ກອງປະຊຸມສະໄຫມສາມັນ ເທື່ອທີ 4 ຂອງສະພາປະຊາຊົນ ແຂວງຫົວພັນ ຊຸດທີ II ໄດ້ອັດລົງດ້ວຍຜົນສຳເລັດອັນຈົບງາມ ໃນຕອນແລງ ວັນທີ 17 ກຸມພາ 2023 ພາຍຫຼັງທີ່ ດໍາເນີນມາເປັນເວລາ 3 ວັນເຕັມ. ພາຍໃຕ້ການເປັນປະທານຂອງທ່ານ ນາງ ອຳໄພວອນ ລ້ອມບຸນແພງ ກຳມະການສຳຮອງສູນກາງພັກ, ຮອງເລຂາພັກແຂວງ, ປະທານສະພາປະຊາຊົນ ແຂວງຫົວພັນ. ເປັນກຽດເຂົ້າຮ່ວມຂອງ ທ່ານວັນໄຊ ແພງຊຸມມາກຳມະການສູນກາງພັກ, ເລຂາພັກແຂວງ, ເຈົ້າແຂວງຫົວພັນ,  ມີບັນດາທ່ານ ຄະນະປະຈຳພັກແຂວງ, ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 8 ແຂວງຫົວພັນ, ສະມາຊິກສະພາປະຊາຊົນແຂວງ, ອາດີດຄະນະປະຈໍາພັກແຂວງ, ອາດີດສະມາຊິກສະພາແຫ່ງຊາດ ເຂດເລືອກຕັ້ງທີ 8 ຜູ້ຕາງໜ້າອົງການຈັດຕັ້ງພັກ-ລັດ, ອົງການແນວລາວສ້າງຊາດ, ສະຫະພັນນັກຮົບເກົ່າ ອົງການຈັດຕັ້ງມະຫາຊົນ, ພະແນກການ, ອົງການທຽບເທົ່າ, ສອງກອງບັນຊາການ ແລະພາກສ່ວນທຸລະກິດຕ່າງໆເຂົ້າຮ່ວມນຳ. ເຊິ່ງກອງປະຊຸມໄດ້ເສີມຂະຫຍາຍສິດປະຊາທິປະໄຕຂອງບັນດາທ່ານສະມາຊິກສະພາປະຊາຊົນແຂວງໃນການພິຈາລະນາ ແລະ ຮັບຮອງເອົາບັນດາເນື້ອໃນສໍາຄັນທີ່ມາພິຈາລະນາໃນກອງປະຊຸມ ມີດັ່ງນີ້:

1. ກອງປະຊຸມໄດ້ພິຈາລະນາ, ຮັບຮອງກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແລະ ແຜນງົບປະມານປີ 2022 ແລະທິດທາງແຜນການປີ 2023 ຂອງອົງການປົກຄອງແຂວງ;
2. ໄດ້ຮັບຟັງການລາຍງານ ການຈັດຕັ້ງປະຕິບັດ ສອງວາລະແຫ່ງຊາດ ຢູ່ແຂວງຫົວພັນປີ 2022ແລະ ທິດທາງແຜນການ ປີ 2023;
3. ພິຈາລະນາ, ຮັບຮອງເອົາ ການເຄື່ອນໄຫວວຽກງານ ຂອງອົງການກວດສອບພາກເໜືອປີ 2022 ແລະ ທິດທາງແຜນການປີ 2023 ຜົນການກວດສອບບົດສະຫຼຸບຂາດຕົວ ການຈັດຕັ້ງປະຕິບັດແຜນງົບປະມານຂອງແຂວງຫົວພັນ ປີ 2021;
4. ພິຈາລະນາ, ຮັບຮອງເອົາ ຜົນຂອງການກວດກາ ຂອງອົງການກວດກາລັດແຂວງປີ 2022 ແລະ ທິດທາງແຜນການ ປີ 2023;
5. ພິຈາລະນາ, ຮັບຮອງເອົາຂໍ້ຕົກລົງ ຂອງທ່ານ ເຈົ້າແຂວງ ວ່າດ້ວຍກອງທຶນ ຄວບຄຸມ – ສະກັດກັ້ນ ແລະ ຕ້ານຢາເສບຕິດຂອງແຂວງຫົວພັນ.
6. ພິຈາລະນາ, ຮັບຮອງເອົາການເຄື່ອນໄຫວວຽກງານຂອງອົງການໄອຍະການປະຊາຊົນ ແລະ ສານປະຊາຊົນ ແຂວງຫົວພັນປີ 2022 ແລະ ທິດທາງແຜນການປີ 2023;
7. ພິຈາລະນາ, ຮັບຮອງເອົາການເຄື່ອນໄຫວວຽກງານ ຂອງສະພາປະຊາຊົນແຂວງປີ 2022 ແລະທິດທາງແຜນການປີ 2023;

