ກອງປະຊຸມຮ່ວມ ລະຫວ່າງ ສະພາປະຊາຊົນແຂວງ ແລະ ອົງການປົກຄອງ ແຂວງຈໍາປາສັກ ໄດ້ເປີດຂື້ນໃນວັນທີ 22 ກໍລະກົດ 2024 ນີ້, ຢູ່ທີ່ສະພາປະຊາຊົນແຂວງຈໍາປາສັກ ໂດຍການເຂົ້າຮ່ວມເປັນຄະນະປະທານຂອງ ທ່ານ ອາລຸນໄຊ ສູນນະລາດ ກໍາມະການສູນກາງພັກ, ເລຂາພັກແຂວງ, ເຈົ້າແຂວງຈໍາປາສັກ ແລະ ທ່ານ ສາຍທອງ ໄຊຍະວົງ ຮອງເລຂາພັກແຂວງ, ປະທານສະພາປະຊາຊົນແຂວງຈໍາປາສັກ ມີບັນດາທ່ານ ຄະນະປະຈໍາ-ຄະນະກໍາມະການ-ຄະນະເລຂາທິການ ຂອງສະພາປະຊາຊົນແຂວງ, ຫົວໜ້າ-ຮອງຫົວໜ້າພະແນກການກົມກອງ, ອົງການທຽບເທົ່າອ້ອມຂ້າງແຂວງ ແລະ ວິຊາການທີ່ກ່ຽວຂ້ອງເຂົ້າຮ່ວມ.

ວາລະດໍາເນີນກອງປະຊຸມ, ທ່ານ ສາຍທອງ ໄຊຍະວົງ ປະທານສະພາປະຊາຊົນແຂວງ ໄດ້ມີຄໍາເຫັນກ່າວເປີດກອງປະຊຸມ ແລະສະເໜີຈຸດປະສົງຂອງການດໍາເນີນກອງປະຊຸມຄັ້ງນີ້: ໂດຍປະຕິບັດຕາມຂໍ້ຕົກລົງສະບັບເລກທີ 852 ວ່າດ້ວຍການພົວພັນປະສານງານ ລະຫວ່າງສະພາປະຊາຊົນແຂວງ ກັບອົງການປົກຄອງແຂວງ ມື້ນີ້, ກອງປະຊຸມຮ່ວມລະຫວ່າງສະພາປະຊາຊົນແຂວງ ກັບ ອົງການປົກຄອງແຂວງຈຳປາສັກ ໄດ້ດຳເນີນຂຶ້ນຢ່າງເປັນທາງການ ເພື່ອຮ່ວມກັນຄົ້ນຄວ້າພິຈາລະນາ ແລະ ຕົກລົງບາງວຽກງານທີ່ສຳຄັນຂອງທ້ອງຖິ່ນ ແລະ ເພື່ອເປັນການກະກຽມຄວາມພ້ອມ ກ່ອນການດຳເນີນກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງ ທີ່ຈະດຳເນີນຂຶ້ນໃນວັນທີ 25 ຫາ 26 ກໍລະກົດ 2024 ນີ້.

