ໂດຍປະຕິບັດຕາມພາລະບົດບາດ, ສິດ ແລະ ໜ້າທີ່ ຕາມກົດໝາຍວ່າດ້ວຍສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໃນນາມເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນລາວບັນດາເຜົ່າໃນທົ່ວແຂວງຄໍາມ່ວນ ແລະ ປະຕິບັດຕາມແຜນການເຄື່ອນໄຫວພົບປະ ປະຊາຊົນ ຕິດພັນກັບການຈັດຕັ້ງຜັນຂະຫຍາຍ ແລະ ໂຄສະນາເຜີຍແຜ່ຜົນສຳເລັດກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງຄໍາມ່ວນ ຊຸດທີ II ສະບັບເລກທີ 188/ຄລຂ.ຄມ, ລົງວັນທີ 6 ກຸມພາ 2024;

ພາຍຫຼັງທີ່ໄດ້ສຳເລັດການເຄື່ອນໄຫວໃນລະຫວ່າງອາທິດທີ 1 ແລະ ອາທິດທີ 2 ຂອງເດືອນ ມີນາ 2024 ທີ່ຜ່ານມາສະມາຊິກສະພາແຫ່ງຊາດ ແລະ ຄະນະສະມາຊິກສະພາປະຊາຊົນຂັ້ນແຂວງປະຈໍາເຂດເລືອກຕັ້ງເມືອງມະຫາໄຊ ເຄື່ອນໄຫວພົບປະຜູ້ມີສິດເລືອກຕັ້ງ ຕິດພັນກັບການຈັດຕັ້ງຜັນຂະຫຍາຍ ແລະ ໂຄສະນາເຜີຍແຜ່ຜົນສຳເລັດກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງຄໍາມ່ວນ ຊຸດທີ II ໂດຍແບ່ງອອກເປັນ 2 ຄະນະ: ຄະນະທີ 1 ນຳໂດຍທ່ານ ນາງ ບັງອອນ ໄຊຍະສິດ ກຳມະການປະຈໍາພັກແຂວງ ຮອງປະທານຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງທີ 12 ແຂວງຄຳມ່ວນ ແລະ ທ່ານ ອິນທະວົງ ພົມມະຈັນ ຫົວໜ້າຄະນະສະມາຊິກສະພາປະຊາຊົນຂັ້ນແຂວງປະຈໍາເຂດເລືອກຕັ້ງເມືອງມະຫາໄຊ, ພ້ອມດ້ວຍພະນັກງານ, ວິຊາການຈາກສະພາປະຊາຊົນແຂວງ ແລະ ໜ່ວຍງານຊ່ວຍວຽກ ຄະນະ ສສຂ ປະຈໍາເຂດເລືອກຕັ້ງເມືອງເຂົ້າຮ່ວມ; ເຊິ່ງຄະນະທີ 2 ນຳໂດຍທ່ານ ບົວພັນ ແສງຈັນ ກຳມະການພັກແຂວງ ຮອງປະທານສະພາປະຊາຊົນແຂວງຄໍາມ່ວນ ແລະ ທ່ານ ນາງ ຄໍາສອນ ວົງຊະນະ ສສຂ ປະຈໍາເຂດເລືອກຕັ້ງເມືອງມະຫາໄຊ , ພ້ອມດ້ວຍ

ພະນັກງານ, ວິຊາການຈາກສະພາປະຊາຊົນແຂວງ ແລະ ໜ່ວຍງານຊ່ວຍວຽກ ຄະນະ ສສຂ ປະຈໍາເຂດເລືອກຕັ້ງເມືອງເຂົ້າຮ່ວມເປັນຄະນະ; ໄດ້ລົງເຄື່ອນໄຫວພົບປະ ຄະນະພັກ, ຄະນະການນຳຂອງເມືອງມະຫາໄຊ, ພະນັກງານຫຼັກແຫຼງຂອງເມືອງ, ກຳລັງປກຊ-ປກສ, ອຳນາດການປົກຄອງບ້ານ ແລະ ຕະຫຼອດຮອດພໍ່ແມ່ປະຊາຊົນຈໍານວນ 12 ເຂດ,​ ມີ 41 ບ້ານ, ເຊິ່ງປະກອບດ້ວຍ 16 ຈຸດ, ມີຜູ້ເຂົ້າຮ່ວມທັງໝົດ 2060 ເທື່ອຄົນ,​ ຍິງ 963 ເທື່ອຄົນ, ຜ່ານການສັງລວມການຮັບເອົາຄໍາຄິດ-ຄໍາເຫັນ ແລະ ຄໍາສະເໜີຂອງປະຊາຊົນຈໍານວນ 16 ຈຸດ, ນັ້ນເປັນຄໍາສະເໜີທີ່ໄດ້ຕິດພັນກັບ 3 ຂົງເຂດຄື: ຂົງເຂດເສດຖະກິດ, ຂົງເຂດວັດທະນະທຳ-ສັງຄົມ ແລະ ຂົງເຂດ ປກຊ-ປກສ.

