ກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງຄໍາມ່ວນ ຊຸດທີ II ໄຂຂຶ້ນຢ່າງເປັນທາງການ ໃນຕອນເຊົ້າຂອງວັນພຸດ ວັນທີ 24 ກໍລະກົດ 2024 ທີ່ສະໂມສອນ 21 ມີນາ ຂອງແຂວງ (ຫຼັກ 4) ໂດຍການເປັນປະທານຂອງທ່ານ ບຸນມີ ພິມມະສອນ ປະທານສະພາປະຊາຊົນແຂວງຄໍາມ່ວນ, ເປັນກຽດເຂົ້າຮ່ວມມີ ທ່ານ ຄໍາໃບ ດຳລັດ ຮອງປະທານສະພາແຫ່ງຊາດ ທັງເປັນສະມາຊິກສະພາແຫ່ງຊາດປະຈຳເຂດເລືອກຕັ້ງທີ 12 ແຂວງຄໍາມ່ວນ, ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ, ມີບັນດາຄະນະປະຈຳພັກແຂວງ, ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 12 ແຂວງຄໍາມ່ວນ, ສະມາຊິກສະພາປະຊາຊົນຂັ້ນແຂວງ, ຫົວໜ້າພະແນກການ, ເຈົ້າເມືອງ, ມີບັນດາທ່ານ ອາດີດການນໍາຂັ້ນສູງຂອງແຂວງ ແລະ ແຂກຖືກເຊີນເຂົ້າຮ່ວມ.

   ກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງຄໍາມ່ວນ ຊຸດທີ II ຄັ້ງນີ້: ຈະໄດ້ຄົ້ນຄວ້າ, ພິຈາລະນາ ແລະ ຮັບຮອງເອົາ ບັນຫາສຳຄັນພື້ນຖານ ຂອງແຂວງຄໍາມ່ວນ ດັ່ງນີ້:

1. ບົດລາຍງານ ຂອງເຈົ້າແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ຂອງແຂວງ ປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024;

2. ບົດລາຍງານ ຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດຄາດໝາຍວຽກພັດທະນາຊົນນະບົດ ແລະ ແກ້ໄຂຄວາມທຸກຍາກ ຂອງແຂວງຄໍາມ່ວນໄລຍະແຕ່ປິ 2021 ຫາ 2023, ການຈັດຕັ້ງປະຕິບັດວຽກງານດັ່ງກ່າວ ປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024;

3. ບົດລາຍງານ ຂອງອົງການປົກຄອງແຂວງ ກ່ຽວກັບການປະເມີນຜົນການຈັດຕັ້ງປະຕິບັດ ຂໍ້ຕົກລົງ ຂອງເຈົ້າແຂວງ ວ່າດ້ວຍການຄຸ້ມຄອງນໍາໃຊ້ ທີ່ດິນກະສິກໍາຢູ່ແຂວງຄໍາມ່ວນ ສະບັບເລກທີ 333/ຈຂ.ຄມ, ລົງວັນທີ 03 ມີນາ 2020;

4. ບົດລາຍງານ ຂອງຄະນະປະຈໍາສະພາປະຊາຊົນຂັ້ນແຂວງ ກ່ຽວກັບການຈັດຕັ້ງປະຕິບັດແຜນການ ເຄື່ອນໄຫວວຽກງານ ຂອງສະພາປະຊາຊົນຂັ້ນແຂວງ ໃນໄລຍະແຕ່ກອງປະຊຸມສະໄໝສາມັນເທື່ອທີ 6 ຫາກອງປະຊຸມສະໄໝສາມັນເທື່ອທີ 7 ແລະ ແຜນການເຄື່ອນໄຫວວຽກງານໄລຍະແຕ່ກອງປະຊຸມສະໄໝສາມັນເທື່ອທີ 7 ຫາກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງຄຳມ່ວນ ຊຸດທີ II;

     ພ້ອມນັ້ນ ຍັງຈະມີການຊີ້ແຈງຈາກພາກສ່ວນຕ່າງໆທີ່ກ່ຽວຂ້ອງ ຕາມຫົວຂໍ້ສະເພາະ ຫຼື ຄໍາຊັກຖາມ ທີ່ຄະນະປະຈໍາສະພາປະຊາຊົນຂັ້ນແຂວງ ໄດ້ຕັ້ງຂື້ນ, ບັນດາພາກສ່ວນຕ່າງໆ ນອກຈາກໄດ້ຊີ້ແຈງຕາມຫົວຂໍ້ສະເພາະແລ້ວ ຍັງຈະໄດ້ຊີ້ແຈງ ຕາມການປະກອບຄຳເຫັນ ຂອງສະມາຊິກສະພາປະຊາຊົນຂັ້ນແຂວງ ທີ່ໄດ້ຍົກຂື້ນໃນວາລະດໍາເນີນກອງປະຊຸມຕື່ມອີກ.

ກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງຄໍາມ່ວນ ຊຸດທີ II ຈະດໍາເນີນໄປໃນລະຫວ່າງວັນທີ 24 ຫາ ວັນທີ 26 ກໍລະກົດ 2024 ເປັນເວລາ 2 ວັນເຄິ່ງ ຈຶ່ງຈະສໍາເລັດ. ທ່ານສາມາດສົ່ງຄໍາຄິດຄໍາເຫັນ ກ່ຽວກັບການດໍາເນີນກອງປະຊຸມ ຜ່ານໂທລະສັບສາຍດ່ວນ 051 156 (ໂດຍບໍ່ເສຍຄ່າ)

ໂດຍ: ເອື້ອ ມະໂນສິງ