(ສພຊ) – ກອງປະຊຸມໃຫຍ່ຄັ້ງທີ II ຂອງກໍາມະບານຮາກຖານກໍາມາທິການກົດໝາຍ (ກກໝ) ໄດ້ຈັດຂຶ້ນເມື່ອວັນສຸກທີ 10 ມັງກອນຜ່ານມາ ໂດຍການເປັນປະທານຂອງສະຫາຍ ນາງ ພິມມາລາ ພັນລຸວົງ ຮັກສາການປະທານກຳ ມະບານຮາກຖານກຳມາທິການກົດໝາຍ; ມີສະຫາຍ ຄຳແພງ ວິລະພັນ ຄະນະພັກສະພາແຫ່ງຊາດ, ເລຂາໜ່ວຍພັກຮາກຖານກຳມາທິການກົດໝາຍ, ສະຫາຍ ອໍາໄພ ຈິດມານົນ ຄະນະພັກ, ປະທານຄະນະບໍລິຫານງານສະຫະພັນກໍາມະບານສະພາແຫ່ງຊາດ ແລະ ແຂກຖືກເຊີນ ເຂົ້າຮ່ວມທັງໝົດ 36 ສະຫາຍ ເປັນຍິງ 15 ສະຫາຍ.
ກອງປະຊຸມໄດ້ພິຈາລະນາ ແລະ ຮັບຮອງເອົາບົດລາຍງານການເມືອງຂອງກໍາມະບານຮາກຖານກຳມາທິການກົດໝາຍ ຄື: 1. ຕີລາຄາສະພາບການເຄື່ອນໄຫວວຽກງານຂອງກຳມະບານຮາກຖານ ໃນໄລຍະ 5 ປີຜ່ານມາ (2020-2024), ໃນນັ້ນ ໄດ້ຍົກໃຫ້ເຫັນຜົນງານດ້ານດີ, ບາງຂໍ້ຄົງຄ້າງ ແລະ ສາເຫດທີ່ຕ້ອງໄດ້ສືບຕໍ່ປັບປຸງແກ້ໄຂ ເພື່ອຮັບປະ ກັນໃຫ້ການເຄື່ອນໄຫວວຽກງານຂອງກໍາມະບານຮາກຖານ ກກໝ ສາມາດຈັດຕັ້ງປະຕິບັດໄດ້ດີຂຶ້ນໃນຕໍ່ໜ້າ; 2. ທິດທາງແຜນການເຄື່ອນໄຫວວຽກງານໃນໄລຍະ 5 ປີຕໍ່ໜ້າ (2025-2029) ໃນນັ້ນ, ບັນຫາສໍາຄັນຕົ້ນຕໍແມ່ນເພີ່ມທະວີການສຶກສາອົບຮົມແນວຄິດ, ການຊ່ວຍເຫຼືອ ແລະ ປົກປ້ອງສິດ ແລະ ຜົນປະໂຫຍກຂອງສະມາຊິກກຳມະບານພາຍໃນຮາກຖານ ຕິດພັນກັບການເປັນເສນາທິການທີ່ດີໃຫ້ແກ່ໜ່ວຍພັກຮາກຖານ ກກໝ ໄປພ້ອມກັບການຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າ ແລະ ແຜນການທີ່ວາງໄວ້ ໃຫ້ມີປະສິດທິພາບ ແລະ ປະສິດທິຜົນສູງຂຶ້ນກວ່າເກົ່າ. ຮັບຮອງເອົາບົດສຳຫຼວດການນໍາພາ-ຊີ້ນໍາຂອງຄະນະກໍາມະບານຮາກຖານກຳມາທິການກົດໝາຍ ຕໍ່ວຽກງານກຳມະບານຕະຫຼອດໄລຍະ 5 ປີຜ່ານມາ.
