(ສພຊ) ກອງ​ປະຊຸມ​ໃຫຍ່​ຄັ້ງ​ທີ II ຂອງໜ່ວຍຊາວໜຸ່ມຮາກຖານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ​ (ກສຕສ) ໄດ້​ເປີດ​ຂຶ້ນ​ໃນ​ຕອນ​ເຊົ້າ​ຂອງ​ວັນ​ທີ 21 ມີນາ 2024 ໂດຍການເປັນປະທານຮ່ວມ ຂອງສະຫາຍ ມະນີໂສ ຊາມຸນຕີ ຮອງ​ເລ​ຂາໜ່ວຍພັກຮາກຖານກໍາມາທິການເສດຖະກິດ, ເຕັກໂນໂລຊີ ແລະ ສິ່ງ ແວດລ້ອມ, ສະຫາຍ ​ພອນ​ແກ້ວ ຕົ້ນວໍລະຈິດ ​ກໍາມະການຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດ ລາວ, ເລ​ຂາຄະນະ​ບໍລິຫານ​ງານຊາວໜຸ່ມສະພາແຫ່ງຊາດ ແລະ ສະຫາຍ ວິມານ ອິນທະວົງ ຮັກສາການເລຂາໜ່ວຍ ຊາວໜຸ່ມຮາກຖານ ກສຕສ; ມີບັນດາສະຫາຍຕາງໜ້າໜ່ວຍຊາວໜຸ່ມຮາກຖານພາຍໃນສະພາແຫ່ງຊາດ ພ້ອມ ດ້ວຍສະມາຊິກຊາວໜຸ່ມຮາກຖານ ກສຕສ ລວມຜູ້ເຂົ້າຮ່ວມ ທັງໝົດ 37 ສະ​ຫາຍ, ຍິງ 23 ສະຫາຍ.
ກອງປະຊຸມໄດ້ຮັບຟັງການຜ່ານບົດລາຍງານການເມືອງ ແລະ ບົດສຳຫຼວດການນຳພາຂອງໜ່ວຍຊາວໜຸ່ມ ຮາກຖານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ; ຈາກນັ້ນ, ໄດ້ເປັນເອກະພາບພິຈາລະນາ, ຮັບຮອງເອົາບັນດາເນື້ອໃນສຳຄັນຄື: ຕີລາຄາສະພາບການເຄື່ອນໄຫວໄລຍະຜ່ານມາ ແຕ່ປີ 2020-2024 ໃນນັ້ນ, ໄດ້ຍົກໃຫ້ເຫັນດ້ານດີຜົນງານຕ່າງໆທີ່ໜ່ວຍຊາວໜຸ່ມຮາກຖານ ກສຕສ ຍາດມາໄດ້ ພ້ອມທັງຍົກໃຫ້ເຫັນດ້ານອ່ອນ ຂໍ້ຄົງຄ້າງ ແລະ ບັນດາສາເຫດທີ່ຕ້ອງໄດ້ປັບປຸງແກ້ໄຂ ເພື່ອຮັບປະກັນໃຫ້ການເຄື່ອນໄຫວວຽກງານຂອງໜ່ວຍຊາວ ໜຸ່ມຮາກຖານດີຂຶ້ນກວ່າເກົ່າ; ກຳນົດທິດທາງການເຄື່ອນໄຫວວຽກງານຂອງຄະນະໜ່ວຍຊາວໜຸ່ມຮາກຖານ ກສຕສ ໄລຍະ 5 ປີ (2024-2028) ໃນນັ້ນ, ຕົ້ນຕໍແມ່ນເພີ່ມທະວີສຶກສາອົບຮົມການເມືອງ-ແນວຄິດ, ການພັດ ທະນາວຽກງານຊາວໜຸ່ມ ຕິດພັນກັບການເປັນເສນາທິການໃຫ້ແກ່ໜ່ວຍພັກຮາກຖານ ກສຕສ ໄປພ້ອມກັບການ ຈັດຕັ້ງປະຕິບັດຂໍ້ແຂ່ງຂັນ 4 ບຸກ ແລະ ແຜນການທີ່ວາງໄວ້ ໃຫ້ມີປະສິດທິພາບ ແລະ ປະສິດທິຜົນສູງຂຶ້ນກວ່າເກົ່າ; ບົດສຳຫຼວດການນຳພາຂອງຄະນະໜ່ວຍຊາວໜຸ່ມຮາກຖານ ກ່ຽວກັບການຊີ້ນຳ-ນຳພາຕໍ່ວຽກງານຊາວໜຸ່ມຕະ ຫຼອດໄລຍະ 5 ປີຜ່ານມາ ເຊິ່ງຍົກໃຫ້ເຫັນດ້ານດີຜົນງານ, ດ້ານອ່ອນຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ຈຳ ນວນໜຶ່ງ ທີ່ຄະນະໜ່ວຍຊາວໜຸ່ມຮາກຖານຊຸດໃໝ່ ຈະຕ້ອງນຳໄປເປັນບົດຮຽນໃນການສືບຕໍ່ປັບປຸງແກ້ໄຂເພື່ອ ຮັບປະກັນໃຫ້ແກ່ການເຄື່ອນໄຫວວຽກງານຊາວໜຸ່ມ ກໍຄືການຜັນຂະຫຍາຍຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ II ຂອງໜ່ວຍຊາວໜຸ່ມຮາກຖານ ກສຕສ ບັນລຸຕາມຄາດໝາຍທີ່ວາງໄວ້.
ກອງປະຊຸມໄດ້ເສີມຂະຫຍາຍປະຊາທິປະໄຕ ເລືອກຕັ້ງເອົາຄະນະໜ່ວຍຊາວໜຸ່ມຮາກຖານກໍາມາທິການ ເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ຊຸດໃໝ່ ເຊິ່ງປະກອບມີ 5 ສະຫາຍ ຍິງ 2 ສະຫາຍ, ໃນນັ້ນ, ກອງ ປະຊຸມເຫັນດີເລືອກເອົາສະຫາຍ ວິໄລສັກ ແສງຜູ່ໄທ ເປັນ​ເລຂາ, ສະຫາຍ ວິມານ ອິນທະວົງ​ ເປັນຮອງເລຂາ ທັງ​ເປັນ​ປະທານກວດກາ, ສະຫາຍ ນາງ ເອເລນີ ເຊີນຮຸ່ງ ເປັນຮອງ​ເລຂາ, ສະຫາຍ ນາງ ສົມສະນິດ ຕັນທະວົງ ແລະ ສະຫາຍ ທອງວັນ ວັນນະພາ ​ເປັນ​ກຳມະການ; ນອກນັ້ນ, ກອງປະຊຸມຍັງໄດ້ເອກະພາບແຕ່ງຕັ້ງຄະນະກວດກາ ໂດຍເລືອກເອົາສະຫາຍ ວິມານ ອິນທະວົງ ເປັນປະທານກວດກາ, ສະຫາຍ ນາງ ສົມສົມນິດ ຕັນທະວົງ ເປັນຮອງ ປະທານກວດກາ ແລະ ສະຫາຍ ນ້ອຍ ພະກອນຄໍາ ເປັນຄະນະ.
