ກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນແຂວງຄໍາມ່ວນ ຊຸດທີ II ໄຂຂຶ້ນຢ່າງເປັນທາງການ ໃນຕອນເຊົ້າວັນທີ 22 ສິງຫາ 2023 ທີ່ສະໂມສອນ 21 ມີນາ ຂອງແຂວງ (ຫຼັກ 4) , ໂດຍການເປັນປະທານຂອງທ່ານ ບຸນມີ ພິມມະສອນ ປະທານສະພາປະຊາຊົນແຂວງຄໍາມ່ວນ, ເປັນກຽດເຂົ້າຮ່ວມມີ ທ່ານ ຄໍາໃບ ດຳລັດ ຮອງປະທານຄະນະປະຈໍາສະພາແຫ່ງຊາດ ທັງເປັນສະມາຊິກສະພາແຫ່ງຊາດປະຈຳເຂດເລືອກຕັ້ງທີ 12 ແຂວງຄໍາມ່ວນ, ທ່ານ ວັນໄຊ ພອງສະຫັວນ ເຈົ້າແຂວງໆຄໍາມ່ວນ; ມີບັນດາຄະນະປະຈຳພັກແຂວງ, ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 12 ແຂວງຄໍາມ່ວນ, ສະມາຊິກສະພາປະຊາຊົນຂັ້ນແຂວງ, ຫົວໜ້າພະແນກການ, ເຈົ້າເມືອງ, ມີບັນດາທ່ານ ອາດີດການນໍາຂັ້ນສູງຂອງແຂວງ ແລະ ແຂກຖືກເຊີນ.

   

     ກອງປະຊຸມໄດ້ຮັບຟັງບົດສູນທອນພົດ ເປີດກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນແຂວງຄໍາມ່ວນ ຊຸດທີ II ຈາກທ່ານ ປະທານສະພາປະຊາຊົນແຂວງ ໄດ້ໄຂຂຶ້ນຢ່າງເປັນທາງການໃນທ່າມກາງບັນຍາກາດທີ່ທົ່ວພັກ-ລັດ, ທົ່ວກໍາລັງປະກອບອາວຸດ ແລະທົ່ວປວງຊົນລາວທັງຊາດ ເວົ້າລວມ, ເວົ້າສະເພາະປະຊາຊົນບັນດາເຜົ່າຊາວແຂວງຄຳມ່ວນ ພວມສຸມໃສ່ຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ຄັ້ງທີ XI ຂອງພັກ, ມະຕິກອງປະຊຸມຄົບຄະນະ ຄັ້ງທີ 6 ຂອງຄະນະບໍລິຫານສູນກາງພັກ ສະໄໝທີ XI ກໍຄື ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX, ມະຕິກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກແຂວງຄຳມ່ວນ ສະໄໝ X, ມະຕິກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນແຂວງຄຳມ່ວນ;        ກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງຄໍາມ່ວນ ຊຸດທີ II ຈະໄດ້ພິຈາລະນາ ແລະ ຮັບຮອງເອົາບັນຫາສຳຄັນພື້ນຖານ ຂອງແຂວງ ດັ່ງນີ້:

