ໃນຕອນເຊົ້າຂອງ ວັນທີ 05 ພະຈິກ 2024, ສະພາປະຊາຊົນ ນວ ໄດ້ດໍາເນີນກອງປະຊຸມສຳມະນາທາບທາມ ຮ່າງຂໍ້ຕົກລົງ ວ່າດ້ວຍກອງທຶນຄຸ້ມຄອງໄພພິບັດ ນະຄອນຫຼວງວຽງຈັນ. ໃຫ້ກຽດເຂົ້າຮ່ວມເປັນປະທານ ໂດຍທ່ານ ນາງ ລຳພອຍ ສີອັກຄະຈັນ, ກໍາມະການປະຈຳພັກ, ຮອງປະທານ ສະພາປະຊາຊົນ ນະຄອນຫຼວງວຽງຈັນ, ມີບັນດາທ່ານ ສະ ມາຊິກສະພາແຫ່ງຊາດ ປະຈຳເຂດເລືອກຕັ້ງທີ 1, ສະມາຊິກສະພາປະຊາຊົນ ນະຄອນຫຼວງວຽງຈັນ ແລະ ບັນດາທ່ານ ໃນຄະນະຮັບຜິດຊອບຮ່າງຂໍ້ຕົກລົງ ພ້ອມດ້ວຍຂະແໜງການກ່ຽວຂ້ອງ ເຂົ້າຮ່ວມ ຈຳນວນ 47 ທ່ານ, ຍິງ 14 ທ່ານ.
ຈຸດປະສົງໃນການສ້າງຮ່າງຂໍ້ຕົກລົງດັ່ງກ່າວ ແມ່ນເພື່ອຈັດຕັ້ງຜັນຂະຫຍາຍ ກົດໝາຍວ່າດ້ວຍການຄຸ້ມຄອງໄພ ພິບັດ ສະບັບເລກທີ 71/ສພຊ, ລົງວັນທີ 24 ມິຖຸນາ 2019; ດຳລັດວ່າດ້ວຍກອງທຶນຄຸ້ມຄອງໄພພິບັດ ສະບັບເລກທີ 631/ລບ, ລົງວັນທີ 24 ທັນວາ 2020 ແລະ ເພື່ອໃຫ້ມີນິຕິກຳເປັນບ່ອນອີງ ໃນການຈັດຕັ້ງປະຕິບັດວຽກງານປ້ອງກັນ ແລະ ຄຸ້ມຄອງໄພພິບັດ, ຮັບປະກັນໃຫ້ມີງົບປະມານຮັບໃຊ້ເຂົ້າໃນການປ້ອງກັນ ແລະ ຫຼຸດຜ່ອນຄວາມສ່ຽງຈາກໄພພິບັດ, ການປະຕິບັດການສຸກເສີນ ເພື່ອຊ່ວຍເຫຼືອບັນເທົາທຸກ ໃຫ້ແກ່ຜູ້ປະສົບໄພ. ເຊິ່ງຂໍ້ຕົກລົງສະບັບນີ້ ໄດ້ກໍານົດຫຼັກການ ແລະ ລະບຽບການ ກ່ຽວກັບການຄຸ້ມຄອງ ແລະ ການນຳໃຊ້ກອງທຶນຄຸ້ມຄອງໄພພິບັດ, ເພື່ອລະດົມທຶນ ແລະ ສະສົມທຶນຈາກທຸກພາກສ່ວນຕ່າງໆ ທັງພາຍໃນ ແລະ ຕ່າງປະເທດ ໃນການຊ່ວຍເຫຼືອບັນເທົາທຸກສຸກເສີນ, ການສ້ອມແປງໂຄງລ່າງພື້ນຖານ, ການຊອກຄົ້ນ-ຄົ້ນຫາ ແລະ ກູ້ໄພ ແນໃສ່ເຮັດໃຫ້ຊີວິດການເປັນຢູ່ຂອງປະຊາຊົນ ຜູ້ປະສົບໄພພິບັດ ໄດ້ກັບຄືນສູ່ສະພາບປົກກະຕິໂດຍໄວ.
ກອງປະຊຸມ, ໄດ້ຮັບຟັງການສະເໜີໂດຍຫຍໍ້ ຈາກ ທ່ານ ສາລະພິດ ສູນວໍລະວົງ ຫົວໜ້າຄະນະຮັບຜິດຊອບສ້າງຮ່າງຂໍ້ຕົກລົງ ກ່ຽວກັບເຫດຜົນ ແລະ ຄວາມຈຳເປັນ ໃນການສ້າງຮ່າງຂໍ້ຕົກລົງດັ່ງກ່າວ ພ້ອມທັງຂັ້ນຕອນການຮ່າງນິຕິກຳ, ເນື້ອໃນຂອງນິຕິກໍາ ແລະ ຄາດຄະເນຜົນໄດ້ຮັບພາຍຫຼັງການຮັບຮອງ. ຈາກນັ້ນ, ບັນດາທ່ານ ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ ກໍ່ໄດ້ປະກອບຄຳຄິດຄຳເຫັນຢ່າງມີຈຸດສຸມ ຕໍ່ໂຄງສ້າງ ແລະ ເນື້ອໃນ ຮ່າງຂໍ້ຕົກລົງດັ່ງກ່າວ ເພື່ອໃຫ້ຄະນະຮັບຜິດຊອບໄດ້ໄປຄົ້ນຄວ້າ, ປັບປຸງຄືນ ເພື່ອໃຫ້ມີເນື້ອໃນມີຄວາມສົມບູນຄົບຖ້ວນ ກ່ອນນຳເຂົ້າພິຈາລະນາໃນກອງປະຊຸມ ສະໄໝສາມັນ ເທື່ອທີ 8 ຂອງສະພາປະຊາຊົນ ນະຄອນຫຼວງວຽງຈັນ ຊຸດທີ II.