ໃນໂອກາດນີ້, ສະຫາຍ ມະນີໂສ ຊາມຸນຕີ ໄດ້ຍ້ອງຍໍຊົມເຊີຍ ແລະ ຕີລາຄາສູງຕໍ່​​ຜົນງານການ​ເຄື່ອນ​ໄຫວ​ ​ແລະ ການ​ສ້າງ​ຂະ​ບວນການ​ຕ່າງໆທີ່​ບັນດາ​ສະມາ​ຊິກຊາວໜຸ່ມ​ໄດ້​ຕັ້ງໜ້າ​ປະກອບສ່ວນ​ຈັດ​ຕັ້ງ​ປະຕິບັດໜ້າທີ່ວຽກ ງານໃນໄລຍະຜ່ານມາ. ພ້ອມກັນນີ້, ຍັງໄດ້ເນັ້ນໜັກ ແລະ ໃຫ້ທິດຊີ້ນຳຕໍ່​ສະມາຊິກຊາວໜຸ່ມ ຕ້ອງໄດ້ເອົາໃຈໃສ່ບຸກ ບືນ ແລະ ຈັດຕັ້ງປະຕິບັດໜ້າ​ທີ່​ການ​ເມືອງເພີ່ມຕື່ມບາງ​ບັນຫາຄື: ເອົາໃຈໃສ່ເຕົ້າໂຮມຄວາມສາມັກຄີ, ຊຸກຍູ້ສະມາ ຊິກຊາວໜຸ່ມ ເອົາໃຈໃສ່ເຂົ້າຮ່ວມຂະບວນການຂອງອົງການຈັດຕັ້ງຢ່າງເປັນເຈົ້າການ; ສືບຕໍ່ປຸກລະດົມສະມາຊິກ ຊາວໜຸ່ມໃຫ້ມີຄວາມເຂັ້ມແຂງທາງດ້ານການເມືອງ-ແນວຄິດ, ການຈັດຕັ້ງ, ແບບແຜນການນໍາພາ, ແບບແຜນວິທີ ເຮັດວຽກ ຢ່າງມີວິທະຍາສາດ ແລະ ມີຫົວຄິດປະດິດສ້າງ ບົນພື້ນຖານລະບຽບຫຼັກການ; ດໍາເນີນຊີວິດການເມືອງ ເປັນປະຈໍາທຸກເດືອນ ໂດຍຖືເອົາການຕໍານິຕິຊົມຕົນເອງ, ການຕິຊົມເຊິ່ງກັນ ແລະກັນ ເປັນປັດໄຈສໍາຄັນ; ປະຕິບັດ ຫຼັກການລວມສູນປະຊາທິປະໄຕ, ນໍາພາເປັນໝູ່ຄະນະ, ມີການແບ່ງງານ, ແບ່ງຄວາມຮັບຜິດຊອບໃຫ້ ບຸກຄົນຢ່າງ ຈະແຈ້ງ; ຕັ້ງໜ້າເຄື່ອນໄຫວປະຕິບັດຂໍ້ແຂ່ງຂັນ 4 ບຸກຂອງຊາວໜຸ່ມ ໂດຍຕິດພັນກັບຂໍ້ແຂ່ງຂັນ “ຮັກຊາດ ແລະ ພັດທະນາ” ເຊິ່ງເປັນພື້ນຖານປັດໄຈສໍາຄັນເພື່ອເຮັດໃຫ້ໜ່ວຍຊາວໜຸ່ມຮາກຖານ ສາມາດຍາດໄດ້ຜົນງານທີ່ດີເດັ່ນ ຂຶ້ນກວ່າເກົ່າ; ພ້ອມກັນນັ້ນ ກໍຕ້ອງເອົາໃຈໃສ່ຈັດຕັ້ງປະຕິບັດເນື້ອໃນຂໍ້ແຂ່ງຂັນ 4 ບຸກຂອງ ຊາວໜຸ່ມໃຫ້ເປັນຂະ ບວນຟົດຟື້ນ, ຊີ້ນໍາ-ນໍາພາສະມາຊິກຊາວໜຸ່ມເຮັດລ້ອນໜ້າທີ່ເປັນເສນາທິການໃຫ້ແກ່ການນໍາກໍາມາທິການເສດ ຖະກິດ, ເຕັກໂນໂລຊີ ແລະ ສິ່ງແວດລ້ອມ ໃນຕໍ່ໜ້າ ໃຫ້ມີໝາກຜົນອັນຈົບງາມ.
(ຂ່າວ ແລະ ພາບ: ນາງ ໄຊໂສພາພອນ ມິ່ງມຸງຄຸນ)