ໃນຕອນເຊົ້າຂອງວັນພຸດວັນທີ 10 ສິງຫາ 2022ສະພາປະຊາຊົນແຂວງວຽງຈັນ ໄດ້ໄຂກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງວຽງຈັນຊຸດທີ II ຂຶ້ນທີ່ສະໂມສອນໃຫຍ່ຫ້ອງວ່ການ ແຂວງວຽງຈັນ ໂດຍການເປັນປະທານຂອງທ່ານ ບຸນສອນ ເພັດລາວັນ ຮອງເລຂາພັກແຂວງ, ປະທານຄະນະສະມາຊິກສະພາປະຊາຊົນແຂວງວຽງຈັນ,ເປັນກຽດເຂົ້າຮ່ວມມີ ທ່ານ ຄໍາພັນ ສິດທິດໍາພາ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ-ເຈົ້າແຂວງ ແຂວງວຽງຈັນ , ທ່ານ ສຈ.ປອ ຈະເລີນ ເຍຍປາວເຮີ ກໍາມະການສູນກາງພັກ, ຮອງປະທານສະພາແຫ່ງຊາດ, ທັງເປັນສະມາ ຊິກສະພາແຫ່ງຊາດ ຊຸດທີ IX ປະຈໍາເຂດ ເລືອກຕັ້ງທີ10 ແຂວງວຽງຈັນ, ມີບັນດາທ່ານ ຄະນະປະຈໍາພັກແຂວງ, ກໍາມະການພັກແຂວງ, ສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 10 ແຂວງວຽງຈັນ, ສະມາຊິກສະພາປະຊາຊົນແຂວງ ຊຸດທີ II ,ເຈົ້າເມືອງ, ຮອງເຈົ້າເມືອງ 11 ເມືອງ, ຫົວໜ້າ-ຮອງຫົວໜ້າພະແນກການ, ອົງການ, ກົມກອງ, ອາດີດສະມາຊິກສະພາແຫ່ງຊາດ ຕະຫຼອດຮອດແຂກຖືກເຊີນເຂົ້າຮ່ວມຢ່າງພ້ອມພຽງ.
ກອງປະຊຸມຄັ້ງນີ້ ແມ່ນຈະໄດ້ ພິຈາລະນາ ແລະ ຮັບຮອງເອົາບັນຫາທີ່ສໍາຄັນພື້ນຖານທີ່ສໍາຄັນພື້ນຖານຂອງແຂວງດັ່ງນີ້:
- ພິຈາລະນາ ແລະ ຮັບຮອງເອົາບົດລາຍງານຂອງທ່ານເຈົ້າແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດຂັ້ນແຂວງ 6 ເດືອນຕົ້ນປີ ແລະ ແຜນພັດທະນາເສດຖະກິດ-ສັງຄົມ 6 ເດືອນ ທ້າຍປີ 2022,
- ຮັບຟັງການລາຍງານຂອງພະແນກແຜນການ ແລະ ການລົງທຶນ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ ແລະ ແຜນພັດທະ ນາເສດຖະກິດ-ສັງຄົມ 6 ເດືອນ ທ້າຍປີ 2022 ,
- ຮັບຟັງການລາຍງານຂອງພະແນກການເງິນ ກ່ຽວກັບການຈັດຕັ້ງປະຕິບັດ ແຜນງົບປະມານແຫ່ງລັດ ຂັ້ນແຂວງ 6 ເດືອນຕົ້ນປີ ແລະ ແຜນງົບປະມານ 6 ເດືອນ ທ້າຍປີ 2022,
- ພິຈາລະນາ ແລະ ຮັບຮອງເອົາ ການຈັດຕັ້ງປະຕິບັດແຜນການເຄື່ອນໄຫວ 6 ເດືອນຕົ້ນປີ ແລະ ທິດທາງແຜນການ 6 ເດືອນ ທ້າຍປີ 2022 ຂອງສະພາປະຊາຊົນແຂວງວຽງຈັນ ຊຸດທີ II,
