ກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນ ແຂວງອັດຕະປື ຊຸດທີ II ໄດ້ອັດລົງດ້ວຍຜົນສຳເລັດອັນຈົບງາມ​ ໃນຕອນບ່າຍຂອງວັນທີ 10 ກຸມພາ 2023 ນີ້ທີ່ຫ້ອງປະຊຸມສະພາປະຊາຊົນແຂວງໂດຍການເປັນປະທານຂອງທ່ານ ນາງ​ ມີນາພອນ​ ໄຊສົມພູ​ ຮອງເລຂາພັກແຂວງ, ປະທານສະພາປະຊາຊົນແຂວງອັດຕະປື; ເຂົ້າຮ່ວມ ມີການນຳພັກ-ລັດຂັ້ນສູງຂອງແຂວງ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງ​ທີ​17, ບັນດາສະມາຊິກສະພາປະຊາຊົນແຂວງ,​ບັນດາທ່ານ​ເຈົ້າເມືອງ, ອາດີດການນໍາພັກ-ລັດ​ແຂວງ​ ແລະ ພາກສ່ວນກ່ຽວຂ້ອງເຂົ້າຮ່ວມ.
ໃນວາລະປິດກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງ​ຊຸດທີ​ II. ທ່ານ ນາງ​ ມີນາພອນ​ ໄຊສົມພູ​ ໄດ້ກ່າວສູນທອນພົດປິດກອງປະຊຸມຢ່າງເປັນທາງການວ່າ: ​ ກອງປະຊຸມສະໄໝສາມັນເທື່ອ 4 ຂອງສະພາປະຊາຊົນແຂວງ ອັດຕະປື ຊຸດທີ II ໄດ້ບັນລຸຜົນສໍາເລັດຕາມຈຸດປະສົງ ແລະ ລະດັບຄາດໝາຍທີ່ວາງໄວ້,​ ໄດ້ພິຈາລະນາ ແລະ ຮັບຮອງເອົາບົດລາຍງານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ຂອງແຂວງ ປະຈໍາປີ 2022 ແລະ ທິດທາງແຜນການ ປະຈຳປີ 2023. ກອງປະຊຸມໄດ້ຕີລາຄາສຸງ ຕໍ່ຄວາມເປັນເອກະພາບ ແລະ ຄວາມພະຍາຍາມ ຂອງອົງການປົກຄອງແຂວງ, ອົງການຈັດຕັ້ງພັກ-ລັດ, ອົງການຈັດຕັ້ງສັງຄົມ ກໍ່ຄືປະຊາຊົນບັນດາເຜົ່າ ໃນການສູ້ຊົນເຮັດໃຫ້ອັດຕາການເຕີບໂຕທາງດ້ານເສດຖະກິດສາມາດບັນລຸໄດ້ 4,87% ການຈັດເກັບລາຍຮັບເຂົ້າງົບປະມານປະຕິບັດໄດ້ລື່ນແຜນ, ສາມາດຕອບສະໜອງດ້ານລາຍຈ່າຍໃຫ້ແກ່ການເຄື່ອນໄຫວວຽກງານຕ່າງໆຂອງແຂວງ ໄດ້ໂດຍພື້ນຖານ. ເຮັດໃຫ້ສາມາດຮັກສາໄດ້ສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບໂດຍພື້ນຖານ.ນອກນັ້ນ ກອງປະຊຸມຍັງມອບໃຫ້ອົງການປົກຄອງແຂວງ ນຳເອົາຄໍາຄິດເຫັນຂອງຜູ້ແທນກອງປະຊຸມນຳໄປພິຈາລະນາ ເພື່ອສືບຕໍ່ປັບປຸງແກ້ໄຂບັນຫາທີ່ຫຍຸ້ງຍາກທາງດ້ານເສດຖະກິດ-ການເງິນ ແລະ ບັນຫາອື່ນໆ ໃຫ້ກັບສູ່ສະພາບປົກກະຕິ.

