ຕອນເຊົ້າ ຂອງວັນທີ 2 ມັງກອນ2024 ກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນ ແຂວງຫົວພັນຊຸດທີ II ໄດ້ໄຂຂຶ້ນຢ່າງເປັນທາງການ ທີ່ຫ້ອງປະຊຸມ ຂອງສະພາປະຊາຊົນ ແຂວງຫົວພັນ ພາຍໃຕ້ການເປັນປະທານຂອງທ່ານນາງ ອຳໄພວອນ ລ້ອມບຸນແພງ ກຳມະການສຳຮອງສູນກາງພັກ, ຮອງເລຂາພັກແຂວງ, ປະທານສະພາປະຊາຊົນ ແຂວງຫົວພັນ ເປັນກຽດເຂົ້າຮ່ວມໂດຍ ທ່ານ ຄຳແພງ ໄຊສົມແພງ ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງຫົວພັນ; ມີທ່ານ ຄຳແພງ ວິລະພັນ ກຳມະການ ຄະນະປະຈຳສະພາແຫ່ງຊາດ,ປະທານກຳມາທິການຍຸຕິທຳສະພາແຫ່ງຊາດ; ບັນດາທ່ານຄະນະປະຈຳພັກແຂວງ; ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 8 ແຂວງຫົວພັນ; ສະມາຊິກສະພາປະຊາຊົນແຂວງ ຊຸດທີ II; ອາດີດການນຳຂັ້ນແຂວງ, ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 8, ສະມາຊິກສະພາປະຊາຊົນແຂວງ ຊຸດທີ I, ຜູ້ຕາງໜ້າອົງການແນວລາວສ້າງຊາດ;ອົງການຈັດຕັ້ງມະຫາຊົນ ແລະ ພະແນກການອ້ອມຂ້າງແຂວງ;ອົງການທຽບເທົ່າ; ສອງກອງບັນຊາການ ແລະ ພາກສ່ວນທຸລະກິດ ເຂົ້າຮ່ວມຢ່າງພ້ອມພຽງ.

               ວາລະກອງປະຊຸມ ທ່ານ ນາງ ອຳໄພວອນ ລ້ອມບຸນແພງ ກຳມະການສຳຮອງສູນກາງພັກ, ຮອງເລຂາພັກແຂວງ, ປະທານສະພາປະຊາຊົນແຂວງ ໃນນາມປະທານກອງປະຊຸມ ເປັນກຽດກ່າວເປີດກອງປະຊຸມຢ່າງເປັນທາງການ. ຊຶ່ງເນື້ອໃນບົດສູນທອນພົດກ່າວໄຂກອງປະຊຸມ ຂອງທ່ານປະທານບາງຕອນໄດ້ກ່າວວ່າ: ໃນທາມກາງບັນຍາກາດທີ່ທົ່ວພັກ-ທົ່ວລັດ, ທົ່ວກຳລັງປະກອບອາວຸດ ແລະ ທົ່ວປວງຊົນບັນດາເຜົ່າເວົ້າລວມ; ເວົ້າສະເພາະທົ່ວແຂວງຫົວພັນ, ພວມຈັດຕັ້ງຜັນຂະຫຍາຍມະຕິ XI ຂອງພັກ, ມະຕິ X ຂອງອົງຄະນະພັກແຂວງຫົວພັນ, ແຜນພັດທະນາເສດຖະກິດ-ສັງຄົມຂອງແຂວງ 5 ປີຄັ້ງທີ IX ກໍຄືບັນດາມະຕິກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນແຂວງຫົວພັນ ຊຸດທີ II ໂດຍສະເພາະແມ່ນແຜນພັດທະນາເສດຖະກິດ-ສັງຄົມ ຂອງແຂວງ ປະຈຳປີ 2023, ຜົນສຳເລັດກອງປະຊຸມສະໄໝສາມັນ ເທື່ອທີ 6ຂອງສະພາແຫ່ງຊາດ ຊຸດທີ IX ຕິດພັດກັບການສະຫລຸບ ການຈັດຕັ້ງປະຕິບັດສອງວາລະແຫ່ງຊາດຢ່າງເປັນຂະບວນການຟົດຟື້ນ, ແຂງແຮງ ແລະ ເປັນຮູບປະທຳ.

