ່ງໄດ້ຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ, ບາງບົດຮຽນທີ່ຖອດຖອນໄດ້ ໃນການຊີ້ນຳ-ນຳພາ ແລະ ການຈັດຕັ້ງປະຕິບັດວຽກງານໃນໄລຍະປີ 2019-2024 ແລະ ທິດທາງແຜນການ 5 ປີ ນັບແຕ່ປີ 2025-2029.
ຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕປ່ອນບັດຄັດເລືອກເອົາຄະນະໜ່ວຍກໍາມະບານຮາຖານກໍາມາທິການເສດຖະກິດ, ເຕັກໂນໂລຊີ ແລະ ສິ່ງ ແວດລ້ອມ ຊຸດໃໝ່ ບົນພື້ນຖານຫຼັກການລວມສູນປະຊາທິປະໄຕ ແລະ ຖືກຕ້ອງສອດຄ່ອງກັບມາດຕະຖານ ແລະ ເງື່ອນໄຂທີ່ກຳນົດໄວ້ ເຊິ່ງມີຜູ້ອອກສະໝັກຮັບເລືອກຕັ້ງ 7 ສະຫາຍ, ຍິງ 3 ສະຫາຍ, ເລືອກເອົາ 5 ສະຫາຍ, ຍິງ 2 ສະຫາຍ ຄື: ສະ ຫາຍ ນາງ ກິ່ງນະຄອນ ຈັນທະກຸມມານ ເປັນປະທານ; ສະຫາຍ ສົມຈິດ ພົມຖາວົງ ເປັນຮອງປະທານ, ສະຫາຍ ບຸນທະສິນ ໄຊຍະລາດ ເປັນປະທານກວດກາ, ສະຫາຍ ນາງ ແມ້ວ ບຸນຍະສານ ແລະ ສະຫາຍ ວອນໄຊ ພອນວິໄລ ເປັນຄະນະ.
ສະຫາຍ ນາງ ປິ່ງຄໍາ ລາຊະສິມມາ ໄດ້ສະແດງຄວາມຍ້ອງຍໍຊົມເຊີຍ ແລະ ຕີ ລາຄາສູງຕໍ່ຜົນງານການເຄື່ອນໄຫວ ແລະ ສ້າງຂະບວນການຕ່າງໆ ທີ່ບັນດາສະຫາຍສະມາຊິກກໍາມະບານ ໄດ້ຕັ້ງໜ້າປະກອບສ່ວນຈັດຕັ້ງປະຕິບັດຢ່າງຫ້າວຫັນ ຕິດພັນກັບການພັດທະນາວຽກງານວິຊາສະເພາະຂອງກຳມາທິການໃນໄລຍະຜ່ານມາ ໂດຍສະ ເພາະການເປັນເສນາທິການຄົ້ນຄວ້າໃນ 3 ພາລະບົດບາດ ໃຫ້ແກ່ຄະນະປະຈຳສະພາແຫ່ງຊາດ ແລະ ສະພາແຫ່ງຊາດ ເປັນຕົ້ນ: ການສ້າງ ແລະ ປັບປຸງກົດໝາຍ, ນິຕິກຳໃຕ້ກົດໝາຍ, ການພິຈາລະນາບັນຫາສຳຄັນພື້ນຖານຂອງປະເທດຊາດ ແລະ ການຕິດຕາມກວດກາໃນຂົງເຂດເສດຖະກິດ ໄປຄຽງຄູ່ກັບການປະຕິບັດຂໍ້ແຂ່ງຂັນເນື້ອໃນ 5 ເປັນເຈົ້າ, ຂະບວນການແຂ່ງຂັນຮັກຊາດ ແລະ ພັດທະນາ, ການກໍ່ສ້າງໜ່ວຍພັກໃຫ້ປອດໃສ ເຂັ້ມແຂງ ແລະ ໜັກແໜ້ນ; ພ້ອມກັນນີ້, ສະຫາຍຍັງໄດ້ເນັ້ນ ໜັກ ແລະ ໃຫ້ທິດຊີ້ນຳຕໍ່ຄະນະ ແລະ ສະມາຊິກກໍາມະບານພາຍໃນຮາກຖານ ຕ້ອງເອົາໃຈໃສ່ບຸກບືນ ແລະ ຈັດຕັ້ງປະຕິບັດໜ້າທີ່ການເມືອງໃຫ້ໄດ້ຮັບຜົນສຳເລັດເປັນຢ່າງດີ.
(ນາງ ກຸກກິກ ບຸດດາໄຊ)