ກອງປະຊຸມໄດ້ຮັບຟັງການລາຍງານ ຂອງອົງການປົົກຄອງແຂວງ ກ່ຽວກັບວຽກງານການຈັດຕັ້ງປະຕິບັດ 2 ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງີນ ແລະ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ. ໄລຍະຜ່ານມາເຫັນໄດ້ວ່າຄະນະພັກ, ຄະນະນໍາຂັ້ນແຂວງ-ເມືອງ ໄດ້ເປັນເຈົ້າການຈັດຕັ້ງຜັນຂະຫຍາຍບັນດາເນື້ອໃນຈິດໃຈຂອງມະຕິກອງປະຊຸມສະພາແຫ່ງຊາດ ໃຫ້ເປັນແຜນວຽກ, ແຜນງານຢ່າງລະອຽດ ເຂົ້າໃສ່ໃນຂົງເຂດວຽກງານທີ່ຕົນຮັບຜິດຊອບໄດ້ຮັບຜົນສຳເລັດເປັນກ້າວໆ, ເຊີ່ງສະແດງໃຫ້ເຫັນດ້ານການຜະລິດກະສິກໍາ ໄດ້ມີບາດກ້າວຂະຫຍາຍຕົວຕໍ່ເນື່ອງ; ບັນຫາຢາເສບຕິດໄດ້ຮັບການແກ້ໄຂຢ່າງຈີງຈັງ,​ມີການເຂົ້າຮ່ວມຢ່າງກວ້າງຂວາງ.

ກອງປະຊຸມໄດ້ຮັບຟັງການລາຍງານ ຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດວຽກງານແກ້ໄຂໄພພິບັດຢູ່ເມືອງສະໜາມໄຊ ແລະ ການສ້າງວິຊາຊີບ, ພັດທະນາສີມືແຮງງານ, ສ້າງວຽກເຮັດງານທຳໃຫ້ແກ່ປະຊາຊົນ ເພື່ອແກ້ໄຂບັນຫາການຫວ່າງງານ . ກອງປະຊຸມສະແດງຄວາມຍ້ອງຍໍຊົມເຊີຍຕໍ່ຄວາມພະຍາຍາມຂອງອົງການປົກຄອງແຂວງ, ຂະແໜງການທີ່ກ່ຽວຂ້ອງທຸກຂັ້ນ ທີ່ໄດ້ສຸມໃສ່ແກ້ໄຂວິກິດການຄັ້ງນີ້ໃຫ້ຜ່ານພົ້ນໄປໂດຍໄວ, ການຄຸ້ມຄອງການຊ່ວຍເຫຼືອຈາກພາກສ່ວນຕ່າງໆ ແລະ ການມີສວ່ນຮ່ວມຂອງສັງຄົມ, ການສ້າງເງື່ອນໄຂໃຫ້ຊາວໜຸ່ມມີວຽກເຮັດງານທຳ ມີວິຊາອາຊີບທີ່ໝັ້ນຄົງ ເຮັດໃຫ້ຊີວິດການເປັນຢູ່ຂອງປະຊາຊົນທີ່ຖືກຜົນກະທົບໄດ້ຮັບການປັບປຸງດີຂື້ນເທື່ອລະກ້າວ. ນອກນັ້ນ, ກອງປະຊຸມຍັງໄດ້ມອບໃຫ້ອົງການປົກຄອງແຂວງ ສືບຕໍ່ຊຸກຍູ້ຂະແໜງການທີ່ກ່ຽວຂ້ອງ ປັບປຸງແກ້ໄຂບັນຫາທີ່ຍັງຄົງຄ້າງ ຕາມການສະເໜີຂອງຜູ້ແທນກອງປະຊຸມ ເພື່ອເປັນການພື້ນພູຊີວິດການເປັນຢູ່ຂອງປະຊາຊົນ ໃຫ້ເຂົ້າສູ່ສະພາບປົກກະຕິໂດຍໄວ.

