ກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງຫຼວງນໍ້າທາຊຸດII ໄດ້ໄຂຂຶ້ນຢ່າງເປັນທາງການໃນຕອນເຊົ້າຂອງວັນທີ 10 ມັງກອນ 2024 ພາຍໃຕ້ການເປັນປະທ່ານ ຂອງທ່ານ ຄຳຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງ, ໃຫ້ກຽດເຂົ້າຮ່ວມມີທ່ານ ວຽງສະຫວັດ ສີພັນດອນ ກໍາມະການສູນກາງພັກ, ເລຂາພັກແຂວງ ເຈົ້າແຂວງໆ ຫຼວງນໍ້າທາ, ທ່ານ ປະລິຍາເອກ ພົນຈັດຕະວາ ວັນທອນ ສຸລິສັກ ຮອງຫົວໜ້າກົມໃຫຍ່ສັນຕິບານກະຊວງປ້ອງກັນຄວາມສະຫງົບ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ3, ມີອະດີດການນໍາຂອງແຂວງ, ບັນດາທ່ານອະດີດສະມາຊິກສະພາແຫ່ງຊາດປະຈໍາເຂດເລືອກຕັ້ງ, ອະດີດສະມາຊິກສະພາປະຊາຊົນແຂວງ, ອົງການແນວລາວສ້າງຊາດ, ສະຫະພັນນັັກຮົບເກົ່າ, ບັນດາທ່ານສະມາຊິກສະພາແຫ່ງຊາດ-ສະມາຊິກສະພາປະຊາຊົນແຂວງ, ແຂກຖືກເຊີນເຂົ້າຮ່ວມທັງໝົດ 150 ກວ່າທ່ານ.
ກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງ ຫລວງນໍ້າທາ ນີ້ຈະໄດ້ຮັບຟັງບັນຫາພົ້ນເດັ່ນໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມໃນໄລຍະ 1ປີຜ່ານມາ ແລະ ພິຈາລະນາຮັບຮອງເອົາບັນຫາສໍາຄັນພື້ນຖານຂອງແຂວງຄື; ພິຈາລະນາ, ຮັບຮອງ ບົດລາຍງານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈໍາປີ2023 ແລະ ແຜນການປະຈໍາປີ 2024, ພິຈາລະນາຮັບຮອງເອົາບົດລາຍງານແຜນງົບປະມານແຫ່ງລັດປະຈໍາປີ2023 ແຜນການປະຈໍາປີ2024, ບົດລາຍງານຂອງອົງການກວດກາລັດປະຈໍາປີ 2023, ແຜນການປະຈໍາປີ 2024, ຜົນຂອງການຕິດຕາມກວດກາຕາມຜົນຂອງການກວດສອບປີ2021, ບົດລາຍງານຂອງອົງການກວດສອບປະຈໍາພາກເໜືອປະຈໍາປີ 2023, ແຜນການ ປະຈໍາປີ2024, ຜົນຂອງການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານຂອງແຂວງຫຼວງນໍ້າທາປະຈໍາປີ2022, ບົດລາຍງານການຈັດຕັ້ງປະຕິບັດສອງວາລະແຫ່ງຊາດແຕ່ປີ2021-2023, ບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2023 ແລະ ແຜນການ ປະຈໍາປີ 2024 ຂອງອົງການໄອຍະການປະຊາຊົນ ແລະ ສານປະຊາຊົນແຂວງ; ພິຈາລະນາຮັບຮອງເອົາ ຂໍ້ຕົກລົງເຈົ້າແຂວງວ່າດ້ວຍການຄຸ້ມຄອງການຈັດງານ ແລະ ງານບຸນປະເພນີຕ່າງໆ ຢູ່ພາຍໃນແຂວງຫຼວງນໍ້າທາ ແລະ ບົດລາຍງານຂອງວຽກງານສະພາປະຊາຊົນແຂວງປະຈໍາປີ2023 ແລະ ແຜນການປະຈໍາປີ 2024; ພ້ອມນີ້; ຍັງຈະໄດ້ຮັບຟັງການຊີ້ແຈ້ງຂອງຂະແໜງການຕໍ່ຄໍາຊັກຖາມຂອງບັນດາທ່ານສະມາຊິກສະພາປະຊາຊົນແຂວງຕື່ມອີກ, ກອງປະຊຸມຈະດໍາເນີນເປັນເວລາ 3 ວັນ
ໂດຍ; ວັນນີ ແຝງບົວວັນ