ກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງ ອັດຕະປື ຊຸດທີ II ໄຂຂຶ້ນຢ່າງເປັນທາງການ ໃນຕອນເຊົ້າວັນທີ 23 ມັງກອນ 2025 ນີ້. ທີ່ຫ້ອງປະຊຸມສະພາປະຊາຊົນແຂວງ ພາຍໃຕ້ການເປັນປະທານຂອງທ່ານ ນາງ ມີນາພອນ ໄຊສົມພູ ປະທານສະພາປະຊາຊົນແຂວງອັດຕະປື, ມີທ່ານ ພົທ ວັນທອງ ກອງມະນີ ກໍາມະການສູນກາງພັກ ເລຂາພັກແຂວງ ເຈົ້າແຂວງອັດຕະປື, ບັນດາທ່ານການນຳພັກ-ລັດຂັ້ນຂອງແຂວງ, ບັນດາທ່ານສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 17 ແລະ ສະມາຊິກສະພາປະຊາຊົນແຂວງ, ບັນດາພະແນກການ, ເຈົ້າເມືອງ, ອາດີດການນໍາພັກ-ລັດຂອງແຂວງແລະ ແຂກທີ່ຖືກເຊີນ ເຂົ້າຮ່ວມຢ່າງພ້ອມພຽງ.
ກອງປະຊຸມ, ຈະໄດ້ຄົ້ນຄວ້າ ແລະ ພິຈາລະນາຮັບຮອງບັນດາເນື້ອໃນທີ່ສໍາຄັນຂອງທ້ອງຖີ່ນ ດັ່ງນີ້:
1. ຮັບຟັງບົດລາຍງານຂອງທ່ານເຈົ້າແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາ ປະຈໍາປີ 2024 ແລະ ທິດທາງແຜນການ 2025 ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ແຜນການລົງທຶນຂອງລັດ ປະຈໍາປີ 2025, ແຜນຈັດສັນງົບປະມານແຫ່ງລັດ ໃຫ້ບັນດາພະແນກການ, ອົງການທຽບເທົ່າພະແນກຂັ້ນແຂວງ ໃນປີ 2025, ສະເໜີຂໍດັດແກ້ງົບປະມານແຫ່ງລັດ ປະຈໍາປີ 2024 ແລະ ການຈັດຕັ້ງປະຕິບັດວຽກງານ 3 ສ້າງ;
2. ບົດລາຍງານຂອງພະແນກກແຜນການ ແລະ ການລົງທຶນ ກ່ຽວກັບການຈັດຕັ້ງປະຕິບັດໂຄງການລົງທຶນຂອງລັດ ປະຈໍາປີ 2024 ແລະ ແຜນການຈັດສັນໂຄງການລົງທຶນ ປີ 2025;
3. ລາຍງານກ່ຽວກັບການຈັດສັນງົບປະມານ ປະຈໍາປີ 2025 ແລະ ການຫັນເປັນທັນສະໄໝໃນການຈັດເກັບລາຍຮັບເຂົ້າງບົປະມານ ແລະ ການແບ່ງຂັ້ນຄຸ້ມຄອງ;
4. ຮັບຟັງການລາຍງານກ່ຽວກັບການຊຸກຍູ້, ການຕິດຕາມກວດກາ ການແກ້ໄຂບັນຫາຂໍ້ຂັດແຍ່ງທີ່ດີນ, ການບຸກລຸກຊັບພະຍາກອນປ່າໄມ້ ແລະ ການແກ້ໄຂບັນຫາການສໍ້ລາດບັງຫຼວງ ປີ 2024 ແລະ ທິດທາງ 2025;
5. ຮັບຟັງການລາຍງານກ່ຽວກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ;
6. ບົດລາຍງານຂອງອົງການກວດສອບພາກໃຕ້ ກ່ຽວກັບການຈັດຕັ້ງປະຕິບັດວຽກງານປະຈໍາປີ 2024 ແລະ ທິດທາງແຜນການປະຈໍາປີ 2025, ລາຍງານຜົນການກວດກາຕາມຜົນການກວດສອບຄືນການແກ້ໄຂຜົນການກວດສອບ ແລະ ຜົນການກວດສອບບົດສະຫຼຸບຂາດຕົວ ການຈັດຕັງປະຕິບັດງົບປະມານຂອງແຂວງ ປະຈໍາປີ 2023;