ກອງປະຊຸມໄດ້ຮັບຟັງລາຍງານກ່ຽວກັບການກະກຽມຄວາມພ້ອມທາງດ້ານເນື້ອໃນ ກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງ ຊຸດທີ II ຈາກ ທ່ານ ສົມສີ ມະນີນິນ ຮອງປະທານຄະນະປະຈໍາສະພາປະຊາຊົນແຂວງຈໍາປາສັກ. ຮັບຟັງການລາຍງານກ່ຽວກັບການທົບທວນຄືນກ່ຽວກັບການຈັດຕັ້ງປະຕິບັດກົນໄກປະສານງານ ລະຫວ່າງສະພາປະຊາຊົນແຂວງ ກັບ ອົງການປົກຄອງແຂວງໃນໄລຍະຜ່ານມາ ຈາກ ທ່ານ ທີບພະສອນ ສະມາເລິກ ເລຂາທິການສະພາປະຊາຊົນແຂວງຈໍາປາສັກ, ການແຈ້ງຜົນກອງປະຊຸມຄະນະປະຈຳສະພາປະຊາຊົນແຂວງ ກ່ຽວກັບການປະກອບຄຳເຫັນຕໍ່ຮ່າງນິຕິກຳ 5 ສະບັບ ແລະ ວາລະຂອງແຂວງ 1 ສະບັບ ຈາກ ທ່ານ ປອ. ສົມໄຊ ສີຫາຈັກ ປະທານຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ. ຈາກນັ້ນ,ກອງປະຊຸມໄດ້ຮັບຟັງການລາຍງານຈາກຫຼາຍພາກສ່ວນຕາງໜ້າອົງການປົກຄອງແຂວງຈໍາປາສັກ ໃນຫຼາຍໜ້າວຽກ ເປັນຕົ້ນ: ກລາຍງານຄວາມພ້ອມກ່ຽວກັບບົດລາຍງານຂອງອົງການປົກຄອງແຂວງ , ພະແນກການທີ່ກ່ຽວຂ້ອງ ທີ່ຈະລາຍງານຕໍ່ກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງ ຊຸດທີ II. ນອກນີ້, ກອງປະຊຸມຍັງໄດ້ຮັບຟັງການລາຍງານຈາກພະແນກການທີ່ກ່ຽວຂ້ອງໃນການຈັດຕັ້ງປະຕິບັດ ແລະ ການແກ້ໄຂບັນຫາຂໍ້ຄົງຄ້າງ ຕາມຂໍ້ຊັກຖາມຂອງສະມາຊິກສະພາປະຊາຊົນແຂວງຈໍາປາສັກ ໃນນັ້ນ, ມີຫົວໜ້າຄະນະຄຸ້ມຄອງເຂດເສດຖະກິດພິເສດແຂວງ ໄດ້ລາຍງານກ່ຽວກັບຄວາມຄືບໜ້າໃນການພັດທະນາເຂດເສດຖະກິດພິເສດຢູ່ແຂວງຈໍາປາສັກ: ໂຄງການເຂດພັດທະນາເສດຖະກິດໃໝ່ສີທັນດອນ (ໄລຍະທີ 1), ເຂດເສດຖະກິດພິເສດວັງເຕົ່າ, ເຂດນິຄົມອຸດສາຫະກໍາຈໍາປາສັກ -ລາວບໍລິການ, ຫົວໜ້າພະແນກອຸດສາຫະກໍາ ແລະ ການຄ້າ ລາຍງານກ່ຽວກັບການຄຸ້ມຄອງການຊື້-ຂາຍໝາກຈອງບານ ຢູ່ແຂວງຈໍາປາສັກ ຕາມຂໍ້ຕົກລົງ ສະບັບເລກທີ 262/ຈຂ.ຈສ, ລົງວັນທີ 14 ມີນາ 2024 ແລະ ຂໍ້ຕົກລົງ ສະບັບເລກທີ 555/ຈຂ.ຈສ, ລົງວັນທີ 15 ພຶດສະພາ 2024. ຫົວໜ້າພະແນກແຜນການ ແລະ ການລົງທຶນແຂວງລາຍງານກ່ຽວກັບຄວາມຄືບໜ້າໃນການຈັດຕັ້ງປະຕິບັດການພັດທະນາທີ່ໄດ້ຮັບອະນຸຍາດການລົງທຶນ ໃນເຂດສວນວັດທະນະທຳ ຫຼັກ 7 ນະຄອນປາກເຊ; ຫົວໜ້າພະແນກການເງິນແຂວງ ລາຍງານກ່ຽວກັບການເກັບລາຍຮັບຈາກການເຊົ່າ-ສໍາປະທານ ເນື້ອທີ່ດິນລັດ ຢູ່ເຂດສວນວັດທະນະທໍາ ຫຼັກ 7 ນະຄອນປາກ ແລະ ລາຍງານກ່ຽວກັບຄວາມຄືບໜ້າຜົນການແກ້ໄຂສັນຍາສໍາປະທານ ກ່ຽວກັບການເກັບເງິນຄ່າຜ່ານທາງ 14 A ແຕ່ບ້ານຫ້ວຍເພັກເມືອງໂພນທອງ ຫາບ້ານພະພີນ ເມືອງຈໍາປາສັກ ແລະປະທານອົງການກວດກາລັດແຂວງ ລາຍງານກ່ຽວກັບຜົນການແກ້ໄຂຜົນການກວດກາ ຕາມຜົນການກວດສອບ ແລະ ຕາມມະຕິສະພາປະຊາຊົນແຂວງ. ບັນດາທ່ານຜູ້ແທນກອງປະຊຸມໄດ້ຮ່ວມກັນຄົ້ນຄວ້າ, ປະກອບຄໍາເຫັນ ຢ່າງສ້າງສັນ, ພາວະວິໄສ, ມີເຫດມີຜົນ, ຮັດກຸມ ບົນພື້ນຖານແນວທາງນະໂຍບາຍຂອງພັກ, ກົດໝາຍຂອງລັດ ແລະ ສະພາບຄວາມເປັນຈິງຂອງແຂວງເຮົາ ເພື່ອເຮັດໃຫ້ບັນຫາດັ່ງກ່າວ ສາມາດນໍາໄປຈັດຕັ້ງປະຕິບັດຢ່າງເປັນຮູບປະທໍາຢ່າງແທ້ຈິງ.

ໃນຕອນທ້າຍຂອງການດໍາເນີນກອງປະຊຸມ, ຄະນະປະທານກອງປະຊຸມ ໄດ້ມີຄໍາເຫັນສະຫຼຸບ ແລະ ກ່າວປິດກອງປະຊຸມ ເຊິ່ງທ່ານໄດ້ສະແດງຄວາມຊົມເຊີຍຕໍ່ທຸກພາກສ່ວນທີ່ໄດ້ເອົາໃຈໃສ່ໃນການຈັດຕັ້ງປະຕິບັດວຽກງານໜ້າທີ່ຄວາມຮັບຜິດຊອບຂອງຕົນຢ່າງມີຜົນສໍາເລັດ. ທັງນີ້, ກໍ່ເພື່ອເພື່ອຮ່ວມກັນປຶກສາຫາລື, ສ້າງຄວາມເປັນເອກະພາບຕໍ່ບັນດາເນື້ອໃນທີ່ໄດ້ນຳເຂົ້າພິຈາລະນາໃນກອງປະຊຸມຮ່ວມ ລະຫວ່າງ ສະພາປະຊາຊົນແຂວງ ກັບ ອົງການປົກຄອງແຂວງ ໃນເທື່ອນີ້. ສໍາລັບຂໍ້ຄົງຄ້າງບາງດ້ານ, ກໍ່ຄືບາງເນື້ອໃນບົດທີ່ຈະລາຍຕໍ່ກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງຈໍາປາສັກ ຊຸດທີ II ທີ່ຍັງບໍ່ທັນສໍາເລັດ ແມ່ນສະເໜີໃຫ້ພາກສ່ວນທີ່ກ່ຽວໃຫ້ສືບຕໍ່ຂຸ້ນຂ້ຽວກະກຽມໃຫ້ສໍາເລັດຕາມກໍານົດເວລາ.