ໃນວັນທີ 29 ສິງຫາ 2023 ສະພາປະຊາຊົນແຂວງວຽງຈັນ ໄດ້ໄຂກອງປະຊຸມສະໄໜສາມັນເທື່ອທີ 5 ຂອງສະພາປະຊາຊົນແຂວງວຽງຈັນ ຊຸດທີ II ຂື້ນ ທີສະໂມສອນໃຫ່ຍຫ້ອງວ່າການແຂວງວຽງຈັນ ໂດຍການເປັນປະທານຂອງ ທ່ານ ບຸນສອນ ເພັດລາວັນ ຮອງເລຂາພັກແຂວງ,ປະທານຄະນະສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງແຂວງວຽງຈັນ ເປັນກຽດເຂົ້າຮ່ວມມີ ທ່ານ ຄໍາພັນ ສິດທິດໍາພາ ກໍາມະການສູນກາງພັກ,ເລຂາຄະນະບໍລິຫານງານພັກແຂວງ – ເຈົ້າແຂວງ ແຂວງວຽງຈັນ, ມີບັນດາທ່ານຄະນະປະຈໍາພັກແຂວງ,ກໍາມະການພັກແຂວງ,ສະມາຊິກສະພາແຫ່ງຊາດຊຸດທີ IX ປະຈໍາເຂດເລືອກຕັ້ງທີ 10 ແຂວງວຽງຈັນ, ສະມາຊິກສະພາປະຊາຊົນແຂວງວຽງຈັນ ຊຸດທີ II, ເຈົ້າເມືອງ, ຫົວໜ້າ-ຮອງຫົວໜ້າພະແນກການ, ອົງການ,ກົມກອງ ພະນັກງານຜູ້ຊົງຄຸນວຸດທິອາວຸໂສບໍານານ ທີ່ໄດ້ໃຫ້ກຽດເຂົ້າຮ່ວມຢ່າງພ້ອມພຽງ.
ກອງປະຊຸມໄດ້ຮັບຟັງບົດສູນທອນພົດ ເປີດກອງປະຊຸມສະໄໜສາມັນ ເທື່ອ 5 ຂອງສະພາປະຊາຊົນແຂວງວຽງຈັນ ຊຸດທີ II ຈາກທ່ານ ປະທານສະພາປະຊາຊົນແຂວງ ໄດ້ໄຂຂຶ້ນຢ່າງເປັນທາງການ ໃນທ່າມກາງບັນຍາກາດທີ່ທົ່ວພັກ-ລັດ,ທົ່ວປວງຊົນລາວທັງຊາດ ເວົ້າລວມ,ເວົ້າສະເພາະ ປະຊາຊົນບັນດາເຜົ່າຊາວແຂວງວຽງຈັນ ພວມສຸມໃສ່ຈັດຕັ້ງຜັນຂະຫຍາຍ ມະຕິກອງປະຊຸມໃຫ່ຍຄັ້ງທີ XI ຂອງພັກ, ມະຕິກອງປະຊຸມຄົບຄະນະ ຄັ້ງທີ 6 ຂອງຄະນະບໍລິຫານງານສູນກາງພັກ ສະໄໜທີ XI, ກໍ່ຄື ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ XI ກອງປະຊຸມສະໄໜສາມັນເທື່ອທີ່ 5 ຂອງສະພາປະຊາຊົນແຂວງວຽງຈັນ ຊຸດທີ II ກອງປະຊຸມໄດ້ຮັບຟັງການລາຍງານບັນຫາສໍາຄັນພື້ນຖານຂອງແຂວງ ດັ່ງນີ້:
1). ບົດລາຍງານໂດຍສັງເຂບຂອງ ທ່ານເຈົ້າແຂວງ ກ່ຽວກັບການຈັດຕັ້ງປະຕິບັດແຜນພັດທະເສດຖະກິດ-ສັງຄົມ ແລະ ແຜນງົບປະມານຂອງທ້ອງຖິ່ນ ໄລຍະກາງສະໄໜຂອງແຜນການ 5 ປີ (2021-2025), ທິດທາງແຜນການທ້າຍສະໄໜ; ການຈັດຕັ້ງປະຕິບັດ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2023.
2). ບົດລາຍງານ ຂອງພະແນກການແຜນການ ແລະ ການລົງທຶນແຂວງວຽງຈັນ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໄລຍະກາງສະໄໜຂອງແຜນການ 5 ປີ (2021-2025), ທິດທາງແຜນການທ້າຍສະໄໜ; ການຈັດຕັ້ງປະຕິບັດ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023.
