ກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງ​ອັດຕະປື​ ຊຸດທີ II ໄຂຂຶ້ນຢ່າງເປັນທາງການ ໃນຕອນເຊົ້າວັນທີ 30 ກໍລະກົດ​ 2024​ ນີ້.​ ທີ່ຫ້ອງປະຊຸມສະພາປະຊາຊົນແຂວງ ພາຍໃຕ້ການເປັນປະທານຂອງທ່ານ ນາງ​ ມີນາພອນ​ ໄຊສົມພູ ປະທານສະພາປະຊາຊົນແຂວງອັດຕະປື, ມີທ່ານ ພົທ​ ວັນທອງ​ ກອງມະນີ ເຈົ້າແຂວງອັດຕະປື, ບັນດາທ່ານການນຳພັກ-ລັດຂັ້ນຂອງແຂວງ, ບັນດາທ່ານສະມາຊິກສະພາແຫ່ງຊາດ  ປະຈຳເຂດເລືອກຕັ້ງທີ 17 ແລະ ສະມາຊິກສະພາປະຊາຊົນແຂວງ, ບັນດາພະແນກການ, ເຈົ້າເມືອງ, ອາດີດການນໍາພັກ-ລັດຂອງແຂວງແລະ​ ແຂກທີ່ຖືກເຊີນ ເຂົ້າຮ່ວມຢ່າງພ້ອມພຽງ.

ທ່ານ​ ນາງ​ ມີນາພອນ​ ໄຊສົມພູ ໄດ້ກ່າວສູນທອນພົດເປີດກອງປະຊຸມໂດຍມີບາງຕອນວ່າ: ຕະຫຼອດໄລຍະ 6 ເດືອນ ຕົ້ນປີ 2024 ຜ່ານການເຄື່ອນໄຫວຈັດຕັ້ງປະຕິບັດພາລະບົດບາດ ສິດ ແລະ ໜ້າທີ່ ຂອງສະພາປະຊາຊົນແຂວງ ອັດຕະປື ຕາມທີ່ໄດ້ກໍານົດໄວ້ໃນລັດຖະທໍາມະນູນ ແລະ ກົດໝາຍ  ໃນທ່າມກາງທີ່ສະພາບການຂອງພາກພື້ນ ແລະ ສາກົນ ພວມມີການຜັນແປ ຢ່າງສະຫຼັບຊັບຊ້ອນ ແລະ ມີຄວາມຫຍຸ້ງຍາກຫຼາຍດ້ານ, ຄາດຄະເນໄດ້ຍາກ ເຊິ່ງສົ່ງຜົນກະທົບໂດຍກົງ ຕໍ່ບັນດາປະເທດໃນໂລກ ລວມທັງ ສປປລາວ ໂດຍສະເພາະແຂວງອັດຕະປື ຂອງພວກເຮົາ, ບວກກັບຄວາມຫຍຸ້ງຍາກທາງດ້ານເສດຖະກິດ-ການເງິນ ເຊິ່ງສົ່ງຜົນກະທົບຕໍ່ການພັດທະນາ, ການດໍາລົງຊີວິດຂອງພະນັກງານ-ລັດຖະກອນ, ທະຫານ, ຕໍາຫຼວດ ແລະ ປະຊາຊົນລາວບັນດາເຜົ່າ ໃນແຂວງອັດຕະປື, ເຊິ່ງເຮັດໃຫ້ການຄຸ້ມຄອງລັດ, ຄຸ້ມຄອງສັງຄົມ ດ້ວຍກົດໝາຍ ພົບຫຼາຍສິ່ງທີ່ທ້າທາຍ  ຕໍ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ເປັນຕົ້ນ: ການເໜັງຕີງຂອງລາຄານໍ້າມັນ, ສິນຄ້າອຸປະໂພກ-ບໍລິໂພກ, ອັດຕາແລກປ່ຽນ ແລະ ອັດຕາເງິນເຟີ້ທີ່ສູງຂື້ນ ແລະ ບັນຫາອື່ນໆທີ່ເກີດຂື້ນ ເວົ້າລວມ, ເວົ້າສະເພາະ ແຂວງອັດຕະປຶຂອງພວກເຮົາ, ແຕ່ເຖິງຢ່າງໃດກໍ່ຕາມ ດ້ວຍຄວາມເອົາໃຈໃສ່ນໍາພາ-ຊີ້ນໍາ ຂອງອົງຄະນະພັກແຂວງ ແລະ ອົງການປົກຄອງທ້ອງຖີ່ນທຸກຂັ້ນ, ການເຮັດວຽກຮ່ວມກັນຢ່າງໃກ້ຊິດ ແລະ ເປັນເອກະພາບ ລະຫວ່າງສະພາປະຊາຊົນແຂວງ ແລະ ອົງການປົກຄອງແຂວງ ເຮັດໃຫ້ແຂວງຂອງພວກເຮົາສາມາດສືບຕໍ່ມີການພັດທະນາ, ເຮັດໃຫ້ບັນດາຄາດໝາຍທາງດ້ານເສດຖະກິດ-ສັງຄົມ ຈໍານວນບໍ່ໜ້ອຍ ສາມາດບັນລຸໄດ້ຕາມແຜນ ເຊິ່ງເຮັດໃຫ້ແຂວງຂອງພວກເຮົາ ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ, ເປັນລະບຽບຮຽບຮ້ອຍໂດຍພື້ນຖານ, ເສດຖະກິດຍັງສືບຕໍ່ມີທ່າອ່ຽງເຕີບໂຕ ແລະ ຂະຫຍາຍຕໍ່ເນື່ອງ.

ກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງ ຊຸດທີ II, ຈະໄດ້ຄົ້ນຄວ້າ ແລະ ພິຈາລະນາຮັບຮອງບັນດາເນື້ອໃນທີ່ສໍາຄັນຂອງທ້ອງຖີ່ນ ດັ່ງນີ້​:

1).​ ຮັບຟັງການລາຍງານໂດຍສັງເຂບ ຂອງທ່ານເຈົ້າແຂວງ ກ່ຽວກັບສະພາບພົ້ນເດັ່ນຂອງແຂວງ ປະຈໍາ 6 ເດືອນ ຕົ້ນປີ 2024 ແລະ ທິດທາງແຜນການ 6 ເດືອນ ທ້າຍປີ 2024 ຕິດພັນກັບການປະຕິບັດ 02 ວາລະ ແຫ່ງຊາດ;

2).  ບົດລາຍງານຂອງພະແນກກແຜນການ ແລະ ການລົງທຶນ ກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ປະຈໍາ 6 ເດືອນ ຕົ້ນປີ 2024 ແລະ ທິດທາງແຜນການ 6 ເດືອນທ້າຍປີ 2024 ຂອງແຂວງ;

3).  ບົດລາຍງານ ຂອງ​ພະ​ແນກ​ການ​ເງິນ​ແຂວງ ກ່ຽວກັບການຈັດຕັ້ງປະຕິບັດ ແຜນງົບປະມານແຫ່ງລັດຂັ້ນແຂວງ ປະຈໍາ 6 ເດືອນຕົ້ນປີ 2024 ແລະ ທິດ​ທາງ​ແຜນ​ການ 6 ເດືອນ​ທ້າຍ​ປີ 2024 ຂອງ​ແຂວງ;

4).  ບົດ​ລາຍ​ງານຂອງ​ພະ​ແນກ​ຊັບ​ພະ​ຍາ​ກອນ​ທຳ​ມະ​ຊາດ ແລະ ສິ່ງ​ແວດ​ລ້ອມ ກ່ຽວ​ກັບ​ຜົນ​ການ​ຈັດ​ຕັ້ງ​ປະ​ຕິ​ບັດ​ຂໍ້​ຕົກ​ລົງ ຂອງ​ທ່ານ​ເຈົ້າ​ແຂວງວ່າ​ດ້ວຍ​ການ​ຄຸ້ມ​ຄອງ ແລະ ນຳ​ໃຊ້​ທີ່​ດິນ​ທົ່ວ​ແຂວງ ອັດ​ຕະ​ປື;

5).   ຮັບ​ຟັງ​ການ​ລາຍ​ງານ​ ກ່ຽວ​ກັບ​ຜົນ​ການ​ຈັດ​ຕັ້ງ​ປະ​ຕິ​ບັດ​ຂໍ້​ຕົກ​ລົງ​ຂອງ​ທ່ານ​ເຈົ້າ​ແຂວງ ວ່າ​ດ້ວຍກອງ​ທຶນ​ຊ່ວຍ​ເຫຼືອ​ເຊິ່ງ​ກັນແລະກັນ ຂອງ​ສະ​ຫະ​ພັນ​ກຳ​ມະ​ບານ​ແຂວງ;