             ການເຄື່ອນໄຫວຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ຂອງສະພາປະຊາຊົນແຂວງ ໃນໄລຍະ ປີ2023 ຜ່ານມາ ແມ່ນຢູ່ໃນສະພາບຂອງພາກພື້ນ ແລະ ສາກົນທີ່ມີການຜັນແປໄປຢ່າງສະຫຼັບຊັບຊ້ອນທີ່ຄາດຄະເນໄດ້ຍາກເຊິ່ງໄດ້ສົ່ງຜົນກະທົບໂດຍກົງຕໍ່ປະເທດລາວເວົ້າລວມ, ເວົ້າສະເພາະ ແຂວງຫົວພັນ ຂອງພວກເຮົາ ບວກກັບຄວາມຫຍຸ້ງຍາກທາງດ້ານເສດຖະກິດ-ການເງິນ ຂອງປະເທດ ກໍຄື ຂອງແຂວງ ການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍພົບຫຼາຍສິ່ງທ້າທາຍອັນໃໝ່ ຊຶ່ງສົ່ງຜົນກະທົບຕໍ່ຊີວິດການເປັນຢູ່ ຂອງພະນັກງານ-ລັດຖະກອນ, ທະຫານ, ຕຳຫຼວດ ແລະ ປະຊາຊົນບັນດາເຜົ່າມີຄວາມຝືດເຄືອງ ແລະ ພົບກັບບັນຫາຄວາມຫຍຸ້ງຍາກຫຼາຍຢ່າງ. ແຕ່ດ້ວຍຄວາມເອົາໃຈໃສ່ນຳພາ-ຊີ້ນໍາ ຂອງຄະນະບໍລິຫານງານພັກແຂວງ ຊຸດທີ X, ການເຮັດວຽກຮ່ວມກັນຢ່າງໃກ້ສິດ ແລະ ເປັນເອກະພາບ ລະຫວ່າງ ສະພາປະຊາຊົນແຂວງ ກັບອົງການປົກຄອງແຂວງ ແລະດ້ວຍການເສີມຂະຫຍາຍຄວາມຮັບຜິດຊອບຕໍ່ໜ້າທີ່ການເມືອງຂອງຄະນະພັກ, ອົງການອຳນາດລັດແຕ່ລະຂັ້ນກໍ່ຄືການເສີມຂະຫຍາຍຄວາມເປັນເຈົ້າການຫົວຄິດປະດິດສ້າງຂອງປະຊາຊົນໃນແຕ່ລະທ້ອງຖິ່ນຕາມທ່າແຮງບົ່ມຊ້ອນຕົວຈິງທີ່ມີ ແລະການສະໜັບສະໜູນ, ການຊ່ວຍເຫຼືອຈາກອົງການຈັດຕັ້ງພັກ-ລັດ, ແນວລາວສ້າງຊາດ, ສະຫະພັນນັກຮົບເກົ່າ, ອົງການຈັດຕັ້ງທາງສັງຄົມທຸກຂັ້ນ,ການຊ່ວຍເຫຼືອຈາກແຂວງແຮກສ່ຽວ ສສ ຫວຽດນາມແລະອົງການຈັດຕັ້ງສາກົນໄດ້ເຮັດໃຫ້ການພັດທະນາເສດຖະກິດ-ສັງຄົມ ສາມາດບັນລຸໄດ້ຕາມແຜນການ ທັງເປັນການປະກອບສ່ວນອັນສຳຄັນ ເຮັດໃຫ້ແຂວງຫົວພັນ ຂອງພວກເຮົາສືບຕໍ່ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ, ເປັນລະບຽບຮຽບຮ້ອຍ ໂດຍພື້ນຖານ, ຊີວິດການເປັນຢູ່ຂອງປະຊາຊົນ ໄດ້ຮັບການພັດທະນາ ດີຂຶ້ນເປັນກ້າວໆ.

ກອງປະຊຸມສະໄໝສາມັນ ເທື່ອທີ່ 6 ຂອງສະພາປະຊາຊົນ ແຂວງຫົວພັນ ຊຸດທີ II ຈະໄດ້ຮັບຟັງການລາຍງານແລະ ພິຈາລະນາຮັບຮອງເອົາບັນຫາສຳຄັນພື້ນຖານຂອງແຂວງດັ່ງນີ້:

1) ບົດລາຍງານ ຂອງເຈົ້າແຂວງ ກ່ຽວກັບການເຄື່ອນໄຫວວຽກງານ ທີ່ພົ້ນເດັ່ນ ປະຈຳປີ 2023 ແລະ ທິດທາງວຽກງານຈຸດສຸມ ປະຈຳປີ 2024 ຂອງແຂວງຫົວພັນ;

2) ບົດລາຍງານ ກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ປະຈຳປີ 2023 ແລະ ທິດທາງແຜນການ ປະຈຳປີ 2024 ຂອງແຂວງຫົວພັນ;