ກອງປະຊຸມໄດ້ພິຈາລະນາ ແລະ ຮັບຮອງເອົາບົດລາຍງານ ກ່ຽວກັບການຈັດຕັ້ງປະຕິບັດວຽກງານປະຈໍາປີ 2022 ແລະ ທິດທາງແຜນການ ປີ 2023 ຂອງອົງການກວດສອບປະຈໍາພາກໃຕ້; ບົດລາຍງານການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ປະຈຳປີ 2021 ແລະ ບົດລາຍງານ ກ່ຽວກັບການຈັດຕັ້ງປະຕິບັດວຽກງານ ປະຈໍາປີ 2022 ແລະ ທິດທາງແຜນການ ປີ 2023 ຂອງອົງການກວດກາລັດແຂວງ; ບົດລາຍງານຜົນການກວດສອບ ປະຈໍາປີ 2020. ເຊິ່ງກອງປະຊຸມໄດ້ສະແດງຄວາມຍ້ອງຍໍຊົມເຊີຍ ຕໍ່ອົງການກວດສອບປະຈໍາພາກໃຕ້, ອົງການກວດກາລັດແຂວງ ເອົາໃຈໃສ່ປະຕິບັດພາລະບົດບາດ ແລະ ໜ້າທີ່ຂອງຕົນຕາມລະບຽບກົດ ໝາຍ ໃຫ້ເຂັ້ມແຂງ. ພ້ອມນັ້ນ, ກອງປະຊຸມຍັງໄດ້ສະເໜີໃຫ້ 2 ​ອົງການເອົາໃຈໃສ່ປະສານສົມທົບກັບພາກສ່ວນທີ່ກ່ຽວຂ້ອງເອົາໃຈໃສ່ ແກ້ໄຂຜົນຂອງການກວດສອບທີ່ຍັງຄ້າງໃຫ້ໄດ້ຮັບການແກ້ໄຂໂດຍໄວ;

ກອງປະຊຸມໄດ້ພິຈາລະນາ ແລະ ຮັບຮອງເອົາບົດລາຍງານ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2022 ແລະ ທິດທາງແຜນການ ປີ 2023 ຂອງອົງການໄອຍະການປະຊາຊົນແຂວງ ແລະ ສານປະຊາຊົນແຂວງ. ກອງປະຊຸມໄດ້ຕີລາຄາ ຕໍ່ທັງສອງອົງການ ທີ່ໄດ້ມີຄວາມພະຍາຍາມປະຕິບັດພາລະບົດບາດ, ສິດ ແລະ​ ໜ້າທີ່ ຂອງຕົນ ດ້ວຍຄວາມຮັບຜິດຊອບສຸງ, ໄດ້ຍົກສຸງຄຸນນະພາບໃນການຕິດຕາມກວດກາ ແລະ ການດໍາເນີນຄະດີຕາມຂະບວນຍຸຕິທຳ. ກອງປະຊຸມສະເໜີໃຫ້ອົງການໄອຍະການປະຊາຊົນ ເອົາໃຈໃສ່ປະຕິບັດພາລະບົບດບາດໃນການຕິດຕາມກວດກາການຈັດຕັ້ງປະຕິບັດລັດຖະທຳມະນູນ ແລະ ກົດໝາຍ ຂອງເຈົ້າໜ້າທີ່ສືບສວນ-ສອບສວນ, ການດໍາເນີນຄະດີ, ການປະຕິບັດຄໍາຕັດສີນຂອງສານ ໃຫ້ຖືກຕ້ອງສອດຄອງຕາມລະບຽບກົດໝາຍ ແລະ ສານປະສານຊາຊົນແຂວງ ເອົາໃຈໃສ່ຍົກສຸງຄວາມຮູ້ຄວາມສາມາດທາງດ້ານທິດສະດີ ແລະ ວີຊາສະເພາະ ເພື່ອໃຫ້ແກ່ພະນັກງານ-ລັດຖະກອນ ໃຫ້ກາຍເປັນຜູ້ພິພາກສາທີ່ດີ-ເກັ່ງ, ການຄົ້ນຄ້ວາພິຈາລະນາສາມາດຮັບປະກັນຄວາມຖືກຕ້ອງ, ທັນເວລາ ແລະ ຍຸຕິທໍາ.