3). ບົດລາຍງານ ຂອງພະແນກການເງິນແຂວງວຽງຈັນ ກ່ຽວກັບ ການຈັດຕັ້ງປະຕິບັດແຜນງົບປະມານແຫ່ງລັດຂອງແຂວງ ໄລຍະກາງສະໄໜຂອງແຜນການ 5 ປີ (2021-2025), ທິດທາງແຜນການທ້າຍສະໄໜ; ການຈັດຕັ້ງປະຕິບັດ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023.
4). ບົດລາຍງານ ກ່ຽວກັບການປະເມີນຄວາມໄວ້ວາງໃຈໃນການປະຕິບັດໜ້າທີ່ ຂອງບຸກຄະລາກອນທີ່ສະພາປະຊາຊົນແຂວງ ເລືອກຕັ້ງ ແລະ ຮັບຮອງເອົາການແຕ່ງຕັ້ງ
5). ບົດລາຍງານ ຂອງອົງການໄອຍະການແຂວງ ກ່ຽວກັບການຈັດຕັ້ງປະຕິບັດວຽກງານ ໄລຍະກາງສະ ໄໜຂອງແຜນການ 5 ປີ (2021-2025), ທິດທາງແຜນການທ້າຍສະໄໜ; ການຈັດຕັ້ງປະຕິບັດວຽກງານ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023.
6). ບົດລາຍງານ ຂອງສານປະຊາຊົນແຂວງ ກ່ຽວກັບ ການຈັດຕັ້ງປະຕິບັດວຽກງານ ໄລຍະກາງສະໄໜຂອງແຜນການ 5 ປີ (2021-2025), ທິດທາງແຜນການທ້າຍສະໄໜ; ການຈັດຕັ້ງປະຕິບັດ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023.
7). ບົດລາຍງານ ຂອງສະພາປະຊາຊົນແຂວງ ກ່ຽວກັບການຈັດຕັ້ງປະຕິບັດວຽກງານ ໄລຍະກາງສະໄໜຂອງແຜນການ 5 ປີ (2021-2025); ທິດທາງແຜນການທ້າຍສະໄໜ; ການຈັດຕັ້ງປະຕິບັດ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2023.
ນອກນັ້ນກອງປະຊຸມຈະໄດ້ພິຈາລະນາ, ຮັບຮອງເອົາ ບຸກຄະລະກອນທີ່ສໍາຄັນຈໍານວນໜື່ງຂອງອົງການປົກຄອງແຂວງ
ກອງປະຊຸມສະໄໜສາມັນເທື່ອທີ 5 ຂອງສະພາປະຊາຊົນແຂວງວຽງຈັນ ຊຸດທີ II ໃນຄັ້ງນີ້ຈະໄດ້ດໍາເນີນເປັນເວລາ 3 ວັນເຕັມ ສະມາຊິກສະພາປະຊາຊົນແຂວງ ຊຸດທີ II ຈະໄດ້ນໍາໃຊ້ສິດປະຊາທິປະໄຕ ແລະ ເຊີດຊູຄວາມຮັບຜິດຊອບຂອງຕົນໃນການຄົ້ນຄວ້າ,ປະກອບຄໍາເຫັນຢ່າງຖີ້ຖ້ວນ ຢ່າງພາວະວິໃສ ແລະ ເລິກເຊິ່ງບົນພື້ນຖານແນວທາງນະໂຍບາຍລະບຽບກົດໝາຍ ແລະ ສະພາບຄວາມເປັນຈິງທາງດ້ານເສດຖະກິດ – ສັງຄົມຂອງແຂວງວຽງຈັນໃນປະຈຸບັນ ເພື່ອເຮັດໃຫ້ເນື້ອໃນທີ່ຈະນໍາມາພິຈາລະນາ, ຮັບຮ້ອງໃນຄັ້ງນີ້ ມີຄວາມສົມບູນ ແລະ ໜັ້ກແໜ້ນຈື່ງຂໍເຊີນຊວນປະຊາຊົນບັນດາເຜົ່າ ພາຍໃນແຂວງວຽງຈັນ ຈົ່ງຕິດຕາມກອງປະຊຸມສະໄໜສາມັນເທື່ອ 5 ຂອງສະພາປະຊາຊົນແຂວງຊຸດທີ ll ຄັ້ງນີ້ ຈົນສໍາເລັດ ພ້ອມທັງເປີດກວ້າງໃຫ້ຜູ້ມີສິດເລືອກຕັ້ງ ມີຄໍາຄິດຄໍາເຫັນ ແລະ ສະເໜີຜ່ານໂທລະສັບສາຍດ່ວນ 023 156 ໃນໄລຍະດໍາເນີນກອງປະຊຸມນີ້ຕື່ມອີກ.
ພາບ-ຂ່າວ ບູລາຕີ, ຄໍາພັນ