ກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງ ຊຸດທີ II ໄດ້ເລີ່່ມໄຂຂຶ້ນໃນຕອນເຊົ້າ ວັນອັງຄານ ວັນທີ 22 ສິງຫາ 2023 ແລະ ດໍາເນີນມາເຖິງຕອນບ່າຍ ວັນພະຫັດ ວັນທີ 24 ສິງຫາ 2023 ເຊິ່ງໄດ້ໃຊ້ເວລາດໍາເນີນກອງປະຊຸມ ທັງໝົດ 03 ວັນເຕັມຈິ່ງສໍາເລັດຢ່າງສະຫງ່າງາມ ທີ່ສະໂມສອນສະພາປະຊາຊົນແຂວງ ເຊກອງ, ໂດຍພາຍໃຕ້ການເປັນປະທານຂອງທ່ານ ດົງເພັດ ພະຍົນ ຮອງເລຂາພັກແຂວງ, ປະທານສະພາປະຊາຊົນແຂວງ, ໃຫ້ກຽດເຂົ້າຮ່ວມໂດຍທ່ານ ເຫລັກໄຫລ ສີວິໄລ ກໍາມະການສູນກາງພັກ, ເລຂາພັກແຂວງ, ເຈົ້າແຂວງ ເຊກອງ, ມີບັນດາການນຳພັກ-ລັດ ຂັ້ນແຂວງ, ອະດີດການນຳຂອງແຂວງ, ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ, ສະມາຊິກສະພາປະຊາຊົນແຂວງ, ແນວລາວສ້າງຊາດ, ອົງການຈັດຕັ້ງມະຫາຊົນ, ນັກທຸລະກິດ ແລະ ແຂກຖືກເຊີນເຂົ້າຮ່ວມ 100 ກວ່າທ່ານ.

           ທ່ານ ດົງເພັດ ພະຍົນ ຮອງເລຂາພັກແຂວງ ປະທານສະພາປະຊາຊົນແຂວງ ໄດ້ກ່າວປິດກອງປະຊຸມ ຢ່າງເປັນທາງການວ່າ: ກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງ ຊຸດທີ II ໄດ້ບັນລຸຜົນສໍາເລັດຕາມຈຸດປະສົງລະດັບຄາດໝາຍທີ່ວາງໄວ້ ໂດຍໄດ້ພິຈາລະນາ ແລະ ຮັບຮອງເອົາຫຼາຍບັນຫາທີ່ສໍາຄັນຂອງທ້ອງຖິ່ນ ໂດຍໄດ້ອອກເປັນມະຕິຂອງກອງປະຊຸມ ຈໍານວນ 12 ສະບັບຄື: ມະຕິ ຮັບຮອງກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານຂອງທ້ອງຖິ່ນ ໄລຍະກາງສະໄໝຂອງແຜນການ 5 ປີ (2021-2025) ແລະ ທິດທາງແຜນການທ້າຍສະໄໝ ຂອງແຂວງ; ມະຕິ ຮັບຮອງກ່ຽວການຈັດຕັ້ງປະຕິບັດ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023 ຂອງແຂວງ; ມະຕິ ຮັບຮອງກ່ຽວກັບການຈັດຕັ້ງປະຕິບັດວຽກງານ ໄລຍະກາງສະໄໝຂອງແຜນການ 5 ປີ (2021-2025) ແລະ ທິດທາງແຜນການທ້າຍສະໄໝ ຂອງອົງການໄອຍະການແຂວງ; ມະຕິ ຮັບຮອງກ່ຽວກັບການຈັດຕັ້ງປະຕິບັດ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2023 ຂອງອົງການໄອຍະການປະຊາຊົນແຂວງ; ມະຕິ ຮັບຮອງກ່ຽວກັບການຈັດຕັ້ງປະຕິບັດວຽກງານ ໄລຍະກາງສະໄໝຂອງແຜນການ 5 ປີ (2021-2025) ແລະ ທິດທາງແຜນການທ້າຍສະໄໝ ຂອງສານປະຊາຊົນແຂວງ; ມະຕິ ຮັບຮອງກ່ຽວກັບການຈັດຕັ້ງປະຕິບັດ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2023 ຂອງສານປະຊາຊົນແຂວງ; ມະຕິ ຮັບຮອງກ່ຽວກັບການຈັດຕັ້ງປະຕິບັດວຽກງານ ໄລຍະກາງສະໄໝຂອງ ແຜນການ 5 ປີ (2021-2025) ແລະ ທິດທາງແຜນການທ້າຍສະໄໝ ຂອງສະພາປະຊາຊົນແຂວງ ແລະ ມະຕິ ຮັບຮອງການຈັດຕັ້ງປະຕິບັດ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2023 ຂອງສະພາປະຊາຊົນແຂວງ ; ມະຕິຮັບຮອງເອົາຮ່າງຂໍ້ຕົກລົງວ່າດ້ວຍການຄຸ້ມຄອງງົບປະມານການປະກອບສ່ວນຈາກຊຸມຊົນເຂົ້າໃນວຽກງານສຶກສາ ແລະ ມະຕິຮັບຮອງເອົາຮ່າງຂໍ້ຕົກລົງວ່າດ້ວຍການທົດແທນຄ່າເສຍຫາຍທີ່ຖືກຜົນກະທົບຈາກໂຄງການພັດທະນາພາຍໃນແຂວງເຊກອງ.

