(ສພຊ) – ກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນນະຄອນຫຼວງວຽງຈັນ (ສປນວ) ຊຸດທີ II ໄຂຂຶ້ນຢ່າງເປັນທາງການ ໃນຕອນເຊົ້າວັນທີ 16 ທັນວານີ້ ທີ່ຫ້ອງວ່າການປົກຄອງນະຄອນຫຼວງວຽງຈັນ (ນວ) ໂດຍການເປັນປະທານຂອງທ່ານ ອານຸພາບ ຕຸນາລົມ ຄະນະເລຂາທິການສຸນກາງພັກ, ປະທານສະພາປະຊາຊົນນະ ຄອນຫຼວງວຽງຈັນ; ເຂົ້າຮ່ວມມີທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ, ສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງທີ 1 ນະຄອນຫຼວງວຽງຈັນ, ການນໍາພັກ-ລັດຂັ້ນສູງ ນວ, ສະມາຊິກສະພາປະຊາຊົນນະຄອນຫຼວງວຽງຈັນ (ສສນວ) ພ້ອມດ້ວຍແຂກຖືກເຊີນ.
ພາຍຫຼັງທ່ານ ອານຸພາບ ຕຸນາລົມ ໄດ້ກ່າວເປີດກອງປະຊຸມຢ່າງເປັນທາງການ, ກອງປະຊຸມໄດ້ຮັບຟັງການລາຍງານຂອງອົງການປົກຄອງນະຄອນຫຼວງວຽງຈັນ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ ປະຈຳປີ 2024 ແລະ ທິດທາງແຜນການປະຈໍາປີ 2025, ແຜນການລົງທຶນຂອງລັດປີ 2025, ແຜນ ການນໍາໃຊ້ເງິນເກີນແຜນປີ 2024 ແລະ ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດຢູ່ ນວ ຈາກທ່ານ ອາດສະພັງທອງ ສີພັນດອນ, ທ່ານ ນາງ ລຳພອຍ ສີອັກຄະຈັນ ຮອງປະທານ ສປນວ, ຕາງໜ້າຄະນະປະຈຳ ສປນວ ກໍໄດ້ປະກອບຄຳເຫັນຕໍ່ບົດລາຍງານດັ່ງກ່າວ; ຈາກນັ້ນ, ປະ ທານກອງປະຊຸມ ມີຄຳເຫັນເຈາະຈີ້ມ ທັງໃຫ້ທິດຊີ້ນຳໃນການຄົ້ນຄວ້າປະ ກອບຄຳເຫັນຕໍ່ບົດລາຍງານຂອງອົງການປົກຄອງນະຄອນຫຼວງວຽງຈັນ, ບັນດາທ່ານ ສສຊ ແລະ ສສນວ ກໍໄດ້ສຸມໃສປະກອບຄຳຄິດຄຳເຫັນຕໍ່ບົດລາຍງານຢ່າງກົງໄປກົງ.
ກອງປະຊຸມສະໄໝສາມັນເທື່ອທີ 8 ຂອງ ສປນວ ຊຸດທີ II ຈະດຳເນີນໄປຈົນເຖິງວັນທີ 24 ທັນວາ 2024 ເຊິ່ງຈະໄດ້ພິຈາລະນາ ແລະ ຮັບຮອງເອົາ: 1. ບົດລາຍງານຂອງອົງການປົກຄອງນະຄອນຫຼວງວຽງຈັນ ກ່ຽວກັບການຈັດ ຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ ປະຈຳປີ 2024 ແລະ ທິດທາງແຜນການປະຈໍາປີ 2025, ແຜນການລົງທຶນຂອງລັດປີ 2025, ແຜນການນໍາໃຊ້ເງິນເກີນແຜນປີ 2024 ແລະ ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດຢູ່ ນວ; 2. ບົດລາຍງານການຈັດ ຕັ້ງປະຕິບັດວຽກງານພັດທະນາຊົນນະບົດ ແລະ ແກ້ໄຂຄວາມ ທຸກຍາກໃນ ນວ ປະຈຳປີ 2024 ແລະ ທິດທາງແຜນການປະຈໍາປີ 2025; 3. ບົດລາຍງານການຈັດຕັ້ງປະ ຕິບັດວຽກງານປະຈໍາປີ 2024 ແລະ ທິດທາງແຜນການປະ ຈຳປີ 2025, ບົດລາຍງານຜົນຂອງການກວດສອບຄືນ ແລະ ການສະຫຼຸບງົບປະມານຂາດຕົວປະຈຳປີ 2023 ຂອງອົງການກວດສອບປະຈຳພາກກາງ 1; 4. ບົດລາຍງານການຈັດຕັ້ງປະຕິບັດວຽກງານກວດກາປະຈໍາປີ 2024 ແລະ ທິດທາງແຜນການປີ 2025 ຂອງອົງການກວດກາລັດ ນວ; 5. ບົດລາຍງານ ການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາປີ 2024 ແລະ ທິດທາງແຜນການປະຈໍາປີ 2025 ຂອງອົງ ການໄອຍະການປະຊາຊົນພາກກາງ ແລະ ອົງການໄອຍະການປະຊາຊົນ ນວ, ບົດລາຍງານຂອງອົງ ການໄອຍະການປະຊາຊົນ ນວ ກ່ຽວກັບການຕິດຕາມກວດກາການດໍາເນີນຄະດີຂອງອົງການສືບສວນ-ສອບສວນຂັ້ນສູນກາງໃນໄລຍະຜ່ານມາ; 6. ບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານປະຈຳປີ 2024 ແລະ ທິດທາງແຜນການປະຈຳປີ 2025 ຂອງສານປະຊາຊົນພາກກາງ ແລະ ສານປະຊາຊົນ ນວ; ບົດລາຍງານຂອງສານປະຊາຊົນ ນວ ກ່ຽວກັບກົນໄກການປະສານງານລະຫວ່າງສານປະຊາຊົນກັບຄ້າຍຄຸມຂັງ-ດັດສ້າງ ກ່ຽວກັບການຈັດຕັ້ງສານເຄື່ອນທີ່, ການເອົາຜູ້ຖືກຫາມາຕັດສິນຢູ່ສານ ແລະ ການສົ່ງປະເດັນ ຫຼື ຄໍາຕັດສິນໃຫ້ຄ້າຍຄຸມຂັງ- ດັດສ້າງ ເພື່ອຮັບປະກັນໃຫ້ມີຄວາມກົມກຽວຕາມຂັ້ນຕອນຂອງກົດໝາຍ; 7. ບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານປະຈຳປີ 2024 ແລະ ທິດ ທາງແຜນການປະຈຳປີ 2025 ຂອງສະພາປະຊາຊົນນະ ຄອນຫຼວງວຽງຈັນ ຊຸດທີ II ແລະ ແຜນການເຄື່ອນໄຫວພົບປະປະຊາຊົນ ແລະ ເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ແລະ ສປນວ ຊຸດທີ II; 8. ຮ່າງມະຕິຂອງກອງປະຊຸມສະ ພາປະຊາຊົນ ວ່າດ້ວຍການດຳເນີນກອງປະຊຸມສະພາປະຊາຊົນ ແລະ ການລົງພົບປະຜູ້ມີສິດເລືອກຕັ້ງ; 9. ຮ່າງຂໍ້ ຕົກລົງວ່າດ້ວຍກອງທຶນຄຸ້ມຄອງໄພພິບັດນະຄອນຫຼວງວຽງຈັນ.