     ສະນັ້ນ, ໃນວັນທີ 15 ມີນາ 2024 ທີ່ສຳນັກງານເມືອງມະຫາໄຊ, ໄດ້ຈັດກອງປະຊຸມຮ່ວມລະຫວ່າງ ຄະນະສະມາຊິກສະພາປະຊາຊົນຂັ້ນແຂວງ ແລະ ອົງການປົກຄອງເມືອງມະຫາໄຊ ໂດຍການເປັນປະທານຂອງທ່ານ ນາງ ບັງອອນ ໄຊຍະສິດ ກຳມະການປະຈໍາພັກແຂວງ ຮອງປະທານຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 12 ແຂວງຄໍາມ່ວນ ຮອງປະທານສະພາປະຊາຊົນແຂວງ, ເຂົ້າຮ່ວມມີ ທ່ານ ບົວພັນ ແສງຈັນ ຮອງປະທານສະພາປະຊາຊົນແຂວງ,​ ທ່ານ ອິນທະວົງ ພົມມະຈັນ ຫົວໜ້າຄະນະສະມາຊິກສະພາປະຊາຊົນຂັ້ນແຂວງປະຈໍາເຂດເລືອກຕັ້ງເມືອງມະຫາໄຊ, ມີ ທ່ານ ສົມບູນ ແກ້ວວົງສາ ເຈົ້າເມືອງມະຫາໄຊ ພ້ອມດ້ວຍ ຄະນະສະມາຊິກສະພາປະຊາຊົນຂັ້ນແຂວງ ປະຈໍາເຂດເລືອກຕັ້ງເມືອງ, ມີບັນດາ ທ່ານຄະນະປະຈໍາພັກເມືອງ, ກຳມະການພັກເມືອງ ແລະ ຫົວໜ້າຫ້ອງການອ້ອມຂ້າງເມືອງເຂົ້າຮ່ວມ.

ຈຸດປະສົງ: ໃນການຈັດກອງປະຊຸມຄັ້ງນີ້ແມ່ນເພື່ອສະຫຼຸບຕີລາຄາຄືນການເຄື່ອນໄຫວພົບປະ ແລະ ການຄົ້ນຄວ້າປຶກສາຫາລື ປະກອບຄໍາຄິດ-ຄໍາເຫັນ, ພິຈາລະນາເອົາບັນດາຄໍາສະເໜີ, ຄໍາຮ້ອງ ແລະ ບັນຫາຂໍ້ຂັດຂ້ອງຫມອງໃຈຕ່າງໆຂອງອົງການປົກຄອງເມືອງ, ບ້ານ ແລະ ພໍ່ແມ່ປະຊາຊົນໃນເຂດເລືອກຕັ້ງແຕ່ລະຈຸດທີ່ ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 12 ແຂວງຄໍາມ່ວນ ແລະ ສະມາຊິກສະພາປະຊາຊົນແຂວງຄໍາມ່ວນປະຈໍາເຂດເລືອກຕັ້ງເມືອງມະຫາໄຊ, ໄດ້ສຳເລັດໃນການເຄື່ອນໄຫວພົບປະຢ້ຽມຢາມຜູ້ມີສິດເລືອກຕັ້ງທີຕິດພັນກັບການຈັດຕັ້ງຜັນຂະຫຍາຍ ໂຄສະນາເຜີຍແຜ່ຜົນສຳເລັດກອງປະຊຸມສະພາ 2 ຂັ້ນ.

ທັງນີ້ກໍ່ເພື່ອເປັນການຄົ້ນຄ້ວາປຶກສາຫາລື ແລະ ເປັນເອກະພາບ ໃນການສະເໜີຕໍ່ໄປຍັງອົງການອຳນາດລັດຂັ້ນຕ່າງໆ ໃນການນໍາໄປຄົ້ນຄວ້າ-ແກ້ໄຂຄໍາສະເໜີ ຕາມພາລະບົດ ສິດ, ໜ້າທີ່ ແລະ ຕາມລະບຽບກົດໝາຍ.

ໂດຍ: ເອື້ອ ມະໂນສິງ