7. ບົດລາຍງານຂອງອົງການກວດກາລັດແຂວງ ກ່ຽວກັບການຈັດຕັງປະຕິບັດວຽກງານ ປະຈໍາປີ 2024 ແລະ ທິດທາງແຜນການປີ 2025, ລາຍງງານຜົນການກວດກາ ຕາມຜົນການກວດສອບຮອດປີ 2022 ແລະ ວຽກງານຕ້ານການສໍ້ລາດບັງຫຼວງ;
8. ບົດລາຍງານຂອງອົງການໄອຍະການປະຊາຊົນແຂວງ ກ່ຽວກັບການຈັດຕັ້ງປະຕິບັດວຽກງານປະຈໍາປີ 2024 ແລະ ທິດທາງແຜນການ ປີ 2025;
9. ບົດລາຍງານຂອງສານປະຊາຊົນແຂວງ ກ່ຽວກັບການຈັດຕັ້ງປະຕິບັດວຽກງງານປະຈໍາປີ 2024 ແລະ ທິດທາງແຜນການ ປີ 2025;
10. ບົດລາຍງານຂອງຄະນະປະຈໍາສະພາປະຊາຊົນຂັ້ນແຂວງ ຊຸດທີ II ກ່ຽວກັບການເຄື່ອນໄຫວຈັດຕັ້ງປະຕິບັດວຽກງານ ປະຈໍາປີ 2024 ແລະ ທິດທາງແຜນການ ປີ 2025.
11. ຮັບຟັງການລາຍງານຜົນຂອງການ ພິຈາລະນາ ຮັບຮອງເອົາການສະເໜີແຕ່ງຕັ້ງ, ຍົກຍ້າຍ ຫຼື ປົດຕໍາແໜ່ງ ພະນັກງານນໍາພາ-ຄຸ້ມຄອງຂອງແຂວງ;
ນອກຈາກນັ້ນ, ກອງປະຊຸມຂອງພວກເຮົາຍັງຈະໄດ້ຮັບຟັງການຊີ້ແຈງເພີ່ມເຕີມ ຈາກບັນດາພະແນກການທີ່ກ່ຽວຂ້ອງຈໍານວນໜຶ່ງ ຕໍ່ຄໍາຊັກຖາມຂອງບັນດາທ່ານສະມາຊິກສະພາປະຊາຊົນແຂວງ ກ່ຽວກັບບັນຫາທີ່ພົ້ນເດັ່ນ ເປັນຕົ້ນແມ່ນ: (1) ພະແນກໂຍທາທິການ ແລະ ຂົນສົ່ງ, (2) ພະແນກກະສິກໍາ ແລະ ປ່າໄມ້, (3) ພະແນກສຶກສາທິການ ແລະ ກິລາ, (4) ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ,(5) ພະແນກພາຍໃນແຂວງ.
ພ້ອມນັ້ນ, ກອງປະຊຸມຈະໄດ້ຮັບຟັງການຕີລາຄາ ຂອງຄະນະປະຈໍາ ສະພາປະຊາຊົນຂັ້ນແຂວງ ຕໍ່ບົດລາຍງານໂດຍສັງເຂບ ຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດຂັ້ນແຂວງ ປະຈໍາປີ 2024 ແລະ ທິດທາງແຜນການ ປີ 2025 ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ , ແຜນການລົງທຶນຂອງລັດ ແລະ ແຜນຈັດສັນງົບປະມານ ປະຈໍາປີ 2025; ຕໍ່ບົດລາຍງານຂອງຂອງອົງການກວດສອບປະຈໍາພາກໃຕ້ ແລະ ອົງການກວດກາລັດແຂວງ; ຕໍ່ບົດລາຍງານຂອງອົງການໄອຍະການປະຊາຊົນແຂວງ ແລະ ສານປະຊາຊົນແຂວງ ກ່ຽວກັບການເຄື່ອນໄຫວຈັດຕັ້ງປະຕິບັດວຽກງງານ ປະຈໍາປີ 2024 ແລະ ທິດທາງແຜນການປີ 2025.
(ວິນັດ ສີສຸລາດ)