ໃນລະຫວ່າງວັນທີ 25-26 ເມສາ 2024 ຢູ່ທີ່ສະໂມສອນຫ້ອງວ່າການເມືອງຄຳ ໄດ້ເປີດກອງປະຊຸມສໍາມະນາແລກປ່ຽນບົດຮຽນວຽກງານຄະນະເລຂາທິການ ສະພາປະຊາຊົນແຂວງ ລະຫວ່າງແຂວງຊຽງຂວງ, ​ຫົວພັນ, ໄຊສົມບູນ ແລະ ບໍລິຄໍາໄຊ ພາຍໃຕ້ການເປັນປະທານຮ່ວມຂອງທ່ານ ບຸນໂຮມ ເທດທານີ ຮອງເລຂາພັກແຂວງ, ປະທານສະພາປະຊາຊົນແຂວງ ແລະ ບັນດາທ່ານປະທານ-ຮອງປະທານຂອງ 4 ແຂວງ, ມີບັນດາທ່ານຄະນະປະຈຳ, ຄະນະເລຂາທິການ, ຫົວໜ້າ-ຮອງຫົວໜ້າຂະ     ແໜງ ແລະ ພະນັກງານຂອງສະພາປະຊາຊົນແຂວງ 4 ແຂວງເຂົ້າຮ່ວມ.

ໃນວາລະດຳເນີນກອງປະຊຸມບັນດາທ່ານຄະນະເລຂາທິການສະພາປະຊາຊົນແຂວງໄດ້ຂຶ້ນລາຍງານການຈັດຕັ້ງປະຕິບັດວຽກງານຂອງຕົນ ໃນໄລຍະຜ່ານມາໃຫ້ທີ່ປະຊຸມໄດ້ຮັບຟັງ ຈາກນັ້ນຜູ້ເຂົ້າຮ່ວມໄດ້ມີຄຳຄິດຄຳເຫັນແລກປ່ຽນເຊິ່ງກັນ ແລະ ກັນຢ່າງກົງໄປກົງມາ ເປັນຕົ້ນແມ່ນການຈັດຕັ້ງປະຕິບັດ ພາລະບົດບາດ, ສິດ ແລະ ໜ້າທີ່ຂອງຄະນະເລຂາທິການສະພາປະຊາຊົນແຂວງ ມີຂໍ້ສະດວກ ແລະ ຂໍ້ຫຍຸ້ງຍາກຄືແນວໃດເປັນຕົ້ນ: ວຽກງານຄົ້ນຄວ້າ-ສັງລວມເນື້ອໃນ, ການຄຸ້ມຄອງວຽກງານບໍລິຫານ, ແຜນການ, ການເງິນ ແລະ ການຄຸ້ມຄອງວຽກງານຈັດຕັ້ງ-ພະນັກງານ, ວຽກງານການພົວພັນປະສານງານກັບອົງການປົກຄອງແຂວງ, ສະພາປະຊາຊົນແຂວງ ແລະ ຄະນະສະມາຊິກສະພາປະຊາຊົນແຂວງປະຈໍາເຂດເລືອກຕັ້ງເມືອງ, ການເປັນເສນາທິການໃຫ້ແກ່ການກະກຽມວຽກງານປິ່ນອ້ອມກ່ອນການເປີດກອງປະຊຸມສະໄໝສາມັນແຕ່ລະຄັ້ງ ຂອງສະພາປະຊາຊົນແຂວງ, ການເປັນເສນາທິການທີ່ດີໃຫ້ແກ່ສະພາປະຊາຊົນແຂວງ, ຄະນະປະຈໍາສະພາປະຊາຊົນແຂວງ ແລະ ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ.

ໃນຕອນທ້າຍທ່ານ ບຸນໂຮມ ເທດທານີ ໄດ້ມີຄຳເຫັນ ຊຶ່ງກອງປະຊຸມເປັນກອງປະຊຸມທີ່ຄວາມສຳຄັນຫຼາຍ ໄດ້ມີໂອກາດແລກປ່ຽນບົດຮຽນ, ປະສົບການໃນການຈັດຕັ້ງປະຕິບັດວຽກງານທີ່ຜ່ານມາ ເຫັນວ່າມີອັນດີຫລາຍຢ່າງ, ໃຫ້ບັນດາທ່ານນຳເອົາເນື້ອໃນທີ່ນຳເອົາມາແລກປ່ຽນໃນຄັ້ງນີ້ ນຳໄປຜັນຂະຫຍາຍເຂົ້າໃນການຈັດຕັ້ງປະຕິບັດໜ້າທີ່ວຽກງານຕົວຈິງຂອງຕົນໃຫ້ໄດ້ຮັບຜົນສຳເລັດ ແລະ ເປັນເອກະພາບກັນໃນທຸກວຽກງານ.

ກອງປະຊຸມໃນຄັ້ງນີ້ ໄດ້ຮັບການສະໜັບສະໜູນທຶນຈາກໂຄງການສ້າງຄວາມເຂັ້ມແຂງໃຫ້ແກ່ ສະພາແຫ່ງຊາດ ແລະ ສະພາປະຊາຊົນຂັ້ນແຂວງ (STEPS).

ສະພາປະຊາຊົນແຂວງຊຽງຂວາງ

ຂ່າວໂດຍ: ບຸນສີ ສິດທິເດດ