ກອງປະຊຸມຍັງຈະໄດ້ຮັບຟັງ: 1. ບົດລາຍງານກ່ຽວ ກັບວິທີການ ຫຼື ມາດຕະການແກ້ໄຂໃຫ້ຖືກ ຕ້ອງຕາມກົດ ໝາຍວ່າດ້ວຍການປະຕິບັດຄໍາຕັດສິນຂອງສານ ໂດຍສະ ເພາະແມ່ນຄໍາຕັດສິນຂອງສານທີ່ຄ້າງປະຕິບັດຫຼາຍປີ; ບົດລາຍງານກ່ຽວກັບວິທີການແກ້ໄຂກໍລະນີຜູ້ຖືກປະຕິບັດຄໍາຕັດສິນຂອງສານ ໄດ້ເອົາຕົວຫຼົບຫຼັກ ຫຼື ຫຼົບໜີ ເພື່ອໃຫ້ຄໍາຕັດສິນຂອງສານໄດ້ຮັບການປະຕິບັດຖືກຕ້ອງ, ຄົບຖ້ວນ, ທົ່ວເຖິງ ແລະ ທັນເວລາ; 2. ການປະກອບຄຳເຫັນຂອງອົງການແນວລາວສ້າງຊາດ ນວ ກ່ຽວກັບການເຄື່ອນໄຫວວຽກງານຂອງສະພາປະຊາຊົນນະຄອນຫຼວງ; 3. ບົດລາຍ ງານການປະເມີນຜົນການຈັດຕັ້ງປະຕິບັດບັນດານິຕິກຳໃຕ້ກົດໝາຍ ທີ່ ສປນວ ໄດ້ຮັບຮອງ ຈຳນວນ 2 ສະບັບຄື: ຂໍ້ ຕົກລົງຂອງທ່ານເຈົ້າຄອງນະຄອນຫຼວງວຽງຈັນ ວ່າດ້ວຍການປະເມີນລາຄາທີ່ດິນທົ່ວນະຄອນຫຼວງວຽງຈັນ ສະບັບເລກທີ 142/ຈນວ, ລົງວັນທີ 26 ກຸມພາ 2021 ແລະ ຂໍ້ ຕົກລົງຂອງທ່ານເຈົ້າຄອງນະຄອນຫຼວງວຽງຈັນ ວ່າດ້ວຍການພັດທະນາ ແລະ ຄຸ້ມຄອງເຂດສະຫງວນຄອງນໍ້າວຽງ ຈັນ, ສະບັບເລກທີ 0966/ຈນວ, ລົງວັນທີ 11 ພະຈິກ 2019; 4. ການລາຍງານ, ຊີ້ແຈງບັນຫາສໍາຄັນຕ່າງໆຂອງນະຄອນຫຼວງ ເປັນຕົ້ນ: 1) ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ທີ່ຕິດພັນກັບການກຳນົດແຜນວຽກຈຸດສຸມ, ບຸລິມະສິດ ເພື່ອຈັດຕັ້ງວາ ລະແຫ່ງຊາດດັ່ງກ່າວ ເຂົ້າໃນແຜນພັດທະນາເສດຖະກິດ-ສັງຄົມ ແລະ ແຜນງົບປະມານ ຂອງທ້າຍສະໄໝຮອດປີ 2025; 2) ມາດຕະການຄຸ້ມຄອງ ແລະ ຕ້ານການຮົ່ວໄຫຼຂອງລາຍຮັບງົບປະມານແຫ່ງລັດ ແລະ ແຜນການຈັດສັນເງິນເກີນແຜນປີ 2024; 3) ການປະຕິບັດມາດຕະການແກ້ໄຂຄວາມຫຍຸ້ງຍາກທາງດ້ານເສດຖະເກີດ ໃຫ້ແກ່ພະນັກງານລັດ, ທະຫານ, ຕຳ ຫຼວດ; 4) ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ກ່ຽວກັບການສົ່ງເສີມການຜະລິດສິນຄ້າພາຍໃນ, ການກຳນົດໂຄງປະກອບລາຄາສິນຄ້າ ແລະ ການເຂົ້າຫາແຫຼ່ງທຶນສົ່ງເສີມວິສາຫະກິດຂະໜາດນ້ອຍ-ຂະ ໜາດກາງ; 5) ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດຢູ່ ນວ; 6) ການຄຸ້ມ ຄອງການນຳເຂົ້າສິນຄ້າທີ່ມີສານຕັ້ງຕົ້ນປະເພດຢາເສບຕິດ ເປັນຕົ້ນ: ຢາສູບໄຟຟ້າ, ກາເຟປາຕີ້ຄໍລາເຈນ, ປຸມເປົ້າ ແລະ ອື່ນໆ; 7) ການຈັດຕັ້ງປະຕິບັດໂຄງການຂົນສົ່ງແບບຍືນຍົງໃນຕົວເມືອງ ນວ (ລົດເມດ່ວນ BRT); 8) ການຈັດຕັ້ງປະຕິບັດກົດໝາຍວ່າດ້ວຍຜັງເມືອງ ແລະ ແຜນຜັງເມືອງ ສະບັບທີ III ຂອງ ນວ ໄປຄຽງຄູ່ກັບການຈັດສັນຄວາມບໍ່ເປັນລະບຽບຮຽບຮ້ອຍໃນສັງຄົມ; 9) ການຈັດຕັ້ງປະຕິບັດໂຄງ ການກໍ່ສ້າງຂະຫຍາຍ ນໍ້າປະປາຈີນາຍໂມ້ ແລະ ທໍ່ສົ່ງນະຄອນຫຼວງວຽງຈັນ ທີ່ນໍາໃຊ້ເງິນກູ້ຢືມຈາກລັດຖະບານຍີ່ ປຸ່ນ; 10) ມາດຕະການໃນການຄຸ້ມຄອງການຂຸດຄົ້ນແຮ່ທາດຢູ່ ນວ ຕິດພັນກັບການນໍາໃຊ້ງົບປະມານພັດທະນາທ້ອງຖິ່ນ ແລະ ພັດທະນາຊຸມຊົນ; 11) ສະພາບການສຶກ ສາໃນ ນວ ທີ່ຕິດພັນກັບການປະລະການຮຽນຂອງນັກ ຮຽນໃນຊັ້ນມໍຕົ້ນ ແລະ ມໍປາຍ ປະຈຳສົກປີ 2023-2024 ແລະ ທິດທາງແຜນການປະຈຳສົກປີ 2024-2025.
ນອກຈາກນັ້ນ, ຍັງຈະໄດ້ຮັບຟັງການຊີ້ແຈງບາງບັນ ຫາພົ້ນເດັ່ນທີ່ ສສຊ ແລະ ສສນວ ຍົກຂຶ້ນ ຫຼື ຊັກຖາມໃນກອງປະຊຸມ ຈາກອົງການປົກຄອງ, ສານປະຊາຊົນ, ອົງ ການໄອຍະການປະຊາຊົນ ແລະ ພາກສ່ວນກ່ຽວຂອງຕື່ມອີກ.
ຄະນະເລຂາທິການ ສປນວ ໄດ້ຈັດຕັ້ງໜ່ວຍຮັບຄຳຄິດຄຳເຫັນ ແລະ ຄຳສະເໜີໂດຍກົງຂອງປະຊາຊົນຊາວນະ ຄອນຫຼວງວຽງຈັນ ຜ່ານໂທລະສັບສາຍດ່ວນ ໝາຍເລກ: 1156 ຫຼື ໝາຍເລກໂທລະສັບ 021 260251 260242 (ໃນໂມງລັດຖະການ) ເຊິ່ງເລີ່ມເປີດຮັບນັບແຕ່ມື້ນີ້ເປັນຕົ້ນໄປ.
(ນາງ ອາລິນ ສຸພິມມະປະດິດ)