(ສພຊ) ເພື່ອຍົກສູງຄຸນນະພາບ ໃນການເປັນເສນາທິການດ້ານເນື້ອໃນ ແລະ ຮັບປະກັນຄວາມພ້ອມ ໃນການກະກຽມ ແລະ ຮັບໃຊ້ກອງປະຊຸມສະໄໝສາມັນ ຂອງສະພາປະຊາຊົນຂັ້ນແຂວງ ໃຫ້ມີປະສິດທິພາບ ແລະ ປະສິດທິຜົນສູງ ທັງເປັນການຍົກສູງຂີດຄວາມສາມາດວຽກງານເນື້ອໃນ ໂດຍສະເພາະບັນດາເອກະສານ ທີ່ຕິດພັນກັບກອງປະຊຸມສະພາປະຊາຊົນຂັ້ນແຂວງໃຫ້ມີຄຸນະພາບ ແລະ ເພື່ອຖ່າຍທອດ ແລກປ່ຽນບົດຮຽນດ້ານທິດສະດີ, ພຶດຕິກໍາຕົວຈິງ, ການສ້າງຄວາມເຂັ້ມແຂງທາງດ້ານການຂີດຂຽນເອກະສານປິ່ນອ້ອມ ໃຫ້ແກ່ກອງປະຊຸມສະໄໝສາມັນ ຂອງສະພາປະຊາຊົນແຂວງ ເປັນຕົ້ນບົດສະຫຼຸບສັງລວມຄວາມເຫັນ, ຮ່າງຄໍາຖາມເຈາະຈີ້ມ, ບົດສະຫຼຸບ, ການເປັນເລຂານຸການກອງປະຊຸມຮອບດ້ານ ແລະ ເອກະສານອື່ນໆ. ດັ່ງນັ້ນ, ໃນລະຫວ່າງວັນທີ 24-26 ພະຈິກ 2023 ທີ່ເມືອງວັງວຽງ ແຂວງວຽງຈັນ ຄະນະເລຂາທິການສະພາແຫ່ງຊາດ ໄດ້ຈັດກອງປະຊຸມເຝິກອົບຮົມຍົກສູງຄວາມສາມາດດ້ານເນື້ອໃນ ໃຫ້ແກ່ພະນັກງານວິຊາການ ຂອງສະພາປະຊາຊົນຂັ້ນແຂວງ 6 ແຂວງພາກເໜືອຄື: ຜົ້ງສາລີ, ຫຼວງນໍ້າທາ, ບໍ່ແກ້ວ, ອຸດົມໄຊ, ຫຼວງພະບາງ ແລະ ໄຊຍະບູລີ ໂດຍການເປັນປະທານຂອງທ່ານ ນາງ ປິ່ງຄຳ ລາຊະສິມມາ ເລຂາທິການສະພາແຫ່ງຊາດ, ມີທ່ານຮອງເລຂາທິການສະພາແຫ່ງຊາດ, ເລຂາ-ຮອງເລຂາທິການສະພາປະຊາຊົນຂັ້ນແຂວງ, ຫົວໜ້າກົມ, ຄະນະພະແນກ ພ້ອມດ້ວຍພະນັກງານວິຊາການກ່ຽວຂ້ອງ ເຂົ້າຮ່ວມ. 

ກອງປະຊຸມຍັງໄດ້ຮັບຟັງ ການສະເໜີກ່ຽວກັບ ການປະກອບຄໍາເຫັນຕໍ່ກອງປະຊຸມ, ການສ້າງຄໍາຊັກຖາມ ແລະ ບົດສັງລວມຄວາມເຫັນຂອງປະທານກອງປະຊຸມ ຈາກທ່ານ ສິງຄໍາ ວົງພະຈັນ ຮອງເລຂາທິການສະພາແຫ່ງຊາດ; ບົດການສ້າງຄໍາຖາມເຈາະຈີ້ມ ຂອງປະທານກອງປະຊຸມ ຈາກທ່ານ ໄຊປັນຍາ ພົມວິຫານ ວ່າການຫົວໜ້າພະແນກ ກົມເລຂານຸການ; ການຮ່າງບົດໂອ້ລົມໃຫ້ການນໍາ ການເປັນເລຂານຸການກອງປະຊຸມສະໄໝສາມັນຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຈາກທ່ານ ຄໍາສະໄໝ ສໍາມະວົງ ຫົວໜ້າກົມເລຂານຸການ; ການສ້າງບົດສະຫຼຸບ ແລະ ແຜນການເຄື່ອນໄຫວວຽກງານ ຂອງຄະນະປະຈໍາສະພາແຫ່ງຊາດ ແລະ ຄະນະເລຂາທິການ ຈາກທ່ານ ນາງ ໂຄຕະມີ ສະຫວັດດີ ຫົວໜ້າພະແນກສັງລວມ ກົມເລຂານຸການ ແລະ ບາງບົດຮຽນ ກ່ຽວກັບການຮ່າງບົດຄໍາເຫັນ ກ່າວເປີດ-ກ່າວປິດກອງປະຊຸມ ຈາກທ່ານ ນາງ ສຸປານີ ແກ້ວມີໄຊ ຫົວໜ້າພະແນກເລຂານຸການ-ການນໍາ ກົມເລຂານຸການ. ຈາກນັ້ນ, ຜູ້ເຂົ້າຮ່ວມກອງປະຊຸມ ກໍໄດ້ຜັດປ່ຽນກັນປະກອບຄຳຄິດຄຳເຫັນໃສ່ບັນດາເອກະສານ ດັ່ງກ່າວ ຕາມແຕ່ລະຫົວຂໍ້.

ກອງປະຊຸມຄັ້ງນີ້ ແມ່ນໄດ້ຮັບການສະໜັບສະໜູນຈາກໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ກັບຄະນະເລຂາທິການສະພາແຫ່ງຊາດ.