ນອກຈາກນີ້ ກອງປະຊຸມຍັງໄດ້ຮັບຟັງການຊີ້ແຈງຕໍ່ຄໍາເຫັນ, ຄໍາຊັກຖາມ ຂອງສະມາຊິກສະພາກແຫ່ງຊາດ ແລະ ສະມາຊິກສະພາປະຊາຊົນແຂວງ  ກໍ່ຄືຄຳຄິດຄຳເຫັນ ຂອງປະຊາຊົນບັນດາເຜົ່າໃນທົ່ວແຂວງ  ມີຄວາມສົນໃຈ ຈາກທ່ານເຈົ້າແຂວງ, ບັນດາພະແນກການກ່ຽວ ຂ້ອງ ຂອງແຂວງ ,ຫົວໜ້າອົງການໄອຍະການປະຊາຊົນແຂວງ ແລະ ສານປະຊາຊົນແຂວງ

ກອງປະຊຸມ ສະໄໝສາມັນ ເທື່ອທີ 4 ຂອງສະພາປະຊາຊົນແຂວງ ຊຸດທີ II ໄດ້ຮັບຜົນສໍາເລັດຢ່າງຈົບງາມ ກໍ່ຍ້ອນການຊີ້ນໍາຢ່າງໃກ້ສິດ ຂອງຄະນະປະຈໍາພັກແຂວງ ແລະ ຄວາມຮັບຜິດຊອບ ຂອງອົງການປົກຄອງແຂວງ, ອົງການໄອຍະການປະຊາຊົນແຂວງ, ສານປະຊາຊົນແຂວງ, ແລະ ພາກສ່ວນທີ່ກ່ຽວຂ້ອງ. ທີ່ໄດ້ສະໜອງຂໍ້ມູນ, ເອກະສານ ບົດລາຍງານທີ່ມີເນື້ອໃນສຳຄັນ ໃຫ້ແກ່ສະພາປະຊາຊົນແຂວງໄດ້ຄົ້ນຄວ້າ ແລະ ປະກອບຄວາມເຫັນຢ່າງເລິກເຊິ່ງ ແລະ ກ້າວໄປເຖີງການພິຈາລະນາຮັບຮອງເອົາ.

ກອງປະຊຸມໄດ້ສະແດງຄວາມຂອບໃຈຢ່າງສູງມາຍັງບັນດາທ່ານ ການນຳຂອງແຂວງ, ບັນດາທ່ານແຂກທີ່ມີກຽດ ທີ່ໄດ້ໃຫ້ການຕິດຕາມຢ່າງໃກ້ສິດ ແລະ ເຂົ້າຮ່ວມກອງປະຊຸມໃນຄັ້ງນີ້, ສະແດງຄວາມຂອບໃຈ ພໍ່ແມ່ປະຊາຊົນບັນດາເຜົ່າທົ່ວແຂວງຫົວພັນ  ທີ່ໄດ້ເອົາໃຈໃສ່ຕິດຕາມ ແລະ ສົ່ງຄວາມຄິດເຫັນທີ່ເປັນປະໂຫຍດໂດຍຜ່ານໂທລະສັບສາຍດ່ວນ ແລະ ຈາກສື່ຕ່າງໆມາຍັງກອງປະຊຸມ ເຊິ່ງຄວາມຄິດ, ຄວາມເຫັນດັ່ງກ່າວ, ຄະນະປະຈຳສະພາປະຊາຊົນແຂວງ ຈະສືບຕໍ່ປະສານສົມທົບກັບອົງການປົກຄອງແຂວງ ພາກສ່ວນທີ່ກ່ຽວຂ້ອງ ຄົ້ນຄວ້າ, ພິຈາລະນາແກ້ໄຂຕາມຄວາມເໝາະສົມ, ຂໍສະແດງຄວາມຂອບໃຈກຳລັງປ້ອງກັນຊາດ, ປ້ອງກັນຄວາມສະຫງົບ, ສື່ມວນຊົນ, ແພດໝໍ ແລະ ພາກສ່ວນກ່ຽວຂ້ອງ ໄດ້ພ້ອມກັນປະຕິບັດໜ້າທີ່ ຂອງຕົນດ້ວຍຄວາມຮັບຜິດຊອບສູງ ປະກອບສ່ວນເຮັດໃຫ້ກອງປະຊຸມຄັ້ງນີ້ມີຄວາມສະຫງົບປອດໄພ ແລະ ຜົນສຳເລັດຢ່າງຈົບງາມ.

ຜົນສຳເລັດຂອງກອງປະຊຸມຄັ້ງນີ້, ຖືເປັນໝາກຜົນແຫ່ງການເສີມຂະຫຍາຍສະຕິປັນຍາລວມໝູ່ໃນອົງການອຳນາດລັດຂັ້ນແຂວງພວກເຮົາກໍ່ຄືການຍົກສູງຄວາມຮັບຜິດຊອບຄວາມເປັນເຈົ້າການຂອງບັນດາທ່ານສະມາຊິກສະພາປະຊາຊົນແຂວງເຂົ້າໃນການຄົ້ນຄວ້າແລະພິຈາລະນາຮັບຮອງເອົາແຕ່ລະເນື້ອໃນສຳຄັນທີ່ນຳມາພິຈາລະນາໃນກອງປະຊຸມຄັ້ງນີ້ບົນພື້ນຖານຍຶດໝັ້ນຕໍ່ສິດ ແລະ ຜົນປະໂຫຍດລວມຂອງແຂວງ ແລະ ຂອງປະຊາຊົນບັນດາເຜົ່າໃນທົ່ວ ແຂວງຫົວພັນ.