ກອງປະຊຸມເຜີຍແຜ່ເນື້ອໃນກົດໝາຍວ່າດ້ວຍການແກ້ໄຂຄໍາຮ້ອງທຸກ  ສະບັບປັບປຸງ ປີ 2022 ໄດ້ໄຂຂຶ້ນໃນວັນທີ 20 ກັນຍາ 2023 ທີ່ ສຳນັກງານ ແຂວງຄໍາມ່ວນ ໂດຍການເປັນປະທານຂອງທ່ານ ສີສູນທອນ ສ.ຜາບມີໄຊຍ‘ ຮອງປະທານກຳມາທິການຍຸຕິທຳ ສະພາແຫ່ງຊາດ ໂດຍເປັນກຽດເຂົ້າຮ່ວມມີ ທ່ານ ບົວພັນ ແສງຈັນ ຮອງປະທານສະພາປະຊາຊົນແຂວງຄໍາມ່ວນ; ທ່ານ ປອ. ສົມສະອາດ ອຸ່ນສີດາ ຮອງເຈົ້າແຂວງຄໍາມ່ວນ,  ພ້ອມດ້ວຍບັນດາທ່ານ ຄະນະປະຈໍາສະພາປະຊາຊົນແຂວງ, ສະມາຊິກສະພາແຫ່ງຊາດປະຈໍາເຂດເລືອກຕັ້ງ, ສະພາມາຊິກສະພາປະຊາຊົນຂັ້ນແຂວງ,  ບັນດາທ່ານໃນຂົງເຂດຕຸລາການ, ພະແນກການອ້ອມຂ້າງແຂວງ, ຄະນະກອງບັນຊາການ ປກຊ-ປກສ ແຂວງ, ອົງການຈັດຕັ້ງມະຫາຊົນ, ອົງການປົກຄອງເມືອງທ່າແຂກ ແລະ ແຂກຖືກເຊີນເຂົ້າຮ່ວມ ທັງໝົດ 70 ທ່ານ ຍິງ 23 ທ່ານ.

ຈຸດປະສົງໃນການລົງເຄື່ອນໄຫວເຜີຍແຜ່ຄັ້ງນີ້ເພື່ອຮັບປະກັນໃຫ້ແກ່ການຈັດຕັ້ງປະຕິບັດກົດໝາຍວ່າດ້ວຍການແກ້ໄຂຄໍາຮ້ອງທຸກ ໄດ້ຮັບການຈັດຕັ້ງປະຕິບັດເປັນເອກະພາບກັນໃນທົ່ວປະເທດ ແລະ ສ້າງຄວາມຮັບຮູ້, ຄວາມເຂົ້າໃຈໃຫ້ແກ່ອົງການລັດຂັ້ນທ້ອງຖິ່ນ, ພະນັກງານ-ລັດຖະກອນ ແລະ ປະຊາຊົນລາວບັນດາເຜົ່າ ຕໍ່ເນື້ອໃນກົດໝາຍ ແນໃສ່ເຮັດໃຫ້ທຸກພາກສ່ວນທີ່ກ່ຽວຂ້ອງ ສາມາດປະຕິບັດພາລະບົດບາດ ຕາມຂອບເຂດສິດ ແລະ ໜ້າທີ່ຂອງຕົນໄດ້ເປັນຢ່າງດີ. ໃນກອງປະຊຸມ ທ່ານ ໄກມະນິນ ເທບບົວລີ ຫົວໜ້າກົມຄໍາຮ້ອງຂໍຄວາມເປັນທຳ ນໍາສະເໜີກົດໝາຍ ທ່ານໄດ້ໃຫ້ຮູ້ວ່າ: ກົດໝາຍວ່າດ້ວຍການແກ້ໄຂຄຳຮ້ອງທຸກ ສ້າງຂຶ້ນ ແລະ ຖືກປະກາດໃຊ້ໃນປີ 2005 ແລະ ໄດ້ຮັບການປັບປຸງມາແລ້ວ 3 ຄັ້ງຄື: ຄັ້ງທີ 1 ປັບປຸງປີ 2014, ປີ 2016 ແລະ ສະບັບລ່າສຸດ ປີ 2022 ເຊິ່ງການປັບປຸງແຕ່ລະຄັ້ງ ເພື່ອແນໃສ່ເຮັດໃຫ້ວຽກງານແກ້ໄຂຄຳຮ້ອງທຸກມີຄວາມໂລ່ງລ່ຽນ, ສອດຄ່ອງຕາມພາລະບົດບາດ, ສິດ ແລະ ໜ້າທີ່ ຂອງແຕ່ລະອົງການ, ຮັບປະກັນການບໍລິການຮັບໃຊ້ປະຊາຊົນໃຫ້ມີຄວາມວ່ອງໄວ ແລະ ສາມາດປົກປ້ອງສິດ ແລະ ຜົນປະໂຫຍດອັນຊອບທຳຂອງປະຊາຊົນລາວບັນດາເຜົ່າຕາມກົດໝາຍ, ສະນັ້ນ, ຍ້ອນເຫັນໄດ້ຄວາມສຳຄັນຂອງກົດໝາຍດັ່ງກ່າວ ຈຶ່ງຈຳເປັນຕ້ອງມີການເຜີຍແຜ່ກົດໝາຍສະບັບນີ້ ໃຫ້ກັບ ຄະນະນຳຂອງແຂວງ, ເມືອງ ແລະ ພໍ່ແມ່ປະຊາຊົນບັນດາເຜົ່າໃນຂອບເຂດທົ່ວປະເທດ ໃຫ້ຮັບຮູ້ ແລະ ເຂົ້າໃຈເນື້ອໃນຄວາມເປັນເອກະພາບກັນໃນການນຳໃຊ້ ແລະ ການຈັດຕັ້ງປະຕິບັດກົດໝາຍສະບັບນີ້ໃຫ້ເຂັ້ມງວດ.

ໂດຍ: ເອື້ອ ມະໂນສິງ