ໃນວັນທີ 6 ມິຖຸນາ 2022 ຢູ່ທີ່ຫ້ອງປະຊຸມຫ້ອງວ່າການປົກຄອງແຂວງໄຊຍະບູລີ ໄດ້ຈັດກອງປະຊຸມຮ່ວມ ລະ ຫວ່າງ ສະພາປະຊາຊົນແຂວງ ກັບ ຫ້ອງວ່າການປົກຄອງ ແຂວງ ໂດຍການເປັນປະທານຮ່ວມຂອງທ່ານ ເພັງນິລັນ ຄໍາພັນເພັງ ຮອງເລຂາພັກແຂວງ ປະທານສະພາປະຊາຊົນແຂວງ ແລະ ທ່ານ ສົມຈິດ ຈັນທະວົງ ຄະນະປະຈໍາພັກແຂວງ ຮອງເຈົ້າແຂວງ ໄຊຍະບູລີ ໃຫ້ກຽດເຂົ້າຮ່ວມມີບັນດາ ຄະນະປະຈໍາພັກແຂວງ ຄະນະປະຈໍາສະພາປະຊາຊົນແຂວງ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ7, ສະມາຊິກສະພາປະຊາຊົນແຂວງ, ມີຫົວໜ້າ-ຮອງຫົວພະແນກການ, ອົງການ, ກົມກອງ, ຫົວໜ້າ-ຮອງຫົວໜ້າຂະແໜງການ ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.
ກອງປະຊຸມໄດ້ຮັບຟັງການລາຍງານຜົນຂອງການຕິດຕາມ,ກວດກາ ແລະ ຊຸກຍູ້ການຈັດຕັ້ງປະຕິບັດບັນດາມະຕິກອງປະຊຸມສະພາແຫ່ງຊາດ ແລະ ສະພາປະຊາຊົນແຂວງ, ບົດລາຍງານຂອງອົງການປົກຄອງແຂວງ ການແກ້ໄຂຄວາມຫຍຸ້ງຍາກທາງດ້ານເສດຖະກິດ-ສາຍເງິນ, ບົດລາຍງານການຈັດຕັ້ງປະຕິບັດວາລະແຫ່ງຊາດ ກ່ຽວ ກັບການແກ້ໄຂບັນຫາຢາເສບຕິດ ແລະ ພ້ອມທັງຄົ້ນຄວ້າບັນຫາສໍາຄັນຈໍານວນໜື່ງ ເພື່ອນໍາເຂົ້າກອງປະຊຸມສະໄໝສາມັນເທື່ອທີ3 ຂອງສະພາແຫ່ງຊາດ ຊຸດທີ IX ຫຼັງຈາກນັ້ນ, ຜູ້ເຂົ້າຮ່ວມກອງປະຊຸມໄດ້ພ້ອມກັນປະກອບຄໍາຄິດຄໍາເຫັນໃສ່ບົດລາຍງານດັ່ງກ່າວຢ່າງກົງໄປກົງມາ.
ໃນຕອນທ້າຍປະທານກອງປະຊຸມຍັງໄດ້ມີຄໍາເຫັນຊີ້ນໍາ ກ່ອນອື່ນທ່່ານໄດ້ ຍ້ອງຍໍຊົມເຊີຍຕໍ່ຜົນງານທີ່ຜ່ານນັ້ນກໍເຫັນວ່າເຮັດສໍາເລັດໃນຫຼາຍດ້ານ ແຕ່ວ່າກໍຍັງມີອັນທີ່ຕ້ອງປັບປຸງໃນບາງພາກສ່ວນເພື່ອໃຫ້ສອດຄ່ອງກັບສະພາບຕົວຈິງເພື່ອໃຫ້ສາມາດປະຕິບັດໄດ້ໃນຕໍ່ໜ້າ ພ້ອມທັງຈະນໍາເອົາເນື້ອໃນຈິດໃຈກອງປະຊຸມໃນນີ້ນໍາໄປສະຕໍ່ຂັ້ນເທິງ ເພື່ອ ໃຫ້ເກີດດອກອອກຜົນໃນກອງປະຊຸມສະໄໝສາມັນເທື່ອທີ3 ທີ່ຈະເປິດຂຶ້ນໃນວັນທີ 13 ມິຖຸນາ ທີ່ຈະມາເຖິງນີ້.
ໂດຍ: ອິນທີ ຂຽວສີຟ້າ