ໃນຕອນເຊົ້າຂອງວັນທີ 14 ມິຖຸນາ 2023 ນີ້ ຢູ່ທີ່ສະພາປະຊາຊົນແຂວງບໍລິຄໍາໄຊ ໄດ້ດໍາເນີນກອງປະຊຸມຮ່ວມ ກັບອົງການປົກຄອງແຂວງ ເພື່ອຄົ້ນຄວ້າປຶກສາຫາລື ແລະ ເອກະພາບ ກ່ຽວກັບບັນດາເນື້ອໃນ ທີ່ຈະນໍາເຂົ້າຄົ້ນຄວ້າ ພິຈາລະນາຮັບຮອງໃນກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນແຂວງບໍລິຄໍາໄຊ ໂດຍການເປັນປະທານຮ່ວມຂອງ ທ່ານ ປອ ສຸວັນນີ ໄຊຊະນະ ຮອງເລຂາພັກແຂວງ, ປະທານສະພາປະຊາຊົນແຂວງ ແລະ ທ່ານ ບຸນເສັງ ປະທໍາມະວົງ ຄະນະປະຈໍາພັກແຂວງ, ຮອງເຈົ້າແຂວງບໍລິຄໍາໄຊ, ມີທ່ານຮອງເຈົ້າແຂວງ, ຄະນະປະຈໍາສະພາປະຊາຊົນແຂວງ, ສະມາຊິກສະພາແຫ່ງຊາດປະຈໍາເຂດເລືອກຕັ້ງ, ສະມາຊິກສະພາປະຊາຊົນແຂວງ, ຄະນະເລຂາທິການສະພາປະຊາຊົນແຂວງ, ຫົວໜ້າພະແນກການ, ຫົວໜ້າກອງບັນຊາການ ແລະ ພາກ ສ່ວນກ່ຽວຂ້ອງ ເຂົ້າຮ່ວມ.
ກອງປະຊຸມໄດ້ຮັບຟັງການຕີລາຄາການດໍາເນີນກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນແຂວງ ຊຸດທີ II ທີ່ຜ່ານມາ. ພ້ອມນີ້ ຍັງໄດ້ປຶກສາຫາລື, ປະກອບຄໍາຄິດເຫັນ ແລະ ເອກະພາບກໍານົດເອົາບັນດາເນື້ອໃນທີ່ກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນແຂວງ ຊຸດທີ II ຈະໄດ້ຄົ້ນຄວ້າ , ພິຈາລະນາ, ຮັບຮອງ ເປັນຕົ້ນ:
- ຮັບຟັງການລາຍງານຂອງທ່ານເຈົ້າແຂວງ ກ່ຽວກັບການຈັດຕັ້ງປະຕິບັດວຽກງານທີ່ພົ້ນເດັ່ນເປັນຈຸດສຸມບູລິມະສິດຂອງແຂວງ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈຳ 6 ເດືອນຕົ້ນປີ ແລະ ທິດທາງແຜນການ ປະຈຳ 6 ເດືອນທ້າຍປີ 202
- ຮັບຟັງການລາຍງານຂອງພະແນກແຜນການ ແລະ ການລົງທຶນແຂວງ ກ່ຽວກັບການຈັດຕັ້ງປະຕິບັດແຜນການລົງທຶນ ປະຈຳ 6 ເດືອນຕົ້ນປີ ແລະ ທິດທາງແຜນການ ປະຈຳ 6 ເດືອນທ້າຍປີ 202
- ຮັບຟັງການລາຍງານຂອງພະແນກການເງິນແຂວງ ກ່ຽວກັບການຈັດຕັ້ງປະຕິບັດແຜນງົບປະ ມານ ປະຈຳ 6 ເດືອນຕົ້ນປີ ແລະ ທິດທາງແຜນການ ປະຈຳ 6 ເດືອນທ້າຍປີ 202
- ຮັບຟັງການລາຍງານ ຂອງຫົວໜ້າພະແນກສາທາລະນະສຸກແຂວງ ກ່ຽວກັບການຈັດຕັ້ງປະຕິບັດກອງທຶນປະກັນສຸຂະພາບແຫ່ງຊາດ.
- ຮັບຟັງການລາຍງານ ຂອງຫົວໜ້າພະແນກແຮງານ ແລະ ສະຫວັດດີການສັງຄົມແຂວງ ກ່ຽວກັບຄຸ້ມຄອງ ແລະ ພັດທະນາສີມືແຮງງານ ພາຍໃນແຂວງບໍລິຄໍາໄຊ.
- ຮັບຟັງການລາຍງານຂອງອົງການໄອຍະການປະຊາຊົນແຂວງ ກ່ຽວກັບການຕິດຕາມ ກວດກາ ຄ້າຍຄຸມຂັງ, ຄ້າຍດັດສ້າງ ແລະ ສູນບໍາບັດ ໃນທົ່ວແຂວງ ໄລຍະປີ 2022 ເຖິງປະຈຸບັນ.
- ຮັບຟັງການລາຍງານ ຂອງປະທານສານປະຊາຊົນແຂວງ ກ່ຽວກັບການດໍາເນີນຄະດີແພ່ງ ໄລຍະປີ 2022 ເຖິງປະຈຸບັນ.
- ຮັບຟັງການລາຍງານຂອງພະແນກຍຸຕິທໍາແຂວງ ກ່ຽວກັບການຈັດຕັ້ງປະຕິບັດຄໍາຕັດສິນຂອງສານທົ່ວແຂວງບໍລິຄໍາໄຊ ໃນໄລຍະຜ່ານມາ ແລະ ທິດທາງແກ້ໄຂໃນຕໍ່ໜ້າ.
- ພິຈາລະນາ, ຮັບຮອງເອົາບົດລາຍງານການຈັດຕັ້ງປະຕິບັດວຽກງານປະຈໍາ 6 ເດືອນ ຕົ້ນປີ ທິດທາງແຜນການ 6 ເດືອນທ້າຍປີ 2023 ຂອງສະພາປະຊາຊົນແຂວງບໍລິຄໍາໄຊ.
- ກ່ຽວກັບແຜນການສ້າງ ແລະ ປັບປຸງນິຕິກໍາ, ກອງປະຊຸມເຫັນດີກໍານົດເບື້ອງຕົ້ນ ຈໍານວນ 1 ສະບັບ ຄື: ຮ່າງຂໍ້ຕົກລົງຂອງເຈົ້າແຂວງ ວ່າດວ້ຍການສ້າງກອງທຶນພັດທະນາວຽກງານກິລາກາຍະກຳຂອງແຂວງບໍລິຄຳໄຊ.
ຂ່າວ ແລະ ພາບ ໂສລະຢ໋າ