ກອງປະຊຸມແລກປ່ຽນບົດຮຽນ ການເປັນເສນາທິການໃກ້ແກ່ການນໍາ ຂອງຄະນະເລຂາທິການສະພາປະຊາຊົນແຂວງ ແລະ ຫ້ອງວ່າການແຂວງ, ໄດ້ຈັດຂຶ້ນໃນຕອນບ່າຍຂອງວັນສຸກ, ວັນທີ 3 ມິຖຸນາ 2022 ຢູ່ທີ່ຫ້ອງປະຊຸມ ສພຂ, ໂດຍການເປັນປະທານຮ່ວມຂອງທ່ານ ນາງ ວັນສີ ພວງມະໄລ ກໍາມະການປະຈໍາ ສພຂ ເລຂາທິການ ສພຂ ແລະ ທ່ານ ນາງ ອໍາໄພວອນ ປັນຍາລັກ ກຳມະການພັກແຂວງ ຫົວໜ້າຫ້ອງວ່າການແຂວງ, ມີຄະນະເລຂາທິການ ສພຂ, ຄະນະຫ້ອງວ່າການແຂວງ, ຫົວໜ້າຂະແໜງ/ຮອງຫົວໜ້າຂະແໜງ ສະພາປະຊາຊົນແຂວງ ແລະ ຫ້ອງວ່າການແຂວງເຂົ້າຮ່ວມຢ່າງພ້ອມພຽງ.

  

ຈຸດປະສົງ ແມ່ນເພື່ອແລກປ່ຽນບົດຮຽນການເປັນເສນາທິການໃກ້ແກ່ການນໍາ ຂອງຄະນະເລຂາທິການ ສະພາປະຊາຊົນແຂວງ ແລະ ຫ້ອງວ່າການແຂວງ. ກອງປະ ຊຸມຄັ້ງນີ້ ເລຂາທິການ ສພຂ ແລະ ຫົວໜ້າຫ້ອງວ່າການແຂວງ, ໄດ້ລາຍງານຫຍໍ້ກ່ຽວກັບການເປັນເສນາທິການໃກ້ແກ່ການນໍາ ຂອງຄະນະເລຂາທິການສະພາປະຊາຊົນແຂວງ ແລະ ຫ້ອງວ່າການແຂວງ, ພ້ອມທັງສະເໜີເນື້ອໃນບາງບັນຫາທີ່ຈະແລກປ່ຽນດັ່ງນີ້: ການຈັດຕັ້ງປະຕິບັດບົດບັນທຶກຮ່ວມລະຫວ່າງສພຂ ກັບ ອົງການປົກຄອງແຂວງ ເລກທີ 70, ການເປັນເຈົ້າການໃນການກະກຽມຮ່າງຂໍ້ຕົກລົງຂອງທ່ານເຈົ້າແຂວງກ່ອນຈະນຳຜ່ານກອງປະຊຸມອົງການປົກຄອງ ແລະ ກອງປະຊຸມສພຂ, ການເປັນເຈົ້າການໃນການທາບທາມຮ່າງກົດໝາຍທີ່ສະພາແຫ່ງຊາດສົ່ງໃຫ້, ການເປັນເຈົ້າການໃນການກະກຽມເນື້ອໃນກອງປະຊຸມ ສພຂ, ການເປັນເຈົ້າການໃນການຮັບແຂກສະພາແຫ່ງຊາດ ໃນບົດບາດກຳມະການສູນກາງພັກ, ກົມການເມືອງ(ທິມງານຂອງສະພາແຫ່ງຊາດ), ການປະຕິບັດນະໂຍບາຍຕ່າງໆຕໍ່ຄະນະປະຈຳສະພາປະຊາຊົນແຂວງ(ເຊັກສຸຂະພາບ ແລະ ສິ້ນສຸດອາຍຸຂອງສສຊ ສສຂ) ແລະ ປະຕິບັດລະບອບສ່ອງແສງລາຍງານເຊິ່ງກັນ ແລະ ກັນ.

 

ຫຼັງຈາກນັ້ນກອງປະຊຸມໄດ້ແລກປ່ຽນ ແລະ ປຶກສາຫາລື, ປະກອບຄໍາຄິດຄຳເຫັນ ແລະ ມີຄໍາສະເໜີຕໍ່ກັນຢ່າງເລິກເຊິ່ງ ແລະ ກົງໄປກົງມາ, ເພື່ອເຮັດໃຫ້ຂອດການປະສານງານ, ການສະໜອງຂໍ້ມູນຕ່າງໆ ລະຫວ່າງ ສະພາປະຊາຊົນແຂວງ ກັບ ຫ້ອງວ່າການແຂວງແຂວງ ໃຫ້ມີຄວາມວອງໄວ, ຊັດເຈນ ແລະ ສຳເລັດຕາມແຜນການທີ່ວາງໄວ້.