ກອງປະຊຸມໄດ້ພິຈາລະນາ ແລະ ຮັບຮອງເອົານິຕິກຳໃຕ້ກົດໝາຍ ຂອງອົງການປົກຄອງແຂວງ ຈໍານວນ 3 ສະບັບ ໃນນັ້ນມີ: (1) ຂໍ້ຕົກລົງຂອງທ່ານເຈົ້າແຂວງ ວ່າດ້ວຍສັນຍາແຮງງານ; (2) ຂໍ້ຕົກລົງຂອງທ່ານເຈົ້າແຂວງ ວ່າດ້ວຍການສ້າງ ແລະ ການຄຸ້ມຄອງຟາມລ້ຽງສັດ; (3) ຂໍ້ຕົກລົງຂອງທ່ານເຈົ້າແຂວງ ວ່າດ້ວຍການຄຸ້ມຄອງ ແລະ ການນໍາໃຊ້ຢາປາບສັດຕູພືດ; ການສ້າງນິຕິກໍາແມ່ນການຈັດຕັ້ງຜັນຂະຫຍາຍເນື້ອໃນກົດໝາຍໃຫ້ເປັນອັນລະອຽດ, ເປັນເຄື່ຶອງມືຮັບໃຊ້ພາຍໃນແຂວງ ເພື່ອຮັບປະກັນການປົກປ້ອງສິດ ແລະ ຜົນປະໂຫຍດຂອງປະຊາຊົນບັນດາເຜົ່າ. ກອງປະຊຸມໄດ້ສະເໜີໃຫ້ຄະນະຮັບຜິດຊອບສ້າງນິຕິກໍາໃຕ້ກົດໝາຍ ນຳເອົາເນື້ອໃນຄໍາຄິດຄໍາເຫັນຂອງຜູ້ແທນກອງປະຊຸມ ເພື່ອໄປປັບປຸງແກ້ໄຂໃຫ້ມີຄວາມຖືກຕ້ອງ ສອດຄ່ອງຕາມລະບຽບກົດໝາຍ ແລະ ສອດຄ່ອງກັບສະພາບເສດຖະກິດ-ສັງຄົມຂອງແຂວງພວກເຮົາ.

ກອງປະຊຸມໄດ້ພິຈາລະນາ ແລະ ຮັບຮອງເອົາບົດລາຍງານ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2022 ແລະ ທິດທາງແຜນການ ປີ 2023 ຂອງສະພາປະຊາຊົນຂັ້ນແຂວງ; ເຫັນວ່າຕະຫຼອດໄລຍະ 1 ປີຜ່ານມາ ສະພາປະຊາຊົນແຂວງ ໄດ້ເປັນເຈົ້າການດ້ວຍຄວາມຮັບຜິດຊອບໃນການຈັດຕັ້ງປະຕິບັດ ພາລະບົດບາດ, ສິດ ແລະ ໜ້າທີ່ ຂອງຕົນ ຕາມທີ່ໄດ້ກຳນົດໄວ້ໃນລັດຖະທຳມະນູນ ແລະ ກົດໝາຍ ໄດ້ຮັບຜົນສຳເລັດໃນຫຼາຍດ້ານເຮັດໃຫ້ພາລະບົດບາດ ຂອງສະພາປະຊາຊົນແຂວງ ນັບມື້ສຸງຂື້ນ, ໄດ້ຮັບຄວາມເຊື່ອໝັ້ນຈາກອົງການຈັດຕັ້ງພັກ-ລັດ ແລະ ສັງຄົມ ນັບມື້ນັບກວ້າງຂວາງ, ໄດ້ຮັບຄວາມໄວ້ເນື້ອເຊື່ອໃຈຈາກປະຊາຊົນຜູ້ມີສິດເລືອກຕັ້ງ. ກອງປະຊຸມສະເໜີໃຫ້ເອົາໃຈໃສ່ປະຕິບັດພາລະບົດບາດດ້ານການສ້າງ, ປັບປຸງນິຕິກໍາໃຕ້ກົດໝາຍ ແລະ ປະເມີນນິຕິກໍາທີ່ສະພາປະຊາຊົນແຂວງໄດ້ຮັບຮອງໄປ; ເພີ່ມທະວີການປະຕິບັດພາລະບົດບາດ ດ້ານການຕົກລົງບັນຫາພື້ນຖານຂອງທ້ອງຖີ່ນໃນການພິຈາລະນາ ແລະ ຮັບຮອງເອົາບັນຫາສໍາຄັນຂອງແຂວງ, ດ້ານການຕິດຕາມກວດກາຢ່າງມີຈຸດສຸມ ຮ່ວມກັບ ອົງການປົກຄອງແຂວງແກ້ໄຂບັນຫາຕ່າງໆຢ່າງທັນການ. ລວມທັງການນໍາເອົາເນື້ອໃນຜົນສໍາເລັດ ຂອງກອງປະຊຸມສະພາປະຊາຊົນຂັ້ນແຂວງ, ກໍ່ຄືມະຕິ, ຄໍາສັ່ງຂອງພັກ-ລັດ ໄປເຜີຍແຜ່ໃຫ້ຜູ້ມີສິດເລືອກຕັ້ງຮັບຮູ້ ແລະ ເຂົ້າໃຈຢ່າງກວ້າງຂວາງ.

