ກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນ ແຂວງຫົວພັນ

ໄດ້ອັດລົງດ້ວຍຜົນສໍາເລັດອັນຈົບງາມ.

ກອງປະຊຸມສະໄຫມສາມັນ ເທື່ອທີ 5 ຂອງສະພາປະຊາຊົນ ແຂວງຫົວພັນ ຊຸດທີ II ໄດ້ອັດລົງດ້ວຍຜົນສຳເລັດອັນຈົບງາມ ໃນວັນທີ 2-4 ສິງຫາ 2023 ພາຍຫຼັງທີ່ ດໍາເນີນມາເປັນເວລາ 3 ວັນເຕັມ. ພາຍໃຕ້ການເປັນປະທານ ຂອງທ່ານ ນາງ ອຳໄພວອນ ລ້ອມບຸນແພງ ກຳມະການສຳຮອງສູນກາງພັກ, ຮອງເລຂາພັກແຂວງ, ປະທານສະພາປະຊາຊົນ ແຂວງຫົວພັນ. ເປັນກຽດເຂົ້າຮ່ວມມີ ທ່ານວັນໄຊ ແພງຊຸມມາ ກຳມະການສູນກາງພັກ, ເລຂາພັກແຂວງ, ເຈົ້າແຂວງຫົວພັນ, ມີທ່ານ ຄຳແພງ ວິລະພັນ ກຳມະການ ຄະນະປະຈຳສະພາແຫ່ງຊາດ,ປະທານກຳມາທິການຍຸຕິທຳສະພາແຫ່ງຊາດ; ບັນດາທ່ານຄະນະປະຈຳພັກແຂວງ; ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 8 ແຂວງຫົວພັນ; ສະມາຊິກສະພາປະຊາຊົນແຂວງ ຊຸດທີ II; ເຈົ້າເມືອງ 10 ເມືອງ; ອາດີດການນຳພັກ-ລັດ, ອາດີດສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 8, ສະມາຊິກສະພາປະຊາຊົນແຂວງ ຊຸດທີ I, ຜູ້ຕາງໜ້າອົງການແນວລາວສ້າງຊາດ;ອົງການຈັດຕັ້ງມະຫາຊົນ ແລະ ພະແນກການອ້ອມຂ້າງແຂວງ;ອົງການທຽບເທົ່າ; ສອງກອງບັນຊາການ,ພາກສ່ວນທຸລະກິດ ພ້ອມດ້ວຍຜູ້ຕາງໜ້າຈາກພາກສ່ວນຕ່າງໆ ແລະ ແຂກຖືກເຊີນເຂົ້າຮ່ວມ.

ກອງປະຊຸມ ໄດ້ເສີມຂະຫຍາຍສິດປະຊາທິປະໄຕ ຂອງບັນດາທ່ານສະມາຊິກສະພາປະຊາຊົນແຂວງ ໃນການພິຈາລະນາ ແລະ ຮັບຮອງເອົາບັນດາເນື້ອໃນສໍາຄັນ ທີ່ໄດ້ມາພິຈາລະນາໃນກອງປະຊຸມ ມີດັ່ງນີ້:

1. ກອງປະຊຸມໄດ້ພິຈາລະນາ ແລະ ຮັບຮອງເອົາ ບົດລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ໄລຍະກາງສະໄໝ (2021-2023) ແລະ ທິດທາງແຜນການທ້າຍສະໄໝ (2023-2025); ການເຄື່ອນໄຫວວຽກງານ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023 ຂອງແຂວງຫົວພັນ;

2. ພິຈາລະນາ ແລະ ຮັບຮອງເອົາບົດລາຍງານ ກ່ຽວກັບການຄຸ້ມຄອງ, ສຳຫຼວດ, ຂຸດຄົ້ນສົ່ງອອກແຮ່ທາດ ຂອງແຂວງຫົວພັນ;

3. ພິຈາລະນາ ແລະ ຮັບຮອງເອົາການຈັດຕັ້ງປະຕິບັດ ບັນດາກິດຈະການລົງທຶນ ເຊົ່າ, ສໍາປະທານທີ່ດິນເພື່ອການລົງທຶນ ແລະ ກິດຈະການການ ຂຸດຄົ້ນແຮ່ທາດ ທີ່ສົ່ງຜົນກະທົບ ຕໍ່ສິ່ງແວດລ້ອມສັງຄົມ ແລະ ທໍາມະຊາດ ຢູ່ແຂວງຫົວພັນ;

4. ກອງປະຊຸມໄດ້ພິຈາລະນາ ແລະ ຮັບຮອງເອົາການປະເມີນຄວາມໄວ້ວາງໃຈ ຕໍ່ການປະຕິບັດໜ້າທີ່ ຂອງບຸກຄະລາກອນດຳລົງຕຳແໜ່ງ ທີ່ສະພາປະຊາຊົນແຂວງ ເລືອກຕັ້ງ ແລະ ຮັບຮອງເອົາການແຕ່ງຕັ້ງ;

5. ຮັບຟັງການລາຍງານກ່ຽວກັບການຈັດຕັ້ງປະຕິບັດ ວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ຂອງກອງບັນຊາການ ປກສ ແຂວງຫົວພັນ;

