ເພື່ອຊຸກຍູ້ໃຫ້ອົງການປົກຄອງຂັ້ນແຂວງໃນການຄົ້ນຄວ້າ ແລະ ຮັບປະກັນໃຫ້ແກ່ການສ້າງ, ການປັບປຸງ, ການຈັດຕັ້ງປະຕິບັດ, ການປະເມີນ ແລະ ການຕິດຕາມກວດກາການປະເມີນ ນິຕິກຳໃຕ້ກົດໝາຍ ຂອງອົງການລັດຂັ້ນແຂວງ, ຕາມພາລະບົດບາດ, ສິດ ແລະ ໜ້າທີ່ດ້ານນິຕິບັນຍັດ, ນິຕິກຳຂອງສະພາປະຊາຊົນຂັ້ນແຂວງ.
ໃນລະຫວ່າງວັນທີ 28-29 ທັນວາ 2023 ທີ່ເມືອງນາກາຍ, ແຂວງຄໍາມ່ວນ, ສະພາປະຊາຊົນແຂວງຄໍາມ່ວນ ໄດ້ຈັດກອງປະຊຸມສຳມະນາ ການສ້າງ, ການປັບປຸງ, ການຈັດຕັ້ງປະຕິບັດ, ການປະເມີນ ແລະ ການຕິດຕາມກວດກາການປະເມີນ ນິຕິກຳໃຕ້ກົດໝາຍ ຂອງອົງການລັດຂັ້ນແຂວງ, ໂດຍການເປັນປະທານຂອງ ບຸນມີ ພິມມະສອນ ປະທານສະພາປະຊາຊົນແຂວງຄໍາມ່ວນ, ເຂົ້າຮ່ວມມີຮອງປະທານສະພາປະຊາຊົນຂັ້ນແຂວງ, ບັນດາທ່ານ ຄະນະປະຈໍາສະພາປະຊາຊົນແຂວງ, ສະມາຊິກສະພາປະຊາຊົນຂັ້ນແຂວງປະຈໍາເຂດເລືອກຕັ້ງ 10 ຕົວເມືອງ, ບັນດາພະແນກການອ້ອມຂ້າງແຂວງ, ນັກວິທະຍາກອນຈາກສູນກາງ ແລະ ພະນັກງານເສນາທິການຊ່ວຍວຽກ ຂອງສະພາປະຊາຊົນແຂວງຄໍາມ່ວນເຂົ້າຮ່ວມທັງໝົດ 116 ທ່ານ, ຍິງ 43 ທ່ານ.
ກອງປະຊຸມ, ນັກສໍາມະນາກອນໄດ້ຮັບຟັງການເຜີຍແຜ່ກົດໝາຍ ວ່າດ້ວຍການສ້າງນິຕິກຳ ( ສະບັບປັບປຸງ ) ສະບັບເລກ 06/ສພຊ, ລົງວັນທີ 16 ພະຈິກ 2021; ຄູ່ມືການສ້າງນິຕິກຳໃຕ້ກົດໝາຍ; ການສ້າງບົດສະເໜີ ຮ່າງນິຕິກຳໃຕ້ກົດໝາຍ; ການສ້າງບົດປະເມີນຜົນກະທົບຮ່າງນິຕິກຳ; ການກວດກາຄວາມຖືກຕ້ອງ ຂອງຮ່າງນິຕິກຳໃຕ້ກົດໝາຍ; ຄໍາແນະນຳ ກ່ຽວກັບການສ້າງບົດວິພາກ ແລະ ຮ່າງນິຕິກຳ ຂອງກະຊວງພາຍໃນ ສະບັບເລກທີ 06/ພນ, ລົງວັນທີ 28 ຕຸລາ 2014 ແລະ ຄໍາແນະນຳ ກ່ຽວກັບການຈັດຕັ້ງປະຕິບັດດໍາລັດ ວ່າດ້ວຍເອກະສານທາງການ ສະບັບເລກທີ 02/ພນ, ລົງວັນທີ 05 ເມສາ 2016; ການຕິດຕາມກວດກາ ການປະເມີນຜົນການຈັດຕັ້ງປະຕິບັດນິຕິກຳໃຕ້ກົດໝາຍ; ການປະເມີນການຈັດຕັ້ງປະຕິບັດກົດໝາຍ ແລະ ນິຕິກຳໃຕ້ກົດໝາຍ; ເຜີຍແຜ່ມະຕິກອງປະຊຸມ ສະພາປະຊາຊົນແຂວງ ສະບັບເລກທີ 53, 54, 55/ສພຂ.ຄມ, ລົງວັນທີ 26 ຕຸລາ 2023 ວ່າດ້ວຍການຮັບຮອງເອົານິຕິກຳໃຕ້ກົດໝາຍ ຈໍານວນ 3 ສະບັບ; ຈາກນັ້ນ, ກອງປະຊຸມໄດ້ມີການຄົ້ນຄວ້າແລກປ່ຽນ, ບົດຮຽນເຊິ່ງກັນ ແລະກັນ ໃຫ້ມີເນື້ອໃນທີ່ໜັກແໜ້ນ, ພ້ອມກັນຍົກສູງຄວາມຮັບຜິດຊອບໂດຍສຸມໃສ່ການຕັ້ງຄໍາຖາມສົນທະນາແລກປ່ຽນແຕ່ລະຫົວຂໍ້ ອັນໄດ້ເຮັດໃຫ້ເຂົ້າສູ່ລວງເລິກ ແລະ ມີໝາກຜົນຫຼາຍຂຶ້ນ.
ໂອກາດດັ່ງກ່າວ, ທ່ານປະທານສະພາປະຊາຊົນແຂວງຄໍາມ່ວນ ໄດ້ມີຄຳເຫັນວ່າ: ກອງປະຊຸມສຳມະນາຄັ້ງນີ້ແມ່ນການຖ່າຍທອດທັກສະຄວາມຮູ້, ຄວາມສາມາດປະສົບໃນດ້ານຕ່າງໆຂອງບັນດາທ່ານວິທະຍາກອນ ຈາກກະຊວງຍຸຕິທຳ, ກະຊວງພາຍໃນ, ສະພາແຫ່ງຊາດ; ພ້ອມຍັງໄດ້ເນັ້ນໃຫ້ຮູ້ຕື່ມອີກວ່າ: ເພື່ອເຮັດໃຫ້ການສ້າງ, ປັບປຸງນິຕິກຳໃຕ້ກົດໝາຍຜັນຂະຫຍາຍເນື້ອໃນຈິດໃຈຕາມແຜນທີ່ວ່າງໄວ້, ເຊື່ອໝັ້ນວ່າ ບັນດາທ່ານທີ່ເຂົ້າຮ່ວມຈະນໍາເອົາເນື້ອໃນ ແລະ ບົດຮຽນໃນການຄັ້ງນີ້ ໄປຈັດຕັ້ງຜັນຂະຫຍາຍ ແລະ ປະຕິບັດໃຫ້ມີຜົນເປັນຮູບປະທໍາໃນວຽກງານຕົວຈິງ ແລະ ເປັນປະໂຫຍດສູງສຸດ.ພ້ອມນັ້ນໂອກາດດຽວກັນ ທ່ານ ຍັງໄດ້ສະແດງຄວາມຊົມເຊີຍ ແລະ ຂອບໃຈຕໍ່ຜູ້ໃຫ້ທຶນຈັດກອງປະຊຸມສຳມະນາໃນເທື່ອນີ້ ເຊິ່ງໄດ້ຮັບການສະໜັບສະໜູນໂດຍ: ມູນລະນິທິເອເຊຍ ( TAF )
ໂດຍ: ເອື້ອ ມະໂນສິງ