ກອງປະຊຸມສະໄໝສາມັນເທື່ອ 4 ຄັ້ງນີ້ ໄດ້ພິຈາລະນາ ແລະ ຮັບຮອງເອົາການແຕ່ງຕັ້ງກົງຈັກບຸກຄະລາກອນຂອງແຂວງ ຕາມການສະເໜີ ຂອງທ່ານເຈົ້າແຂວງຄື: ແຕ່ງຕັ້ງ ທ່ານ ສະພາສິດ ລໍວັນໄຊ ເປັນຫົວໜ້າອົງການໄອຍະການປະຊາຊົນແຂວງ ອັດຕະປື.

ກອງປະຊຸມຍັງໄດ້ຮັບຟັງການຊີ້ແຈງຈາກບັນດາຂະແໜງການທີ່ກ່ຽວຂ້ອງຕໍ່ກັບຂໍ້ຊັກຖາມຂອງຄະນະປະຈໍາສະພາປະຊາຊົນແຂວງຕັ້ງຂື້ນ ແລະ ຕໍ່ການປະກອບຄໍາເຫັນຂອງສະມາຊິກສະພາປະຊາຊົນຂັ້ນແຂວງ.
ຕະຫຼອດໄລຍະ 4 ວັນ​ ຂອງການດໍາເນີນກອງປະຊຸມສະໄໝສາມັນເທື່ອ 4 ຂອງສະພາປະຊາຊົນແຂວງ ຊຸດທີ II ມີພໍ່ແມ່ປະຊາຊົນ ກໍ່ຄືຜູ້ມີສິດເລືອກຕັ້ງ ໂທເຂົ້າມາຍັງສາຍດ່ວນ ຈໍານວນ ທັງໝົດ 20 ສາຍ. ໃນນັ້ນ, ຂົງເຂດເສດຖະກິດ 15 ສາຍ; ຂົງເຂດວັດທະນະທໍາ-ສັງຄົມ 3 ສາຍ; ຂົງເຂດ ອົງການປົກຄອງແຂວງ 2 ສາຍ.

ຜົນສໍາເລັດຂອງການດໍາເນີນ ກອງປະຊຸມສະໄໝສາມັນເທື່ອ 4 ຂອງສະພາປະຊາຊົນແຂວງ ຊຸດທີ II ຄັ້ງນີ້ ແມ່ນໝາກຜົນລວມຍອດ ແຫ່ງການເສີມຂະຫຍາຍສະຕິປັນຍາລວມໝູ່, ການຍົກສູງຄວາມຮັບຜິດຊອບທາງດ້ານການເມືອງ ຂອງບັນດາທ່ານສະມາຊິກສະພາປະຊາຊົນແຂວງ, ບວກກັບຄວາມຕັດສີນໃຈ ຂອງອົງການປົກຄອງແຂວງ, ພະແນກການ, ອົງການທີ່ກ່ຽວຂ້ອງ ທີ່ພ້ອມກັນສືບຕໍ່ພັດທະນາແຂວງອັດຕະປື ໃນທ່າມກາງສະພາບທີ່ມີຄວາມຫຍຸ້ງຍາກທາງດ້ານເສດຖະກິດ-ການເງີນ ໃຫ້ບັນລຸຄາດໝາຍທີ່ວາງໄວ້ ແລະ ມີຜົນສຳເລັດເປັນຢ່າງດີ.