6).  ບົດລາຍງານຂອງຄະນະປະຈໍາສະພາປະຊາຊົນແຂວງ ກ່ຽວກັບການຈັດຕັ້ງປະຕິບັດວຽກງານ ປະ​ຈຳ 6 ເດືອນ ຕົ້ນ​ປີ 2024 ແລະ ທິດ​ທາງ​ແຜນ​ການ 6 ເດືອນ ທ້າຍ​ປີ 2024 ຂອງສະພາປະຊາຊົນແຂວງ ຊຸດທີ II;         ນອກ​ຈາກນັ້ນ, ກອ​ງ​ປະ​ຊຸມ​ຍັງ​ຈະ​ໄດ້ຮັບຟັງການຊີ້​ແຈງເພີ່ມເຕີມ  ຈາກບັນດາພະແນກການທີ່ກ່ຽວຂ້ອງ ກ່ຽວກັບບັນຫາ​ທີ່​ພົ້ນ​ເດັ່ນ ຕໍ່ຄໍາຊັກຖາມ ຂອງຄະນະປະຈໍາສະພາປະຊາຊົນແຂວງ ​ເປັນ​ຕົ້ນແມ່ນ:  ພະ​ແນກ​ກະ​ສິ​ກຳ ແລະ ປ່າ​ໄມ້ ກ່ຽວກັບວຽກງານພັດທະນາຊົນນະບົດ ແລະ 1ລຶບລ້າງຄວາມທຸກຍາກພາຍໃນແຂວງ, ການປູກປ່າ, ຟື້ນຟູ 3 ປະເພດປ່າ, ແຜນຈັດສັນປ່າໄມ້ບ້ານ ລວມທັງແຜນຈັດສັນຟື້ນຟູປ່າໄມ້ຄືນໃໝ່ ຕາມແຄມແມ່ນໍ້າເຊປຽນ ທີ່ໄດ້ຮັບຜົນກະທົບເຂື່ອນແຕກ,  ພະ​ແນກ​ຊັບ​ພະ​ຍາ​ກອນ​ທຳ​ມະ​ຊາດ ແລະ ສິ່ງ​ແວດ​ລ້ອມ ກ່ຽວກັບໂຄງການລົງທຶນທີ່ລັດອະນຸຍາດໃຫ້ເຊົ່າ-ສໍາປະທານ ເພື່ອຂຸດຄົ້ນແຮ່ທາດ-ໂຄງການພັດທະນາເຂື່ອນໄຟຟ້າ, ພັດທະນາກະສິກໍາ ທີ່ໄດ້ຈັດຕັ້ງປະຕິບັດໄປແລ້ວ ແຕ່ຍັງບໍ່ທັນມີໃບຢັ້ງຢືນດ້ານສິ່ງແວດລ້ອມ,  ພະ​ແນກ​ພະ​ລັງ​ງານ ແລະ ບໍ່​ແຮ່ ກ່ຽວກັບການຄຸ້ມຄອງຂຸດຄົ້ນແຮ່ທາດ, ເຂື່ອນໄຟຟ້າ ທີ່ລັດຖະບານອະນຸຍາດ.​ປະທານກອງປະຊຸມ ຍັງໄດ້ຮຽກຮ້ອງມາຍັງບັນດາທ່ານ ສະມາຊິກສະພາປະຊາຊົນແຂວງ ຈົ່ງໄດ້ນໍາໃຊ້ສິດປະຊາທິປະໄຕ ແລະ ເຊີດຊູຄວາມຮັບຜິດຊອບການເມືອງຂອງຕົນ ໃນ​ການ​ສຸມ​ສະ​ຕິ​ປັນ​ຍາ​ເຂົ້າໃນການຄົ້ນຄວ້າ​ຢ່າງ​ເລິກ​ເຊິ່ງ, ປະກອບຄໍາເຫັນໃນທຸກໆບັນຫາຕ່າໆຢ່າງຖີ່ຖ້ວນ, ​ສ້າງ​ສັນ, ພາວະວິໄສ, ຮັດ​ກຸມ, ມີ​ເຫດ​ຜົນ, ແທດ​ຕົວ​ຈິງ, ບົນພື້ນຖານແນວທາງປ່ຽນ​ແປງ​ໃໝ່ຂອງພັກ, ກົດໝາຍຂອງລັດ, ລັດ​ຖະ​ທຳ​ມະ​ນູນ ແລະ ສອດຄ່ອງກັບສະ​ພາບ​ຄວາມ​ເປັນ​ຈິງ​ທາງ​ດ້ານ​ເສດ​ຖະ​ກິດ-ສັງ​ຄົມ ຂອງແຂວງ ກໍ່ຄືບັນດາເຂດເລືອກຕັ້ງເມືອງ​ໃນ​ປັດ​ຈຸ​ບັນ ເພື່ອເຮັດໃຫ້ເນື້ອໃນທີ່ນໍາມາພິຈາລະນາ, ຮັບຮອງ​ ໃນ​ກອງ​ປະ​ຊຸມຄັ້ງນີ້ ໃຫ້ມີຄຸນນະພາບ ແລະ ສາມາດນໍາໄປຈັດຕັ້ງປະຕິບັດຢ່າງເປັນຮູບປະທໍາ ແລະ ບັນລຸຜົນສໍາເລັດຕາມລະດັບຄາດໝາຍທີ່ວາງໄວ້.

(ວິນັດ)