            ນອກນນີ້, ຍັງໄດ້ຮັບຟັງການລາຍງານ, ຊີ້ແຈງຕໍ່ຄໍາຖາມເຈາະຈີ້ມ ແລະ ຄໍາຊັກຖາມກັບທີ່ ຂອງສະມາຊິກສະພາປະຊາຊົນແຂວງ ກໍຄືປະຊາຊົນບັນດາເຜົ່າຊາວແຂວງເຊກອງ ຈາກທ່ານເຈົ້າແຂວງ, ຮອງເຈົ້າແຂວງ ແລະ ຈາກ 10 ພາກສ່ວນ ຄື: ພະແນກແຜນການ ແລະ ການລົງທຶນແຂວງ, ພະແນກການເງິນແຂວງ, ພະແນກອຸດສະຫະກໍາ ແລະ ການຄ້າແຂວງ, ພະແນກກະສິກໍາ ແລະ ປ່າໄມ້ແຂວງ, ພະແນກພະລັງງານ ແລະ ບໍ່ແຮ່ແຂວງ, ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ, ພະແນກສາທາລະນະສຸກແຂວງ, ພະແນກຍຸຕິທໍາແຂວງ, ກອງບັນຊາການ ປກສ ແຂວງ, ພະແນກສຶກສາທິການ ແລະ ກິລາແຂວງ ແລະ ທະນາຄານພັດທະນາລາວ.