1. ບົດລາຍງານ ຂອງທ່ານ ເຈົ້າແຂວງ ກ່ຽວກັບສະພາບພົ້ນເດັ່ນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດຂອງແຂວງ ໄລຍະກາງສະໄໝ ຂອງແຜນການ 5 ປີ (2021-2025), ທິດທາງແຜນການທ້າຍສະໄໝ ແລະ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດຂອງແຂວງ ປະຈໍາ 6 ເດືອນຕົ້ນປີ, ທິດທາງແຜນການ ປະຈໍາ 6 ເດືອນທ້າຍປີ 2023;
2. ບົດລາຍງານ ຂອງພະແນກແຜນການ ແລະ ການລົງທຶນແຂວງ ກ່ຽວກັບການການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງແຂວງ ໄລຍະກາງສະໄໝ ຂອງແຜນການ 5 ປີ (2021-2025), ທິດທາງແຜນການທ້າຍສະໄໝ ແລະ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈໍາ 6 ເດືອນຕົ້ນປີ, ທິດທາງແຜນການ ປະຈໍາ 6 ເດືອນທ້າຍປີ 2023;
3. ບົດລາຍງານ ຂອງພະແນການເງິນແຂວງ ກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດຂອງແຂວງ ໄລຍະກາງສະໄໝ ຂອງແຜນການ 5 ປີ (2021-2025), ທິດທາງແຜນການ ທ້າຍສະໄໝ ແລະ ການຈັດຕັ້ງປະຕິບັດແຜນງົບປະມານແຫ່ງລັດຂອງແຂວງ ປະຈໍາ 6 ເດືອນຕົ້ນປີ, ທິດທາງແຜນການ ປະຈໍາ 6 ເດືອນທ້າຍປີ 2023;
4. ບົດລາຍງານການເຄື່ອນໄຫວວຽກງານ ຂອງອົງການໄອຍະການປະຊາຊົນແຂວງ ໄລຍະກາງສະໄໝ ຂອງແຜນການ 5 ປີ (2021-2025), ທິດທາງແຜນການທ້າຍສະໄໝ ແລະ ການຈັດຕັ້ງປະຕິບັດວຽກງານ 6 ເດືອນຕົ້ນປີ, ທິດທາງແຜນການ 6 ເດືອນທ້າຍປີ 2023;
5. ບົດລາຍງານການເຄື່ອນໄຫວວຽກງານ ຂອງສານປະຊາຊົນແຂວງ ໄລຍະກາງສະໄໝ ຂອງແຜນການ 5 ປີ (2021-2025), ທິດທາງແຜນການທ້າຍສະໄໝ ແລະ ການຈັດຕັ້ງປະຕິບັດວຽກງານ 6 ເດືອນຕົ້ນປີ, ທິດທາງແຜນການ 6 ເດືອນທ້າຍປີ 2023;
6. ບົດລາຍງານ ການເຄື່ອນໄຫວວຽກງານ ຂອງສະພາປະຊາຊົນແຂວງຄໍາມ່ວນ ໄລຍະກາງສະໄໝ ຂອງແຜນການ 5 ປີ (2021-2025), ທິດທາງແຜນການທ້າຍສະໄໝ ແລະ ການເຄື່ອນ ໄຫວວຽກງານ ໃນໄລຍະແຕ່ກອງປະຊຸມສະໄໝສາມັນເທື່ອທີ 4 ຫາ ກອງປະຊຸມສະໄໝສາມັນເທື່ອທີ 5, ທິດທາງແຜນການເຄື່ອນໄຫວວຽກງານ ຮອດກອງປະຊຸມ ສະໄໝສາມັນເທື່ອທີ 6;
7. ຄົ້ນຄວ້າ ພິຈາລະນາ ນິຕິກໍາໃຕ້ກົດໝາຍ ອົງການປົກຄອງແຂວງ ຈໍານວນ 3 ສະບັບ ຄື: ຮ່າງ ຂໍ້ຕົກລົງຂອງເຈົ້າແຂວງໆຄໍາມ່ວນ ວ່າດ່ວຍການຄຸ້ມຄອງເຂດສະຫງວນທາງຫຼວງ, ຮ່າງ ຂໍ້ຕົກລົງຂອງເຈົ້າແຂວງຄໍາມ່ວນ ວ່າດ້ວຍການການຄຸ້ມຄອງແຮງງານພາຍໃນ ແລະ ຕ່າງປະເທດ ຢູ່ແຂວງຄໍາມ່ວນ ແລະ ຮ່າງຂໍ້ຕົກລົງຂອງເຈົ້າແຂວງໆຄໍາມ່ວນ ວ່າດ້ວຍການຈົດທະບຽນຄວາມຖືກຕ້ອງ ຂອງສັນຍາ ເອກະສານ;
8. ກອງປະຊຸມຄັ້ງນີ້ ຈະໄດ້ຈັດຕັ້ງການປະເມີນຄວາມໄວ້ວາງໃຈ ຕໍ່ການປະຕິບັດໜ້າທີ່ກາງສະໄໝ ຂອງແຜນການ 5 ປີ (2021-2025) ຂອງບຸກຄະລາກອນດໍາລົງຕໍາແໜ່ງ ທີ່ສະພາປະຊາຊົນແຂວງຄໍາມ່ວນຊຸດທີ II ເລືອກຕັ້ງ ແລະ ຮັບຮອງການແຕ່ງຕັ້ງ ຊິ່ງປະກອບມີ 4 ເປົ້າໝາຍຄຶ:

