ໃນວັນທີ 22 ມິຖຸນາ 2023 ຢູູ່ທີ່ຫ້ອງປະຊຸມຂອງສະພາປະຊາຊົນແຂວງ ໄດ້ເປີດກອງປະຊຸມຮ່ວມ ລະຫວ່າງສະພາປະຊາຊົນແຂວງ ກັບອົງການປົກຄອງແຂວງ ເພື່ອປຶກສາຫາລື ແລະ ເອກະພາບກ່ຽວກັບເນື້ອໃນ ທີ່ຈະນຳເຂົ້າພິຈາລະນາ, ຮັບຮອງ ໃນກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນແຂວງ ຊຸດທີ II ພາຍໃຕ້ການເປັນປະທານຮ່ວມຂອງ ບຸນຈັນ ສີວົງພັນ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆຂຽງຂວາງ ແລະ ທ່ານ ບຸນໂຮມ ເທດທານີ ຮອງເລຂາພັກແຂວງປະທານສະພາປະຊາຊົນແຂວງ, ເປັນກຽດເຂົ້າຮ່ວມ ຂອງບັນດາທ່ານຄະນະປະຈໍາພັກແຂວງ, ຄະນະປະຈຳສະພາປະຊາຊົນແຂວງ, ປະທານ-ຮອງປະທານຄະນະກຳມະການ, ຫົວໜ້າ-ຮອງຫົວໜ້າພະ ແນກການຂອງແຂວງ, ອົງການຈັດຕັ້ງມະຫາຊົນ ແລະ ພະນັກຂອງສະພາປະຊາຊົນແຂວງ.

ໃນກອງປະຊຸມໄດ້ປຶກສາຫາລື, ເອກະພາບກັນຕໍ່ບັນດາຫົວຂໍ້ທີ່ຈະນຳເຂົ້າພິຈາລະນາ, ຄົ້ນຄວ້າ ແລະ ຮັບຮອງໃນກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນແຂວງ ຊຸດທີ II ເປັນຕົ້ນແມ່ນ ບົດລາຍງານ ວຽກງານທີ່ພົ້ນເດັ່ນຂອງທ່ານເຈົ້າແຂວງໂດຍສັງເຂບ, ບົດລາຍງານຂອງພະແນກແຜນການ ແລະ ການລົງທຶນ, ພະແນກການເງິນ, ພະແນກແຮງງານ ແລະ ສະຫວັດດີການສັງຄົມ ແລະ ບົດລາຍງານ ຄວາມຄືບໜ້າ ການຈັດຕັ້ງປະຕິບັດ ສອງວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດຂອງແຂວງ ແລະ ບັນດາພະແນກການກ່ຽວຂອ້ງຈຳນວນໜຶ່ງ ຊີ້ແຈງຕາມຄຳຖາມເຈາະຈີ້ມ, ບົດລາຍງານຂອງສານປະຊາຊົນແຂວງ, ອົງການໄອຍະການປະຊາຊົນ ແລະ ບົດລາຍງານຂອງສະພາປະຊາຊົນແຂວງ ໃນການຈັດຕັ້ງປະຕິບັດວຽກງານໃນໄລຍະ 6 ເດືອນຕົ້ນປີ ແລະ ທິດທາງແຜນການທ້າຍປີ 2023; ພ້ອມກັນນັ້ນຜູ້ແທນກອງປະຊຸມຍັງໄດ້ຄົ້ນຄວ້າ, ພິຈາລະນາ ແລະ ຍົກບັນຫາຂຶ້ນເພື່ອສົນທະນາກ່ຽວກັບບັນດາຫົວຂໍ້ຕ່າງໆ ຢ່າງກົງໄປກົງມາ ແລະ ເລິກເຊິ່ງ ເພື່ອເຮັດໃຫ້ບັນດາເນື້ອໃນທີ່ຈະນຳເຂົ້າພິຈາລະນາ ແລະ ຮັບຮອງຢູ່ກອງປະຊຸມສະໄໝສາມັນ ເທື່ອທີ່ 5 ຂອງສະພາປະຊາຊົນແຂວງ ຊຸດທີ II ໃຫ້ມີເນື້ອໃນຄົບຖ້ວນ, ສອດຄ່ອງຕາມກົດໝາຍ.

ໃນຕ້ອນທ້າຍຄະນະປະທານຍັງໄດ້ໂອ້ລົມ ແລະ ມີຄຳຄິດເຫັນຕໍ່ກອງປະຊຸມ ໂດຍເນັ້ນໃຫ້ທຸກຂະແໜງການທີ່ກ່ຽວຂອງຈົ່ງເອົາໃຈໃສ່ ຈັດຕັ້ງປະຕິບັດໜ້າທີ່ວຽກງານຂອງຕົນດ້ວຍຄວາມຮັບຜິດ ຊອບສູງ ພ້ອມທັງກະກຽມບົດງານລາຍຂອງຕົນໃຫ້ທວງທັນກັບເວລາ, ລະອຽດຖີ່ຖ້ວນ ກ່ອນນຳເຂົ້າຄົ້ນຄວ້າ, ພິຈາລະນາ ແລະ ຮັບຮອງ ໃນຂອງກອງປະຊຸມ ສະໄໝສາມັນ ເທື່ອທີ່ 5 ຂອງສະພາປະຊາຊົນແຂວງ ຊຸດທີ II.

ສະພາປະຊາຊົນແຂວງຊຽງຂວາງ

ຂ່າວໂດຍ: ບຸນສີ ສິດທິເດດ