ໃນຕອນເຊົ້າຂອງວັນອັງຄານ, ວັນທີ 09 ສິງຫາ 2022, ຢູ່ທີ່ສະໂມສອນແຂວງ(ບ້ານເຈງ) ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງອຸດົມໄຊ ຊຸດທີ II ໄດ້ໄຂຂຶ້ນຢ່າງເປັນທາງການ, ໂດຍພາຍໃຕ້ການເປັນປະທານຂອງທ່ານ ຄໍາດີ ວົງລ້ອມ ຮອງເລຂາຄະນະບໍລິຫານງານພັກແຂວງ, ປະທານສະພາປະຊາຊົນແຂວງ ອຸດົມໄຊ ຊຸດທີ II, ເປັນກຽດເຂົ້າຮ່ວມກອງປະຊຸມຄັ້ງນີ້ມີທ່ານ ບຸນຄົງ ຫຼ້າຈຽມພອນ ກຳມະການສຳຮອງສູນກາງພັກ, ເລຂາຄະນະບໍລິຫານງານພັກແຂວງ ເຈົ້າແຂວງອຸດົມໄຊ, ມີຮອງເຈົ້າແຂວງ, ບັນດາທ່ານຄະນະປະຈຳພັກແຂວງ, ກໍາມະການພັກແຂວງ, ສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 04 ແຂວງອຸດົມໄຊ, ສະມາຊິກສະພາປະຊາຊົນແຂວງ ຊຸດທີ II, ຫົວໜ້າ-ຮອງຫົວໜ້າພະແນກ, ບັນດາທ່ານອາດີດການນໍາຂັ້ນແຂວງ, ອາດີດສະມາຊິກສະພາແຫ່ງຊາດ, ອາດີດສະມາຊິກສະພາປະຊາຊົນແຂວງ, ບັນດາທ່ານຕາງໜ້າອົງການຈັດຕັ້ງພັກ-ລັດ, ອົງການແນວລາວສ້າງຊາດແຂວງ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນ, 2 ກຳລັງ ປກຊ-ປກສ, ບັນດາທະນາຄານທຸລະກິດ ແລະ ແຂກເຊີນ ເຂົ້າຮ່ວມຢ່າງພ້ອມພຽງ.

 ກອງປະຊຸມຄັ້ງນີ້ບັນດາທ່ານສະມາຊິກສະພາປະຊາຊົນແຂວງອຸດົມໄຊ ຊຸດທີ II ຈະໄດ້ສຸມໃສ່ຄົ້ນຄວ້າ, ພິຈາ ລະນາ ແລະ ຮັບຮອງເນື້ອໃນສໍາຄັນດັ່ງນີ້: ບົດລາຍງານໂດຍສັງເຂບຂອງ ທ່ານ ເຈົ້າແຂວງ ກ່ຽວກັບວຽກງານການບໍລິຫານລັດ ປະຈຳ 06 ເດືອນຕົ້ນປີ ແລະ ທິດທາງແຜນການ ປະຈໍາ 06 ເດືອນທ້າຍປີ 2022; ບົດລາຍງານການຈັດ ຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈຳ 06 ເດືອນຕົ້ນປີ ແລະ ທິດທາງແຜນການ ປະຈໍາ 06 ເດືອນທ້າຍປີ 2022; ບົດລາຍງານການຈັດຕັ້ງປະຕິບັດ ແຜນງົບປະມານແຫ່ງລັດ ປະຈຳ 06 ເດືອນຕົ້ນປີ ແລະ ທິດທາງແຜນການ ປະຈໍາ 06 ເດືອນທ້າຍປີ 2022. ຕິດພັນກັບການຈັດຕັ້ງວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ – ການເງິນ; ບົດລາຍງານ ການຈັດຕັ້ງປະຕິບັດວ່າລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ແລະ ການແກ້ໄຂປະກົດການຫຍໍ້ທໍ້ໃນສັງຄົມ ພາຍໃນແຂວງອຸດົມໄຊ; ບົດລາຍງານການ ຈັດຕັ້ງປະຕິບັດຂໍ້ຕົກລົງຂອງ ທ່ານ ເຈົ້າແຂວງ ວ່າດ້ວຍການຊົດເຊີຍຜົນກະທົບຈາກໂຄງການພັດທະນາແຄມນໍ້າກໍເຂດເທດສະບານເມືອງໄຊ ແລະ ການຊົດເຊີຍຜົນກະທົບຈາກໂຄງການກໍ່ສ້າງເສັ້ນທາງລົດໄຟ ລາວ-ຈີນ ຊ່ວງຜ່ານແຂວງອຸດົມໄຊ ນອກແລວແດງ; ບົດລາຍງານກ່ຽວກັບການແກ້ໄຂບັນຫາເສດຖະກິດ, ການຄຸ້ມຄອງລາຄາສິນຄ້າອຸປະໂພກ-ບໍລິໂພກ ແລະ ສະພາບຄວາມຫຍຸ້ງຍາກທາງດ້ານນໍ້າມັນເຊື້ອໄຟ ພາຍໃນແຂວງອຸດົມໄຊ; ບົດລາຍງານ ກ່ຽວກັບບັນຫາຮ້ານແລກປ່ຽນ, ການຄຸ້ມຄອງເງິນຕາ ແລະ ການແກ້ໄຂບັນ ຫາເງິນເຟີ້; ບົດລາຍງານ ການຈັດຕັ້ງປະຕິບັດ ຂໍ້ຕົກລົງຂອງ ທ່ານເຈົ້າແຂວງ ວ່າດ້ວຍການຄຸ້ມຄອງສະໜາມກິລາ ແຂວງອຸດົມໄຊ ສະບັບເລກທີ 69/ຈຂ.ອຊ, ລົງວັນທີ 29 ມັງກອນ 2021 ແລະ ການຈັດຕັ້ງປະຕິບັດວຽກງານກິລາ-ກາຍຍະກໍາ; ບົດລາຍງານຂອງຄະນະປະຈຳສະພາປະຊາຊົນແຂວງກ່ຽວກັບການເຄື່ອນໄຫວວຽກງານຂອງສະພາປະຊາຊົນແຂວງ ປະຈຳ 6 ເດືອນຕົ້ນປີ ແລະ ທິດທາງແຜນ ການ ປະຈໍາ 6 ເດືອນທ້າຍປີ 2022; ພິຈາລະນາຮັບຮອງເອົາການສ້າງນິຕິກໍາໃຕ້ກົດໝາຍ ຂໍ້ຕົກລົງຂອງ ທ່ານ ເຈົ້າແຂວງ ຈໍານວນ 2 ສະບັບ (ສ້າງໃໝ່ 1 ສະບັບ ແລະ ປັບປຸງ 1 ສະບັບ).

ນອກຈາກຈະໄດ້ຮັບຟັງການລາຍງານໃນຫົວຂໍ້ຕ່າງໆແລ້ວ, ຍັງຈະໄດ້ຮັບຟັງການຊີ້ແຈງຈາກພາກສ່ວນທີ່ກ່ຽວ ຂ້ອງຈໍານວນໜຶ່ງ ຕໍ່ຄໍາຊັກຖາມຂອງບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ ແຂວງອຸດົມໄຊ; ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງອຸດົມໄຊ ຊຸດທີ II ໃນຄັ້ງນີ້, ຈະດໍາເນີນ ເປັນເວລາ 2 ວັນເຕັມ ຈິ່ງຈະສໍາເລັດ.ພາບ/ຂ່າວ: ແສງພອນ ອິນນະລົງ.