1) ບຸກຄະລາກອນ ຂອງສະພາປະຊາຊົນຂັ້ນແຂວງ ຈໍານວນ 12 ທ່ານ ເຊິ່ງລວມມີ ປະທານ-ຮອງປະທານ ສະພາປະຊາຊົນຂັ້ນແຂວງ, ປະທານ-ຮອງປະທານຄະນະກໍາມະການ ສະພາປະຊາຊົນຂັ້ນແຂວງ ແລະ ເລຂາທິການ-ຮອງເລຂາທິການ ສະພາປະຊາຊົນຂັ້ນແຂວງ;

2) ບຸກຄະລາກອນ ຂອງອົງການປົກຄອງແຂວງຄໍາມ່ວນ ຈໍານວນ 22 ທ່ານ ເຊິ່ງລວມມີ ເຈົ້າແຂວງ-ຮອງເຈົ້າແຂວງ ແລະ ຫົວໜ້າພະແນກການ, ອົງການທຽບເທົ່າ ແລະ ສອງກອງບັນຊາການ;

3) ບຸກຄະລາກອນ ຂອງອົງການຕຸລາການ ຈໍານວນ 3 ທ່ານ ໃນຈໍານວນທັງໝົດ 6 ທ່ານ ເຊິ່ງມີ ປະທານສານປະຊາຊົນແຂວງ, ຫົວໜ້າອົງການໄອຍະການປະຊາຊົນແຂວງ ແລະ ປະທານສານປະຊາຊົນເຂດ 2, ສໍາລັບປະທານສານປະຊາຊົນເຂດ 1, ຫົວໜ້າອົງການໄອຍະການປະຊາຊົນ ເຂດ 1 ເຂດ 2 ລວມເປັນ 3 ທ່ານ ອາຍຸການດໍາລົງຕໍາແໜ່ງຍັງບໍ່ທັນເຖິງໜຶ່ງປີ ຈຶ່ງບໍ່ໄດ້ຖືກປະເມີນ;

4) ບຸກຄະລາກອນ ຂອງອົງການປົກຄອງເມືອງ ເຊິ່ງແມ່ນເຈົ້າເມືອງພາຍໃນແຂວງຄໍາມ່ວນ ຈໍານວນ 10 ທ່ານ;

ນອກນັ້ນ, ຍັງຈະໄດ້ຮັບຟັງການລາຍງານ ຂອງຄະນະປະຈໍາສະພາປະຊາຊົນຂັ້ນແຂວງ ກ່ຽວກັບການພິຈາລະນາມະຕິຕົກລົງຮັບຮອງເອົາບັນຫາສໍາຄັນພື້ນຖານ ຂອງແຂວງ ໃນກອງປະຊຸມສະໄໝສາມັນເທື່ອທີ 4 ຫາກອງປະຊຸມສະໄໝສາມັນເທື່ອທີ 5; ພ້ອມກັນນັ້ນ, ຍັງຈະໄດ້ຮັບຟັງການຊີ້ແຈງ ຂອງພາກສວ່ນທີ່ກ່ຽວຂ້ອງຈຳນວນໜຶ່ງ ຕໍ່ຄໍາຊັກຖາມ ຂອງສະມາຊິກສະພາປະຊາຊົນຂັ້ນແຂວງ.

ກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນແຂວງຄໍາມ່ວນ ຊຸດທີ II ຈະດໍາເນີນໄປຈົນຮອດວັນທີ 26 ສິງຫາ 2023 ຈຶ່ງຈະສໍາເລັດ. ທ່ານສາມາດສົ່ງຄໍາຄິດຄໍາເຫັນ ກ່ຽວກັບການດໍາເນີນກອງປະຊຸມ ຜ່ານໂທລະສັບສາຍດ່ວນ 051 156 (ໂດຍບໍ່ເສຍຄ່າ)

ໂດຍ: ເອື້ອ ມະໂນສິງ ( ອາລີ ).