(ສພຊ) ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ (ສພຊ) ຊຸດທີ VIII ເຊິ່ງດຳເນີນມາເປັນເວລາ 18 ວັນ ໄດ້ອັດລົງດ້ວຍຜົນສໍາເລັດອັນຈົບງາມ ໃນຕອນບ່າຍຂອງວັນພະຫັດທີ 28 ມິຖຸນາ 2018 ທີ່ຫ້ອງປະຊຸມສະພາແຫ່ງຊາດ (ຫລັກ 6), ນະຄອນຫລວງວຽງຈັນ ໂດຍການເປັນປະທານຂອງທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ, ເຂົ້າຮ່ວມມີທ່ານ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ; ມີທ່ານ ທອງລຸນ ສີສຸລິດ ນາຍົກລັດຖະມົນຕີ ແລະ ອະ ດີດການນຳຂັ້ນສູງຂອງພັກ-ລັດ, ບັນດານັກປະຕິວັດອາວຸໂສ, ຜູ້ຊົງຄຸນວຸດທິ, ສະມາຊິກສະພາແຫ່ງຊາດ (ສສຊ) ປະຈຳແຕ່ລະເຂດເລືອກຕັ້ງໃນທົ່ວປະເທດ, ອະດີດ ສສຊ, ຕາງໜ້າຈາກອົງການຈັດຕັ້ງພັກ-ລັດ, ອົງການຈັດຕັ້ງແນວລາວສ້າງຊາດ ແລະ ອົງການຈັດຕັ້ງມະຫາຊົນ, ຕາງໜ້າຂອງພາກສ່ວນຕ່າງໆ ແລະ ແຂກຖືກເຊີນເຂົ້າຮ່ວມ.

ທ່ານ ນາງ ປານີ ຢາທໍ່ຕູ້ ປະທານກອງປະຊຸມໄດ້ສະຫລຸບສັງລວມການປະກອບຄຳຄິດຄຳເຫັນ ແລະ ສະເໜີ ສສຊ ລົງຄະແນນສຽງຮັບຮອງເອົາແຕ່ລະມະຕິກອງປະຊຸມ ແລະ ກ່າວສູນທອນພົດອັດກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ VIII ຢ່າງເປັນທາງການ.

ກອງປະຊຸມ ໄດ້ພິຈາລະນາ ແລະ ຮັບຮອງເອົາບັນດາມະຕິ ຂອງກອງປະຊຸມສະພາແຫ່ງຊາດ ເປັນຕົ້ນ ຮ່າງມະຕິວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດປະຈຳ 4 ເດືອນ, ຄາດຄະເນການປະຕິບັດແຜນ 6 ເດືອນຕົ້ນປີ 2018 ແລະ ທິດທາງວຽກງານຈຸດສຸມ ປະຈຳ 6 ເດືອນທ້າຍປີ 2018 ແລະ ຮ່າງມະຕິວ່າດ້ວຍການຮັບຮອງເອົາແຜນແມ່ບົດການຈັດສັນທີ່ດິນແຫ່ງຊາດ ຮອດປີ 2030.

ຕະຫລອດໄລຍະດຳເນີນກອງປະຊຸມ ບັນດາທ່ານສະມາຊິກສະພາແຫ່ງຊາດ ໄດ້ເຊີດຊູຄວາມຮັບຜິດຊອບສູງໃນການຄົ້ນຄວ້າ, ປະກອບຄຳຄິດຄຳເຫັນຢ່າງມີເຫດຜົນ, ມີເນື້ອໃນເລິກເຊິ່ງ ແລະ ກວ້າງຂວາງ, ພ້ອມທັງມີຄວາມເປັນເອກະພາບສູງ ໃນການພິຈາລະນາ ແລະ ຮັບຮອງເອົາບັນດາເນື້ອໃນຕ່າງໆ. ກອງປະຊຸມຍັງໄດ້ພິຈາລະນາ ແລະ ຮັບຮອງເອົາຮ່າງກົດໝາຍ ຈໍານວນ 13 ສະບັບ, ໃນນັ້ນ ກົດໝາຍສ້າງໃໝ່ 5 ສະບັບ ແລະ ກົດໝາຍ ປັບປຸງ 8 ສະບັບ.