ໃນຕອນເຊົ້າ ວັນທີ 26 ຕຸລາ 2023 ທີ່ຫ້ອງປະຊຸມໃຫຍ່ຂອງສະພາປະຊາຊົນແຂວງຜົ້ງສາລີ ໄດ້ຈັດກອງຮ່ວມລະຫວ່າງ ຄະນະປະຈໍາສະພາປະຊາຊົນແຂວງ ກັບ ອົງການປົກຄອງແຂວງ ໂດຍການເປັນປະທານຂອງ ທ່ານ ທອງສີ ເສົາສຸລິພົມປະທານຄະນະປະຈໍາສະພາປະຊາຊົນແຂວງ, ມີບັນດາທ່ານຄະນະປະຈໍາສະພາປະຊາຊົນແຂວງ, ບັນດາທ່ານຫົວໜ້າ, ຮອງຫົວໜ້າພະແນກການ, ອົງການທີ່ກ່ຽວຂ້ອງຂັ້ນແຂວງ, ມີບັນດາທ່ານຮອງປະທານຄະນະກໍາມະການ, ຮອງເລຂາທິການ ແລະ ພະນັກງານວິຊາການ ພາຍໃນສະພາປະຊາຊົນແຂວງ ເຂົ້າຮ່ວມ.
ຈຸດປະສົງຂອງກອງປະຊຸມ ເພື່ອປຶກສາຫາລື, ເປັນເອກະພາບກ່ຽວກັບການກະກຽມ ແລະ ສັງລວມເປັນບົດປະກອບຄວາມເຫັນກ່ຽວກັບສະພາບການຈັດຕັ້ງປະຕິບັດວຽກງານທີ່ພົ້ນເດັ່ນຂອງແຂວງ, ສັງລວມ ແລະ ເອກະພາບຕໍ່ກັບແຕ່ລະບັນຫາ, ວຽກງານທີ່ຄົງຄ້າງ ເພື່ອໃຫ້ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 2 ສະເໜີລັດຖະບານ ແລະ ສະພາແຫ່ງຊາດຄົ້ນຄວ້າ ພິຈາລະນາ, ແກ້ໄຂຊ່ວຍແຂວງຜົ້ງສາລີ ໃນກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ IX
ໃນກອງປະຊຸມໄດ້ຮັບຟັງ ທ່ານ ຄໍາດາ ໂສລະພົມ ປະທານຄະນະກໍາມະການຍຸຕິທໍາ ແລະ ປກຊ-ປກສ, ທ່ານ ສົມຈິດ ລາວຈຸງ ປະທານຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ, ທ່ານ ສຸວັນຟູ ລາວລີ ຮອງປະທານຄະນະກໍາມະການເສດຖະກິດ ແຜນການ ແລະ ການເງິນ ລາຍງານກ່ຽວກັບການສັງລວມເນື້ອໃນ, ບັນຫາ ແລະ ວຽກງານ ເຂົ້າເປັນບົດປະກອບຄວາມເຫັນ ແລະ ຄໍາຊັກຖາມ ຕາມຂົງເຂດຄວາມຮັບຜິດຊອບຂອງຕົນ. ຫຼັງຈາກນັ້ນ, ປະທານກອງປະຊຸມໄດ້ມີຄໍາເຫັນເຈາະຈີ້ມ ແລະ ບັນດາຜູ້ແທນກອງປະຊຸມ ໄດ້ປະກອບຄໍາຄິດຄໍາເຫັນ ຢ່າງກົງໄປກົງມາ ເພື່ອຄວາມເປັນເອກະພາບ ຕໍ່ເນື້ອໃນບົດປະກອບຄໍາເຫັນດັ່ງກ່າວ ແລະ ມີຂໍ້ສະເໜີ ເພື່ອເປັນຂໍ້ມູນໃຫ້ແກ່ຄະນະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 2 ທີ່ຈະນໍາເຂົ້າປະກອບຄໍາເຫັນໃນກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ IX
ພາບ-ຂ່າວ: ສູນທອງ ວິໄລຈິດ