            ທ່ານ ປະທານສະພາປະຊາຊົນແຂວງ ກ່າວຕື່ມອີກວ່າ: ຜົນສໍາເລັດຂອງກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນແຂວງ ຊຸດທີ II ຄັ້ງນີ້ ເປັນການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງອົງຄະນະພັກແຂວງ ເຂົ້າສູ່ຊີວິດຕົວຈິງ, ແມ່ນໝາກຜົນສະຕິປັນຍາ, ການຍົກສູງຄວາມຮັບຜິດຊອບທາງການເມືອງ ຂອງບັນດາທ່ານສະມາຊິກສະພາປະຊາຊົນແຂວງ, ຄວາມຕັດສິນໃຈສູງຂອງອົງການປົກຄອງແຂວງ, ພະແນກການ, ອົງການທີ່ກ່ຽວຂ້ອງຂັ້ນແຂວງ ທີ່ຈະສືບຕໍ່ພັດທະນາແຂວງເຊກອງ, ແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ໃຫ້ດີຂຶ້ນເທື່ອລະກ້າວ ຢ່າງໜັກແໜ້ນ ກອງປະຊຸມໄດ້ຮັບຜົນສໍາເລັດຢ່າງສະຫງ່າງາມ ກໍຍ້ອນມີການຊີ້ນໍາຢ່າງໃກ້ຊິດຈາກຄະນະປະຈໍາພັກແຂວງ ຍ້ອນຄວາມຮັບຜິດຊອບສູງ ຂອງອົງການປົກຄອງແຂວງ, ພະແນກການ, ບັນດາອົງການທີ່ກ່ຽວຂ້ອງ ແລະ ຂະແໜງການທີ່ກ່ຽວຂ້ອງ ທີ່ໃຫ້ການຮ່ວມມື ແລະ ສະໜັບສະໜູນ. ຕາງໜ້າຄະນະປະຈໍາສະພາປະຊາຊົນແຂວງ, ສະມາຊິກສະພາປະຊາຊົນແຂວງ ຂໍສະແດງຄວາມຂອບໃຈເປັນຢ່າງສູງ ມາຍັງຄະນະປະຈໍາພັກແຂວງ ທີ່ຍາມໃດກໍໄດ້ໃຫ້ການຊີ້ນໍາຢ່າງໃກ້ຊິດ ຕໍ່ສະພາປະຊາຊົນແຂວງໂດຍຕະຫຼອດມາ, ຂໍສະແດງຄວາມຂອບໃຈເປັນຢ່າງຍິ່ງ ມາຍັງບັນດາທ່ານການນໍາຂອງແຂວງ, ອະດີດການນໍາຂອງແຂວງ-ຂອງສະພາ, ແນວລາວສ້າງຊາດແຂວງ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນ ທີ່ໄດ້ໃຫ້ກຽດເຂົ້າຮ່ວມ ແລະ ປະຊາຊົນລາວບັນດາເຜົ່າພາຍໃນແຂວງ ທີ່ໄດ້ຕິດຕາມກອງປະຊຸມ ໃນຄັ້ງນີ້.

         ສະນັ້ນ, ເພື່ອສືບຕໍ່ຜັນຂະຫຍາຍຜົນສໍາເລັດຂອງກອງປະຊຸມໃນຄັ້ງນີ້ ຮຽກຮ້ອງມາຍັງອົງການປົກຄອງແຂວງ ໃຫ້ເອົາໃຈໃສ່ນໍາເອົາເນື້ອໃນທີ່ໄດ້ຄົ້ນຄວ້າ, ພິຈາລະນາ ແລະ ຮັບຮອງຢ່າງເປັນເອກະພາບກັນໃນກອງປະຊຸມ ໃຫ້ເປັນທິດທາງຈຸດສຸມໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານຂອງແຂວງໃຫ້ໄດ້ຮັບປະສິດທິຜົນສູງ, ຮຽກຮ້ອງບັນດາທ່ານຄະນະປະຈໍາ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງ, ສະມາຊິກສະພາປະຊາຊົນແຂວງ ແລະ ບັນດາຄະນະກໍາມະການ ສະພາປະຊາຊົນແຂວງ ໃຫ້ເອົາໃຈໃສ່ເພີ່ມທະວີໃນການຈັດຕັ້ງປະຕິບັດພາລະບົດບາດຂອງຕົນຢ່າງຕັ້ງໜ້າ ແລະ ຮຽກຮ້ອງບັນດາອົງການປົກຄອງ, ສອງກໍາລັງປະກອບອາວຸດ, ພະນັກງານ-ລັດຖະກອນ, ນັກທຸລະກິດ ແລະ ປະຊາຊົນບັນດາເຜົ່າຊາວແຂວງ ເຊກອງ ຈົ່ງເສີມຂະຫຍາຍມູນເຊື້ອອັນດີງາມຂອງແຂວງ, ປະຕິບັດໜ້າທີ່ວຽກງານຂອງຕົນດ້ວຍຄວາມຮັບຜິດຊອບສູງ ປະກອບສ່ວນເຮັດໃຫ້ສັງຄົມມີຄວາມສະຫງົບສີວິໄລ, ເສດຖະກິດມີການຂະຫຍາຍຕົວຢ່າງຕໍ່ເນື່ອງ ແລະ ປະຊາຊົນມີຄວາມຮັ່ງມີຜາສຸກ.

#ໂດຍ: ນາລີວັນ