- ຮັບຟັງການລາຍງານບັນຫາທີ່ພົ້ນເດັ່ນ ຂອງອົງການໄອຍະການ ແຂວງວຽງຈັນ 6 ເດືອນຕົ້ນປີ ແລະ ທິດທາງແຜນການ 6 ເດືອນ ທ້າຍປີ 2022,
- ຮັບຟັງການລາຍງານການເຄື່ອນໄຫວບັນຫາທີ່ພົ້ນເດັ່ນຂອງສານປະຊາຊົນແຂວງວຽງຈັນ 6 ເດືອນຕົ້ນປີ ແລະ ທິດທາງແຜນການ 6 ເດືອນ ທ້າຍປີ 2022,
- ຮັບຟັງການລາຍງານການຈັດຕັ້ງປະຕິບັດ 2 ວາລະແຫ່ງຊາດ ຢູ່ແຂວງວຽງຈັນ,
- ຮັບຟັງການລາຍງານການຄຸ້ມຄອງລາຄາສິນຄ້າຍຸດທະສາດ (ນໍ້າມັນເຊື້ອໄຟ ແລະ ເຄື່ອງບໍລິໂພກ)
ພ້ອມນັ້ນ, ກອງປະຊຸມຍັງໄດ້ຮັບຟັງການປະກອບຄໍາເຫັນຂອງຕາງໜ້າຄະນະປະຈໍາສະພາປະຊາຊົນແຂວງ ຕໍ່ກັບວຽກງານຂອງອົງການປົກຄອງແຂວງ ຕໍ່ກັບວຽກງານໄອຍະການປະຊາຊົນແຂວງ, ສານປະຊາຊົນແຂວງ, ການຈັດຕັ້ງປະຕິບັດ 2 ວາລະແຫ່ງຊາດ ແລະ ການຄຸ້ມຄອງລາຄາສິ້ນຄ້າຍຸດທະສາດ (ນໍ້າມັນເຊື້ອໄຟ ແລະ ເຄື່ອງບໍລິໂພກ) ນອກຈາກຈະໄດ້ຮັບຟັງການລາຍງານໃນຫົວຂໍ້ຕ່າງໆແລ້ວ ກອງປະຊຸມຈະໄດ້ຮັບຟັງການຊີ້ແຈງຈາກພາກສ່ວນກ່ຽວຂ້ອງຈໍານວນໜຶ່ງ ຕໍ່ຄໍາຊັກຖາມຂອງບັນດາທ່ານ ສະມາຊິກສະພາປະຊາຊົນແຂວງ. ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງວຽງຈັນ ຊຸດທີ II ໃນຄັ້ງນີ້ ຈະໄດ້ດໍາເນີນເປັນເວລາ 3 ວັນເຕັມ, ສະມາຊິກສະພາປະຊາຊົນແຂວງວຽງຈັນ ຊຸດທີ II ຈະໄດ້ນໍາໃຊ້ສິດປະຊາທິປະໄຕ ແລະ ເຊີດຊູຄວາມຮັບຜິດຊອບການເມືອງຂອງຕົນໃນການຄົ້ນຄວ້າ, ປະກອບຄໍາເຫັນ ຕໍ່ທຸກບັນຫາຢ່າງຖີ່ຖ້ວນຢ່າງພາວະວິໄສ ແລະ ເລິກເຊິ່ງບົນພື້ນຖານແນວທາງນະໂຍບາຍຂອງພັກ, ກົດໝາຍ ແລະ ສະພາບຄວາມເປັນຈິງທາງດ້ານເສດຖະກິດ-ສັງຄົມຂອງແຂວງເຮົາໃນປັດຈຸບັນ ເພື່ອເຮັດໃຫ້ເນື້ອໃນທີ່ນໍາມາພິຈາລະນາ, ຮັບຮອງໃນຄັ້ງນີ້ມີຄຸນນະພາບ ແລະ ສາມາດນໍາໄປຈັດຕັ້ງປະຕິບັດຢ່າງເປັນຮູບປະທໍາ ແລະ ເພື່ອເຮັດໃຫ້ກອງປະຊຸມຄັ້ງນີ້ ມີຄວາມສົມບູນ ແລະ ໜັກແໜ້ນ ຂໍເຊີນຊວນປະຊາຊົນລາວບັນດາເຜົ່າພາຍໃນແຂວງວຽງຈັນ ຈົ່ງຕິດຕາມການດໍາເນີນກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງຊຸດທີ II ຄັ້ງນີ້ ຈົນສໍາເລັດ ພ້ອມທັງເປີດກວ້າງໃຫ້ຜູ້ມີສິດເລືອກຕັ້ງ ມີຄໍາຄິດ ຄໍາເຫັນ ແລະ ສະເໜີຜ່ານໂທລະສັບສາຍດ່ວນ 023 156 ໃນໄລຍະດໍາເນີນກອງປະຊຸມນີ້ຕື່ມອີກ.