3) ບົດລາຍງານ ການຈັດຕັ້ງປະຕິບັດ ແຜນງົບປະມານແຫ່ງລັດຂອງແຂວງ ປະຈຳປີ 2023 ແລະ ທິດທາງແຜນການ ປະຈຳປີ 2024ຂອງແຂວງຫົວພັນ;

4) ບົດລາຍງານ ກ່ຽວກັບການຈັດຕັ້ງປະຕິບັດ ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ໄລຍະ 3 ປີຜ່ານມາ ( 2021-2023 )ຢູ່ແຂວງຫົວພັນ;

5) ບົດລາຍງານ ການຈັດຕັ້ງປະຕິບັດ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດໄລຍະ 3 ປີ ຜ່ານມາ ( 2021-2023 ) ຢູ່ແຂວງຫົວພັນ.

6) ບົດລາຍງານ ການຈັດຕັ້ງປະຕິບັດ ໃນການຄົ້ນຄວ້າຕັ້ງຊື່ຖະໜົນຫົນຕ່າງໆ ພາຍໃນເທດສະບານເມືອງຊໍາເໜືອ ແຂວງຫົວພັນ.

7) ບົດສະຫຼຸບ ການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈຳປີ 2023, ທິດທາງແຜນການ ເຄື່ອນໄຫວວຽກງານ ປະຈຳປີ 2024 ຂອງອົງການກວດສອບປະຈຳພາກເໜືອ ແລະ ບົດລາຍງານຜົນການກວດສອບ ບົດສະຫຼຸບຂາດຕົວ ການຈັດຕັ້ງປະຕິບັດແຜນງົບປະມານແຫ່ງລັດ ປະຈຳປີ 2022 ຂອງແຂວງຫົວພັນ.

8) ບົດລາຍງານ ການຈັດຕັ້ງເຄື່ອນໄຫວວຽກງານ ປະຈຳປີ 2023 ແລະ ທິດທາງແຜນການປະຈຳປີ 2024 ຂອງອົງການກວດກາລັດ ແລະ ຕ້ານການສໍ້ລາດບັງຫຼວງ ຂອງແຂວງຫົວພັນ.

9) ບົດລາຍງານ ການຈັດຕັ້ງປະຕິບັດວຽກງານ ປະຈຳປີ 2023 ແລະ ທິດທາງແຜນການ ປະຈໍາປີ 2024 ຂອງອົງການໄອຍະການປະຊາຊົນ ແຂວງຫົວພັນ;

10) ບົດລາຍງານ ການຈັດຕັ້ງປະຕິບັດວຽກງານ ປະຈຳປີ 2023 ແລະ ທິດທາງແຜນການ ປະຈໍາປີ 2024 ຂອງສານປະຊາຊົນ ແຂວງຫົວພັນ;

11) ບົດລາຍງານ ການເຄື່ອນໄຫວວຽກງານ ປະຈຳປີ 2023 ແລະ ທິດທາງແຜນການ ປະຈໍາປີ 2024 ຂອງສະພາປະຊາຊົນ ແຂວງຫົວພັນ;

12) ບົດປະກອບຄຳເຫັນຂອງແນວລາວສ້າງຊາດ ຕາງໜ້າສະຫະພັນນັກຮົບເກົ່າ ແລະ ອົງການຈັດຕັ້ງມະຫາຊົນ ຕໍ່ກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນແຂວງ ຊຸດທີ II.

                        ນອກຈາກນີ້;ກອງປະຊຸມຈະໄດ້ຮັບຟັງການອະທິບາຍ, ຊີ້ແຈງ ແລະ ຕອບຄຳຊັກຖາມຂອງບັນດາທ່ານສະມາຊິກສະພາປະຊາຊົນແຂວງ ແລະ ພາກສ່ວນກ່ຽວຂ້ອງຈຳນວນໜຶ່ງ ກ່ຽວກັບວຽກງານຕ່າງໆຂອງອົງການປົກຄອງແຂວງ, ອົງການໄອຍະການປະຊາຊົນ ແລະ ສານປະຊາຊົນແຂວງຫົວພັນ.

ກອງປະຊຸມສະໄໝສາມັນ ເທື່ອທີ່ 6 ຂອງສະພາປະຊາຊົນແຂວງຫົວພັນ ຊຸດທີII ຄັ້ງນີ້ ຈະໄດ້ດຳເນີນເປັນເວລາ 3 ວັນເຕັມ ນັບແຕ່ ວັນທີ2-4 ມັງກອນ2024ຈຶ່ງສໍາເລັດ.

ພາບ: ເວີນ ແກ້ວບຸນມີ

ຂ່າວ: ນາງ ປຸ້ຍນິຕາ ເພັງມີໄຊ.