ກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງຫລວງນໍ້າທາ ໄດ້ໄຂຂຶ້ນຢ່າງເປັນທາງການ ໃນຕອນເຊົ້າວັນທີ 2 ສິງຫາ 2023 ທີ່ສະໂມສອນຂອງແຂວງ ພາຍໃຕ້ການເປັນປະທານຂອງທ່ານ ຄຳຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງ ໃຫ້ກຽດເຂົ້າຮ່ວມຂອງທ່ານ ວຽງສະຫວັດ ສີພັນດອນ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງໆຫຼວງນໍ້າທາ, ທ່ານ ພົນຕີ ປອ ວົງສັກ ພັນທະວົງ, ກໍາມະການຄະນະປະຈໍາສະພາແຫ່ງຊາດປະທານກໍາມາທິການ ປກຊ-ປກສ, ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 3 ແຂວງຫຼວງນໍ້າທາ ມີບັນດາທ່ານການນໍາ, ອະດີດການນໍາພັກ-ລັດ, ບັນດາທ່ານການນໍາຂອງສະພາແຫ່ງຊາດ, ສະມາຊິກສະມາຊິກສະພາແຫ່ງຊາດປະຈໍາເຂດເລືອກຕັ້ງ, ສະມາຊິກສະພາປະຊາຊົນແຂວງ ແລະ ບັນດາທ່ານແຂກຖຶກເຊີນເຂົ້າຮ່ວມ 150 ກວ່າທ່ານ.

            ກອງປະຊຸມໄດ້ຮັບຟັງບົດລາຍງານໂດຍຫຍໍ້ຂອງທ່ານເຈົ້າແຂວງ ກ່ຽວກັບບັນຫາພົ້ນເດັ່ນ ໃນການຈັດຕັ້ງປະບັດແຜນພັດທະນາເສດຖະກິດ-ສັງຄົມ ໃນໄລຍະກາງສະໄໝ;ພິຈາລະນາ; ຮັບຮອງເອົາບົດລາຍງານ ກ່ຽວກັບການຈັດຕັ້ງປະບັດແຜນພັດທະນາເສດຖະ ກິດ-ສັງຄົມ, ແຜນງົບປະມານແຫ່ງລັດ ໄລຍະກາງສະໄໝ (2021-2023), 6 ເດືອນຕົ້ນປີ, ແຜນການທ້າຍສະໄໝ (2023-2025) ແລະ ແຜນການ 6 ເດືອນທ້າຍປີ 2023 ຂອງແຂວງ; ຮັບຟັງການຊີ້ແຈງ ຂອງອົງການປົກຄອງແຂວງ ຕໍ່ຄໍາຊັກຖາມຂອງຄະນະປະຈໍາສະພາປະຊາຊົນແຂວງ ກ່ຽວກັບການຄຸ້ມຄອງ-ນໍາໃຊ້ກອງທຶນປະກັນສຸຂະພາບ; ຮັບຟັງການຊີ້ແຈງ ຂອງອົງການປົກຄອງແຂວງ ກ່ຽວກັບການຄຸ້ມຄອງຮ້ານແລກປ່ຽນເງິນ ຕາ ແລະ ອັດຕາແລກປ່ຽນເງິນຕາຕ່າງປະເທດ ຢູ່ພາຍໃນແຂວງຫຼວງນໍ້າທາ; ພິຈາລະນາ ຮັບຮອງເອົາບົດລາຍງານ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ໄລຍະກາງສະໄໝ (2021-2023), 6 ເດືອນຕົ້ນປີ, ແຜນການທ້າຍສະໄໝ (2023-2025) ແລະ ແຜນການປະຈໍາ 6 ເດືອນທ້າຍປີ 2023 ຂອງອົງການໄອຍະການ ແລະ ສານປະຊາຊົນແຂວງ; ພິຈາລະນາ, ບົດລາຍງານ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ໄລຍະກາງສະໄໝ (2021-2023), ລະຫວ່າງສອງກອງປະຊຸມ, ແຜນການທ້າຍສະໄໝ (2023-2025) ແລະ ແຜນການ ຮອດກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງ; ຮັບຮອງເອົາບົດລາຍງານ ກ່ຽວກັບການປະເມີນຄວາມໄວ້ວາງໃຈ ການປະຕິ ບັດໜ້າທີ່ ຂອງບຸກຄະລາກອນ ທີ່ສະພາປະຊາຊົນແຂວງເລືອກຕັ້ງ ແລະ ຮັບຮອງເອົາການແຕ່ງຕັ້ງ.

ນອກນັ້ນ, ສະມາຊິກສະພາປະຊາຊົນແຂວງ ຍັງຈະໄດ້ສຸ່ມໃສ່ປະກອບຄຳຄິດເຫັນ ແລະ ຊັກຖາມຕໍ່ບົດລາຍງານຂອງອົງການປົກຄອງແຂວງ ແລະ ຈະໄດ້ຟັງການຊີ້ແຈງຂອງຂະແໜງການກ່ຽວຂ້ອງຈໍານວນໜຶ່ງ ຕໍ່ຄໍາຊັກຖາມຂອງບັນດາທ່ານສະມາຊິກສະພາປະຊາຊົນແຂວງ, ກອງປະຊຸມຈະໄດ້ດຳເນີນເປັນເວລາ 3 ວັນເຕັມ.

ໂດຍ; ວັນນີ ແຝງບົວວັນ