ກອງປະຊຸມສະໄໝສາມັນເທື່ອທີ4 ຂອງສະພາປະຊາຊົນແຂວງ ໄດ້ຮັບຜົນສໍາເລັດຢ່າງຈົບງາມກໍ່ຍ້ອນໄດ້ຮັບການຊີ້ນຳຈາກຢ່າງໃກ້ຊິດຈາກຄະນະປະຈຳພັກແຂວງ, ຍ້ອນຄວາມຮັບ ຜິດຊອບຂອງສະມາຊິກສະພາປະຊາຊົນແຂວງ, ອົງການປົກຄອງແຂວງ, ບັນດາພະແນກການ ແລະ ອົງການຈັດຕັ້ງຕ່າງໆທີ່ກ່ຽວຂ້ອງ,ທີ່ໃຫ້ການຮວ່ມມືເປັນຢ່າງດີ.
ຕາງໜ້າຄະນະປະຈຳສະພາປະຊາຊົນແຂວງ, ສະມາຊິກສະພາປະຊາຊົນແຂວງ ຂໍສະແດງຄວາມຂອບໃຈມາຍັງທ່ານເລຂາພັກແຂວງ, ຄະນະປະຈໍາພັກແຂວງ ທີ່ຍາມໃດກໍ່ໄດ້ໃຫ້ການຊີ້ນໍາຢ່າງໃກ້ຊິດຕໍ່ສະພາປະຊາຊົນແຂວງໂດຍຕະຫຼອດມາ; ຂໍສະແດງຄວາມຂອບໃຈມາຍັງທຸກພາກສ່ວນ ທີ່ໄດ້ປະກອບສ່ວນເຂົ້າໃນຜົນສໍາເລັດຂອງກອງປະຊຸມຄັ້ງນີ້ ເປັນຕົ້ນແມ່ນ: ອົງການປົກຄອງແຂວງ, ບັນດາພະແນກການທີ່ກ່ຽວຂ້ອງຂອງແຂວງ, ແນວລາວສ້າງຊາດແຂວງ, ອົງການຈັດຕັ້ງມະຫາຊົນ, ຕະຫຼອດຮອດ ກົງຈັກເສນາທິການ ຂອງສະພາປະຊາຊົນແຂວງ ທີ່ໄດ້ກະກຽມເນື້ອໃນຮອບດ້ານໃຫ້ແກ່ການດໍາເນີນກອງປະຊຸມຄັ້ງນີ້ທັນຕາມກຳນົດເວລາ, ພ້ອມກັນນີ້ ຂໍສະແດງຄວາມຂອບໃຈມາຍັງບັນດາທ່ານສະມາຊິກສະພາແຫ່ງຊາດ ປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ, ພະນັກງານ-ລັດຖະກອນ ຂອງສະພາປະຊາຊົນແຂວງ, ກໍາລັງ ປ້ອງກັນຊາດ-ປ້ອງກັນຄວາມສະຫງົບ, ພະນັກງານແພດໝໍ, ສື່ມວນຊົນທຸກສາຂາທີ່ນຳສະເໜີຂ່າວສານຜ່ານວິທະຍຸ ແລະ ສື່ເອເລັກໂຕນິກ ເຊີ່ງອຳນວຍຄວາມສະດວກ ໃນການຕິດຕາມການດໍາເນີນກອງປະຊຸມຂອງພວກເຮົາໃນຄັ້ງນີ້ ທັນຕາມກຳນົດເວລາ.

ສຸດທ້າຍນີ້, ຂໍອ່ວຍພອນໄຊອັນປະເສີດ ມາຍັງບັນດາທ່ານຄະນະປະຈຳພັກແຂວງ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງ, ສະມາຊິກສະພາປະຊາຊົນຂັ້ນແຂວງ, ບັນດາທ່ານການນໍາພັກ-ລັດ ຂອງແຂວງ, ອາດີດສະມາຊິກສະພາແຫ່ງຊາດປະຈໍາເຂດເລືອກຕັ້ງ, ບັນດາທ່ານແຂກທີ່ຖືກເຊີນທ່ານຍີງ-ທ່ານຊາຍ, ພະນັກງານ-ລັດຖະກອນ, ກໍາລັງປກຊ-ປກສ,​ ພະນັກງານແພດໝໍ, ຕະຫຼອດຮອດປະຊາຊົນລາວບັນດາເຜົ່າໃນທົ່ວແຂວງ ຈົ່ງມີສຸຂະພາບເຂັ້ມແຂງ, ແຂງແຮງມີຄວາມສຸກໃນຊີວິດຄອບຄົວ ແລະ ປະສົບຜົນສໍາເລັດໃນໜ້າທີ່ວຽກງານອັນມີກຽດຂອງທ່ານ.
ໃນໂອກາດສະຫງ່າລາສີນີ້, ຂ້າພະເຈົ້າ ຂໍປະກາດປິດກອງປະຊຸມສະໄໝສາມັນເທື່ອ 4 ຂອງສະພາປະຊາຊົນແຂວງ ຊຸດທີ II ຢ່າງເປັນທາງການ ນັບແຕ່ເວລານີ້ເປັນຕົ້ນໄປ. (ວິນັດ)