ໃນວັນທີ 31 ມັງກອນ 2023 ສະພາປະຊາຊົນແຂວງວຽງຈັນ ໄດ້ໄຂກອງປະຊຸມສະໄໜສາມັນເທື່ອທີ 4 ຂອງສະພາປະຊາຊົນແຂວງວຽງຈັນ ຊຸດທີ II ຂື້ນ ທີສະໂມສອນໃຫ່ຍຫ້ອງວ່າການແຂວງວຽງຈັນ ໂດຍການເປັນປະທານຂອງ ທ່ານ ບຸນສອນ ເພັດລາວັນ ຮອງເລຂາພັກແຂວງ,ປະທານສະພາປະຊາຊົນແຂວງວຽງຈັນ ເປັນກຽດເຂົ້າຮ່ວມມີ ທ່ານ ຄໍາພັນ ສິດທິດໍາພາ ກໍາມະການສູນກາງພັກ,ເລຂາຄະນະບໍລິຫານງານພັກແຂວງ – ເຈົ້າແຂວງ ແຂວງວຽງຈັນ, ມີບັນດາທາ່ນ ຄະນະປະຈໍາພັກແຂວງ,ກໍາມະການພັກແຂວງ,ສະມາຊິກສະພາແຫ່ງຊາດຊຸດທີ IX ປະຈໍາເຂດເລືອກຕັ້ງທີ 10 ແຂວງວຽງຈັນ, ສະມາຊິກສະພາປະຊາຊົນແຂວງວຽງຈັນ ຊຸດທີ II, ເຈົ້າເມືອງ, ຫົວໜ້າ-ຮອງຫົວໜ້າພະແນກການ, ອົງການ,ກົມກອງ ພະນັກງານຜູ້ຊົງຄຸນວຸດທິອາວຸໂສບໍານານ ແລະ ບັນດາລັດວິສາຫະກິດ ທີ່ໄດ້ໃຫ້ກຽດເຂົ້າຮ່ວມຢ່າງພ້ອມພຽງ.

ກອງປະຊຸມຄັ້ງນີ້ ຈະໄດ້ພິຈາລະນາ, ຮັບຮອງເອົາບັນດາເນື້ອໃນສໍາຄັນຕ່າງໆ ດັ່ງນີ້:

1. ພິຈາລະນາ, ຮັບຮອງເອົາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມປະຈຳປີ 2022 ແລະ ທິດທາງປະຈຳປີ
2. ພິຈາລະນາ, ຮັບຮອງເອົາ ການຈັດຕັ້ງປະຕິບັດ ແຜນງົບປະມານແຫ່ງລັດຂອງແຂວງ ປະຈຳປີ 2022 ແລະ ທິດທາງ ປະຈຳປີ 2023.
3. ພິຈາລະນາ, ຮັບຮອງເອົາ ການຈັດຕັ້ງປະຕິບັດແຜນການເຄື່ອນໄຫວວຽກງານຂອງອົງການກວດສອບພາກກາງ ປະຈຳປີ 2022, ທິດທາງແຜນການເຄື່ອນໄຫວ ປະຈຳປີ 2023 ແລະ ບົດລາຍງານຜົນການກວດສອບບົດສະຫຼຸບຂາດຕົວງົບປະມານ ປະຈຳປີ 2021 ແລະ ເອກະສານລາຍງານການເງິນ ວິສາຫະກິດລັດລົງທຶນ ປະຈຳປີ 2021 ຂອງແຂວງວຽງຈັນ ແລະ ບົດລາຍງານ ການເຄື່ອນໄຫວວຽກງານ ປະຈຳປີ 2022 ແລະ ທິດທາງແຜນການເຄື່ອນໄຫວ ປະຈຳປີ 2023 ຂອງອົງການກວດກາລັດແຂວງວຽງຈັນ.
4. ພິຈາລະນາ, ຮັບຮອງເອົາ ການຈັດຕັ້ງປະຕິບັດວຽກງານ ປະຈຳປີ 2022 ແລະ ທິດທາງແຜນການ ປີ 2023 ຂອງອົງການໄອຍະການປະຊາຊົນແຂວງ ແລະ ສານປະຊາຊົນແຂວງວຽງຈັນ.
5. ພິຈາລະນາ, ຮັບຮອງເອົາ ຮ່າງຂໍ້ຕົກລົງ ຂອງທ່ານເຈົ້າແຂວງ ວ່າດ້ວຍ ການຄຸ້ມຄອງ ແລະ ນຳໃຊ້ຢາປາບສັດຕູພືດ ຂອງແຂວງວຽງຈັນ.
6. ພິຈາລະນາ, ຮັບຮອງເອົາ ຮ່າງຂໍ້ຕົກລົງຂອງທ່ານເຈົ້າແຂວງວ່າດ້ວຍການສະກັດກັ້ນແລະຫຼຸດຜ່ອນອຸບັດຕິເຫດຕາມເສັ້ນທາງບົກທົ່ວແຂວງວຽງຈັນ.
7. ພິຈາລະນາ, ຮັບຮອງເອົາ ການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈຳປີ 2022 ແລະ ທິດທາງແຜນການ ປີ 2023 ຂອງສະພາປະຊາຊົນແຂວງວຽງຈັນ ຊຸດທີ II