ຜູ້ແທນກອງປະຊຸມ 23 ສະຫາຍ, ຍິງ 8 ສະຫາຍ ໄດ້ນຳໃຊ້ສິດຂອງຕົນບ່ອນບັດຄັດເລືອກເອົາຄະນະກຳມະ ບານຮາກຖານກຳມາທິການກົດໝາຍ ຊຸດທີ III ຈຳນວນ 5 ສະຫາຍ, ຍິງ 1 ສະຫາຍ; ກອງປະຊຸມຄັ້ງປະຖົມມະລືກໄດ້ຕົກລົງ: ສະຫາຍ ບຸນຍູ້ ອຸດົມເພັດ ເປັນປະທານ, ສະຫາຍ ນາງ ຕີບ ເຫັມອິນທະວົງ ເປັນຮອງປະທານ ແລະ ເປັນປະທານກວດກາ, ສະຫາຍ ສີພົງໄຊ ຊົ່ງເຍ່ຍຈື່ປັດໄຈ ເປັນຄະນະ ແລະ ເປັນຮອງປະທານກວດກາ; ສະຫາຍ ໂອບີ້ ຈັນດາ ລາ ແລະ ສະຫາຍ ວັນໄຊ ເຮີ ເປັນກໍາມະການ.
ສະຫາຍ ຄຳແພງ ວິລະພັນ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດໃນການເຄື່ອນໄຫວ ແລະ ຈັດຕັ້ງປະ ຕິບັດວຽກງານຂອງກຳມະບານຮາກຖານກຳມາທິການກົດໝາຍ ທີ່ສາມາດຍາດມາໄດ້ໃນໄລຍະ 5 ປີຜ່ານມາ ທັງມີຄຳເຫັນເນັ້ນໜັກໃຫ້ສືບຕໍ່ສຶກສາອົບຮົມວຽກງານການເມືອງ-ແນວຄິດ, ຄຸນທາດການເມືອງ ຄຸນສົມບັດສິນທໍາປະຕິວັດ, ຮັກຊາດ ຮັກລະບອບປະຊາທິປະໄຕ, ເປັນແບບຢ່າງທີ່ດີໃນການເຄື່ອນໄຫວວຽກງານ ແລະ ການດໍາລົງຊີວິດ; ກໍ່ສ້າງ, ສ່ອງແສງ ຕໍານິ-ສົ່ງຂາວ ເຊິ່ງກັນແລະກັນ ເພື່ອໃຫ້ກາຍເປັນພະນັກງານສືບທອດປ່ຽນແທນໃນຕໍ່ໜ້າ ພ້ອມທັງເອົາໃຈໃສ່ຍົກສູງຄວາມຮູ້, ຄວາມສາມາດທາງດ້ານວິຊາສະເພາະ, ເຕັກໂນໂລຊີ ແລະ ພາສາຕ່າງປະເທດ ເພື່ອຮັບປະກັນການເປັນເສນາທິການທີ່ດີໃຫ້ແກ່ກຳມາທິການ ກໍຄືສະພາແຫ່ງຊາດ; ເອົາໃຈໃສ່ປະຕິບັດຂໍ້ແຂ່ງຂັນ 5 ເປັນເຈົ້າຂອງກຳມະບານດ້ວຍຄວາມຮັບຜິດຊອບສູງ, ໃຫ້ມີຜົນສາເລັດຕາມຄາດໝາຍ; ເຕົ້າໂຮມຄວາມສາມັກຄີພາຍໃນ, ຊຸກຍູ້ ແລະ ຊ່ວຍເຫຼືອສະມາຊິກກຳມະບານພາຍໃນຮາກຖານ ປະກອບສ່ວນ ແລະ ເຂົ້າຮ່ວມກິດຈະກຳລວມຕ່າງໆຂອງອົງການຈັດຕັ້ງຢ່າງຫ້າວຫັນ ແລະ ເປັນຂະບວນການ.
(ນາງ ກຸກກິກ ບຸດດາໄຊ)