6. ພິຈາລະນາ ແລະ ຮັບຮອງ ເອົາບົດລາຍງານການເຄື່ອນໄຫວວຽກງານ ກາງສະໄໝ (2021-2023), ທິດທາງ ທ້າຍສະໄໝ (2023-2025) ແລະ ການເຄື່ອນໄຫວວຽກງານ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023 ຂອງອົງການໄອຍະການປະຊາຊົນແຂວງ, ສານປະຊາຊົນ ແຂວງຫົວພັນ;

7. ພິຈາລະນາ ແລະ ຮັບຮອງເອົາບົດລາຍງານ ການຈັດຕັ້ງປະຕິບັດວຽກງານ ໃນໄລຍະກາງສະໄໝ (2021-2023) ແລະ ທິດທາງແຜນການທ້າຍສະໄໝ (2023-2025) ການເຄື່ອນໄຫວວຽກງານ ປະຈໍາ 6 ເດືອນຕົ້ນປີ 2023 ແລະ ທິດທາງແຜນການ 6 ເດືອນທ້າຍປີ 2023 ຂອງສະພາປະຊາຊົນແຂວງ.ນອກຈາກນີ້, ກອງປະຊຸມຍັງໄດ້ຮັບຟັງການຊີ້ແຈງ ຕໍ່ບັນຫາພົ້ນເດັ່ນຕ່າງໆ ທີ່ສັງຄົມ ກໍ່ຄືປະຊາຊົນບັນດາເຜົ່າ ໃນທົ່ວແຂວງ ມີຄວາມສົນໃຈ ຈາກທ່ານເຈົ້າແຂວງ, ບັນດາພະແນກການ ຂອງແຂວງ ຫົວໜ້າອົງການໄອຍະການປະຊາຊົນແຂວງ, ຮອງປະທານສານປະຊາຊົນແຂວງ, ສອງກອງບັນຊາການ ແລະ ຄະນະປະຈໍາສະພາປະຊາຊົນແຂວງ.

ວາລະພິທີປິດກອງປະຊຸມ ທ່ານ ນາງ ອຳໄພວອນ ລ້ອມບຸນແພງ ກຳມະການສຳຮອງສູນກາງພັກ, ຮອງເລຂາພັກແຂວງ, ປະທານສະພາປະຊາຊົນ ແຂວງຫົວພັນ ໄດ້ຂຶ້ນກ່າວບົດສູນທອນພົດປິດກອງປະຊຸມ ຢ່າງເປັນທາງການ ເຊິ່ງເນື້ອໃນບົດສູນທອນພົດໄດ້ຍົກໃຫ້ເຫັນບາງຕອນຄື: ກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນ ແຂວງຫົວພັນ ຊຸດທີ II ດໍາເນີນມາຮອດນີ້ ໄດ້ສໍາເລັດຕາມແຜນການທີ່ວາງໄວ້. ຜົນສໍາເລັດ ຂອງກອງປະຊຸມຄັ້ງນີ້ ຖືເປັນໝາກຜົນແຫ່ງການເສີມຂະຫຍາຍສະຕິປັນຍາລວມໝູ່ ໃນອົງການອຳນາດລັດທຸກຂັ້ນ ຂອງແຂວງ ກໍ່ຄືການຍົກສູງຄວາມຮັບຜິດຊອບ ຄວາມເປັນເຈົ້າການ ຂອງບັນດາທ່ານ ສະມາຊິກສະພາປະຊາຊົນແຂວງ ເຂົ້າໃນການຄົ້ນຄວ້າ ແລະ ພິຈາລະນາ ຮັບຮອງເອົາແຕ່ລະເນື້ອໃນສຳຄັນທີ່ນຳມາພິຈາລະນາ ໃນກອງປະຊຸມຄັ້ງນີ້ ບົນພື້ນຖານຍຶດໝັ້ນຕໍ່ສິດ ແລະ ຜົນປະໂຫຍດລວມ ຂອງຊາດ ແລະ ຂອງປະຊາຊົນບັນດາເຜົ່າ ໃນທົ່ວແຂວງຫົວພັນ.

ໃນນາມປະທານກອງປະຊຸມ ຂໍຮຽກຮ້ອງມາຍັງ ອົງການປົກຄອງແຂວງ, ອົງການໄອຍະການປະຊາຊົນແຂວງ ແລະ ສານປະຊາຊົນແຂວງ ກໍຄືບັນດາທ່ານ ຄະນະປະຈຳສະພາປະຊາຊົນແຂວງ ຈົ່ງໄດ້ຮີບຮ້ອນຈັດຕັ້ງຜັນຂະຫຍາຍເນື້ອໃນ ກອງປະຊຸມຄັ້ງນີ້ ໃຫ້ທົ່ວເຖິງ-ທັນເວລາ, ຮຽກຮ້ອງມາຍັງສະມາຊິກ ອົງການປົກຄອງແຂວງ ແລະ ການຈັດຕັ້ງທຸກຂັ້ນ, ປະຊາຊົນຊາວແຂວງຫົວພັນ ແລະ ທຸກພາກສ່ວນຈົ່ງໃຫ້ການຮ່ວມມືສະໜັບສະໜູນ ແລະ ເປັນເຈົ້າການເຂົ້າຮ່ວມຈັດຕັ້ງປະຕິບັດໃຫ້ມີຜົນສຳເລັດ.

