ຕອນເຊົ້າຂອງວັນອັງຄານ, ວັນທີ 9 ມັງກອນ 2024, ຢູ່ທີ່ສະໂມສອນແຂວງ(ບ້ານເຈງ) ກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງອຸດົມໄຊ ຊຸດທີ II ໄດ້ໄຂຂຶ້ນຢ່າງເປັນທາງການ; ໂດຍພາຍໃຕ້ການເປັນປະທານຂອງທ່ານ ຄໍາດີ ວົງລ້ອມ ຮອງເລຂາຄະນະບໍລິຫານງານພັກແຂວງ, ປະທານສະພາປະຊາຊົນແຂວງ; ເປັນກຽດເຂົ້າຮ່ວມກອງປະຊຸມຄັ້ງນີ້ໂດຍມີທ່ານ ບຸນຄົງ ຫຼ້າຈຽມພອນ ກຳມະການສຳຮອງສູນກາງພັກ, ເລຂາຄະນະບໍລິຫານງານພັກແຂວງ ເຈົ້າແຂວງອຸດົມໄຊ; ມີຮອງເຈົ້າແຂວງ, ບັນດາທ່ານຄະນະປະຈຳພັກແຂວງ, ກໍາມະການພັກແຂວງ, ເຈົ້າເມືອງ 7 ເມືອງ; ສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 04, ສະມາຊິກສະພາປະຊາຊົນແຂວງ ຊຸດທີ II, ຫົວໜ້າ-ຮອງຫົວໜ້າພະແນກ; ບັນດາທ່ານອາດີດສະມາຊິກສະພາແຫ່ງຊາດ, ອາດີດສະມາຊິກສະພາປະຊາຊົນແຂວງ, ອາດີດການນໍາແຂວງ, ອົງການແນວລາວສ້າງຊາດແຂວງ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນ, 2 ກຳລັງປ້ອງກັນຊາດ-ປ້ອງກັນຄວາມສະຫງົບ, ບັນດາທະນາຄານທຸລະກິດ ແລະ ແຂກເຊີນ ເຂົ້າຮ່ວມ 163 ທ່ານ, ຍິງ 39 ທ່ານ.
ກອງປະຊຸມ, ທ່ານ ຄໍາດີ ວົງລ້ອມ ຮອງເລຂາຄະນະບໍລິຫານງານພັກແຂວງ, ປະທານສະພາປະຊາຊົນແຂວງ ໄດ້ມີຄໍາເຫັນກ່າວໄຂກອງປະຊຸມຄັ້ງນີ້ວ່າ: ກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງ ຊຸດທີ II ບັນດາທ່ານສະມາຊິກສະພາປະຊາຊົນແຂວງ ຈະໄດ້ສຸມໃສ່ຄົ້ນຄວ້າພິຈາລະນາ ແລະ ຕົກລົງບັນຫາສໍາຄັນພື້ນຖານຂອງແຂວງດັ່ງນີ້: ບົດລາຍງານໂດຍສັງເຂບຂອງທ່ານເຈົ້າແຂວງ ກ່ຽວກັບວຽກງານການບໍລິຫານລັດ ປະຈຳປີ 2023 ແລະ ທິດທາງແຜນການ ປະຈໍາປີ 2024; ບົດລາຍງານການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດຂອງແຂວງ ປະຈຳປີ 2023 ແລະ ທິດທາງແຜນການ ປະຈໍາປີ 2024; ການຈັດຕັ້ງປະຕິບັດ 2 ວາລະແຫ່ງຊາດ ວ່າດ້ວຍ ການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ວາລະແຫ່ງຊາດ ວ່າດ້ວຍ ການແກ້ໄຂບັນຫາຢາເສບຕິດ ໄລຍະຜ່ານມາ(2021-2023) ຂອງແຂວງອຸດົມໄຊ; ບົດລາຍງານສະພາບການເຄື່ອນໄຫວພົ້ນເດັ່ນ, ບັນຫາທີ່ເປັນຜົນກະທົບຕໍ່ຊີວິດການເປັນຢູ່ຂອງປະຊາຊົນ ຂອງພະແນກການຈຳນວນໜຶ່ງຕາມຄຳຖາມເຈາະຈີ້ມ. ບົດລາຍງານການເຄື່ອນໄຫວວຽກງານ ຂອງອົງການກວດສອບປະຈໍາພາກເໜືອ II ປະຈໍາປີ 2023 ແລະ ທິດທາງແຜນການ ປະຈໍາປີ 2024 ແລະ ຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2022; ບົດລາຍງານການເຄື່ອນໄຫວວຽກງານ ຂອງອົງການກວດກາລັດແຂວງ ປະຈໍາປີ 2023 ແລະ ທິດທາງແຜນການ ປະຈໍາປີ 2024 ແລະ ການກວດກາຕາມຜົນການກວດສອບ ປະຈໍາປີ 2021. ບົດລາຍງານຂອງອົງການໄອຍະການປະຊາຊົນແຂວງ ແລະ ສານປະຊາຊົນແຂວງ ກ່ຽວກັບການເຄື່ອນໄຫວວຽກງານ ປະຈຳປີ 2023 ແລະ ທິດທາງແຜນການ ປະຈໍາປີ 2024. ບົດລາຍງານຂອງຄະນະປະຈໍາສະພາປະຊາຊົນແຂວງ ກ່ຽວກັບການເຄື່ອນ ໄຫວວຽກງານ ປະຈຳປີ 2023 ແລະ ທິດທາງແຜນການ ປະຈໍາປີ 2024 ຂອງສະພາປະຊາຊົນແຂວງອຸດົມໄຊ ຊຸດທີ II. ພິຈາລະນາ, ຮັບຮອງເອົາການສ້າງນິຕິກຳໃຕ້ກົດໝາຍ ຈຳນວນ 4 ສະບັບຄື: ຮ່າງຂໍ້ຕົກລົງ ວ່າດ້ວຍ ການຄຸ້ມຄອງ ແລະ ນໍາໃຊ້ຊົນລະປະທານ ຢູ່ແຂວງອຸດົມໄຊ; ຮ່າງຂໍ້ຕົກລົງ ວ່າດ້ວຍ ລາຄາຫົວໜ່ວຍທົດແທນຄ່າເສຍຫາຍ ຈາກໂຄງການພັດທະນາ ຕາມແລວທາງເສດຖະກິດອາຊີຕາເວັນອອກສ່ຽງໃຕ້ ເພື່ອການເຊື່ມໂຍງ-ເຊື່ອມຈອດ ຢູ່ແຂວງອຸດົມໄຊ; ຮ່າງຂໍ້ຕົກລົງ ວ່າດ້ວຍລາຄາຫົວໜ໋ວຍນ້ຳປະປາ ຢູ່ແຂວງອຸດົມໄຊ ແລະ ຮ່າງຂໍ້ຕົກລົງ ວ່າດ້ວຍ ການມອບ ແລະ ຖອນສິດນໍາໃຊ້ທີດິນຂອງລັດ ຢູ່ແຂວງອຸດົມໄຊ ແລະ ຈະໄດ້ຮັບຟັງການປະກອບຄໍາເຫັນຈາກຄະນະປະຈໍາສະພາປະຊາຊົນແຂວງ, ຂອງປະທານແນວລາວສ້າງຊາດແຂວງ, ບັນດາທ່ານສະມາຊິກສະພາປະຊາຊົນແຂວງ. ພ້ອມນັ້ນ, ກອງປະຊຸມຍັງຈະໄດ້ຮັບຟັງການຊີ້ແຈງຂອງພາກສ່ວນກ່ຽວຂ້ອງຈໍານວນໜຶ່ງ ຕໍ່ຄໍາຊັກຖາມຂອງບັນດາສະມາຊິກສະພາປະຊາຊົນແຂວງ ຕື່ມອີກ.
ປະທານກອງປະຊຸມ, ໄດ້ຮຽກຮ້ອງມາຍັງບັນດາທ່ານສະມາຊິກສະພາປະຊາຊົນແຂວງ ຊຸດທີ II ຈົ່ງໄດ້ຍົກສູງຄວາມຮັບຜິດຊອບທາງການເມືອງ, ສຸມທຸກສະຕິປັນຍາ, ຄວາມຮູ້ຄວາມສາມາດຂອງຕົນເຂົ້າໃນການຄົ້ນຄວ້າ, ພິຈາລະນາປະກອບຄໍາເຫັນຢ່າງເລິກເຊິ່ງ ແລະ ມີຈຸດສຸມ ເຂົ້າໃສ່ແຕ່ລະເນື້ອໃນທີ່ນໍາມາພິຈາລະນາ, ຮັບປະກັນຄວາມຖືກຕ້ອງສອດຄ່ອງກັບແນວທາງນະໂຍບາຍຂອງພັກ-ລັດ, ລັດຖະທໍາມະນູນ, ກົດໝາຍ ແລະ ລະບຽບການ ຢ່າງສ້າງສັນ, ພາວະວິໄສ ແລະ ຄົບຖ້ວນ.
ພາບ/ຂ່າວ: ສະພາປະຊາຊົນແຂວງ.