ນອກນັ້ນກອງປະຊຸມຍັງໃດ້ຮັບຟັງການລາຍງານບາງວຽກງານທີພົ້ນເດັ່ນຂອງແຂວງຈໍານວນໜື່ງເປັນຕົ້ນ: ແມ່ນບົດລາຍງານການປັບປຸງຄຸນນະພາບລະບົບການຮຽນ-ການສອນທຸກຊັ້ນທຸກສາຍ ໃນໄລຍະໃໜ່ ແລະ ການຄຸ້ມຄອງວຽກງານກິລາກາຍຍະກໍາ, ບົດລາຍງານການຈັດຕັ້ງປະຕິບັດວຽກງານ ທອ່ງທ່ຽວສີຂຽວ ແລະ ການເປີດປະເທດຕິດພັນກັບການປ້ອງກັນ ແລະ ຮ່ວມມືການແຜ່ລະບາດຂອງພະຍາດໂຄວິດ-19 ແລະ ບັນຫາສໍາຄັນອື່ນໆອິກຈໍານວນໜຶ່ງ.

ກອງປະຊຸມສະໄໜສາມັນເທື່ອທີ 4 ຂອງສະພາປະຊາຊົນແຂວງວຽງຈັນ ຊຸດທີ II ໃນຄັ້ງນີ້ຈະໄດ້ດໍາເນີນເປັນເວລາ 4 ວັນເຕັມ ສະມາຊິກສະພາປະຊາຊົນແຂວງ ຊຸດທີ II ຈະໄດ້ນໍາໃຊ້ສິດປະຊາທິປະໄຕ ແລະ ເຊີດຊູຄວາມຮັບຜິດຊອບຂອງຕົນໃນການຄົ້ນຄວ້າ,ປະກອບຄໍາເຫັນ ຢ່າງຖີ່ຖ້ວນ ຢ່າງພາວະວິໄສ ແລະ ເລິກເຊິ່ງ ບົນພື້ນຖານແນວທາງນະໂຍບາຍລະບຽບກົດໝາຍ,ກົດໝາຍ ແລະ ສະພາບຄວາມເປັນຈິງ ທາງດ້ານເສດຖະກິດ – ສັງຄົມຂອງແຂວງວຽງຈັນໃນປະຈຸບັນ ເພື່ອເຮັດໃຫ້ເນື້ອໃນທີ່ຈະນໍາມາພິຈາລະນາ,ຮັບຮ້ອງໃນຄັ້ງນີ້ ມີຄຸນນະພາບ ແລະ ສາມາດນໍາໄປຈັດຕັ້ງປະຕິບັດຢ່າງເປັນຮູບປະທໍາ ແລະ ເພື່ອເຮັດໃຫ້ກອງປະຊຸມຄັ້ງນີ້ ມີຄວາມສົມບູນ ແລະ ໜັ້ກແໜ້ນຈຶ່ງຂໍເຊີນຊວນປະຊາຊົນບັນດາເຜົ່າພາຍໃນແຂວງວຽງຈັນ ຈົ່ງຕິດຕາມກອງປະຊຸມສະໄໜສາມັນເທື່ອທີ 4 ຂອງສະພາປະຊາຊົນແຂວງວຽງຈັນ ຊຸດທີ II ຄັ້ງນີ້ ຈົນສໍາເລັດ ພ້ອມທັງເປີດກວ້າງໃຫ້ຜູ້ມີສິດເລືອກຕັ້ງ ມີຄໍາຄິດຄໍາເຫັນ ແລະ ສະເໜີຜ່ານໂທລະສັບສາຍດ່ວນ 023 156 ໃນໄລຍະດໍາເນີນກອງປະຊຸມນີ້ຕື່ມອີກ.