ກອງປະຊຸມສະເໜີມາຍັງອົງການແນວລາວສ້າງຊາດແຂວງ, ສະຫະພັນນັກຮົບເກົ່າແຂວງ ບັນດາອົງການຈັດຕັ້ງມະຫາຊົນ ແລະ ການຈັດຕັ້ງທາງສັງຄົມ ຈົ່ງເປັນເຈົ້າການໃນການຕິດຕາມກວດກາການປະຕິບັດໜ້າທີ່ ຂອງບັນດາອົງການອຳນາດລັດຂັ້ນແຂວງ ຕາມສິດ ແລະ ໜ້າທີ່ ຂອງຕົນຕາມທີ່ກົດໝາຍກຳນົດໄວ້ ເພື່ອຮັບປະກັນເຮັດໃຫ້ບັນດາເນື້ອໃນ ທີ່ຖືກຮັບຮອງໃນກອງປະຊຸມຄັ້ງນີ້ ໄດ້ຮັບການຈັດຕັ້ງປະຕິບັດຢ່າງມີໝາກຜົນ, ນຳເອົາຜົນປະໂຫຍດຕົວຈິງ ມາໃຫ້ປະຊາຊົນບັນດາເຜົ່າ.

ກອງປະຊຸມຂໍສະແດງຄວາມຍ້ອງຍໍຊົມເຊີຍ ແລະ ສະແດງຄວາມຂອບໃຈຢ່າງສູງ ມາຍັງອົງການປົກຄອງແຂວງ, ອົງການໄອຍະການປະຊາຊົນແຂວງ, ສານປະຊາຊົນແຂວງ, ກອງບັນຊາການທະຫານ, ກອງບັນຊາການ ປກສ ແຂວງ, ອົງການແນວລາວສ້າງຊາດ ແລະ ພາກສ່ວນທີ່ກ່ຽວຂ້ອງ ທີ່ໄດ້ສະໜອງຂໍ້ມູນ, ເອກະສານ, ບົດລາຍງານ ທີ່ມີເນື້ອໃນສຳຄັນ ໃຫ້ແກ່ສະພາປະຊາຊົນແຂວງ ໄດ້ຄົ້ນຄວ້າ ແລະ ປະກອບຄວາມເຫັນ ຢ່າງເລິກເຊິ່ງ ແລະ ກ້າວເຂົ້າສູ່ການພິຈາລະນາ ຮັບຮອງເອົາ. ກອງປະຊຸມສະແດງຄວາມຂອບໃຈຢ່າງສູງມາຍັງບັນດາທ່ານ ການນຳ ຂອງແຂວງ, ບັນດາທ່ານແຂກທີ່ມີກຽດ ທີ່ໄດ້ໃຫ້ການຕິດຕາມຢ່າງໃກ້ຊິດ ແລະ ເຂົ້າຮ່ວມກອງປະຊຸມໃນຄັ້ງນີ້, ສະແດງຄວາມຂອບໃຈ ພໍ່ແມ່ປະຊາຊົນບັນດາເຜົ່າທົ່ວແຂວງຫົວພັນ ທີ່ໄດ້ເອົາໃຈໃສ່ຕິດຕາມ ແລະ ສົ່ງຄວາມຄິດເຫັນທີ່ເປັນປະໂຫຍດໂດຍຜ່ານໂທລະສັບສາຍດ່ວນ ແລະ ຈາກສື່ຕ່າງໆ ມາຍັງກອງປະຊຸມຄັ້ງນີ້ ເຊິ່ງຄວາມຄິດ, ຄວາມເຫັນດັ່ງກ່າວ, ຄະນະປະຈຳສະພາປະຊາຊົນແຂວງ ຈະສືບຕໍ່ປະສານສົມທົບກັບອົງການປົກຄອງແຂວງ ພາກສ່ວນທີ່ກ່ຽວຂ້ອງ ຄົ້ນຄວ້າ ພິຈາລະນາແກ້ໄຂຕາມຄວາມເໝາະສົມ, ຂໍສະແດງຄວາມ ຂອບໃຈມາຍັງ ກຳລັງປ້ອງກັນຊາດ, ປ້ອງກັນຄວາມສະຫງົບ, ສື່ມວນຊົນ, ແພດໝໍ ແລະ ພາກສ່ວນກ່ຽວຂ້ອງ ໄດ້ພ້ອມກັນປະຕິບັດໜ້າທີ່ ຂອງຕົນ ດ້ວຍຄວາມຮັບຜິດຊອບສູງ ປະກອບສ່ວນເຮັດໃຫ້ກອງປະຊຸມຄັ້ງນີ້ມີຄວາມສະຫງົບປອດໄພ ແລະ ມີຜົນສຳເລັດຢ່າງຈົບງາມ.