ພາຍຫຼັງດຳເນີນເປັນເວລາ 2 ວັນເຕັມ ເລິິ່ມແຕ່ວັນທີ 29-30 ທັນວາ 2021 ຢູ່ສະໂມສອນແຂວງ ກອງປະຊຸມສະໄໝສາມັນເທື່ອທີ 2 ຂອງສະພາປະຊາຊົນແຂວງຈໍາປາສັກ ໄດ້ອັດລົງດ້ວຍຜົນສໍາເລັດຢ່າງຈົບງາມ ໂດຍການເປັນປະທານຂອງ ທ່ານ ສາຍທອງ ໄຊຍະວົງ ປະທານສະພາປະຊາຊົນແຂວງ. ໃຫ້ກຽດເຂົ້າຮ່ວມ ມີ ທ່ານ ສົມມາດ ພົນເສນາ ກຳມະການສູນກາງພັກ ຮອງປະທານສະພາແຫ່ງຊາດ ທັງເປັນສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 15, ທ່ານ ປອ.ວິໄລວົງ ບຸດດາຄໍາ ກຳມະການສູນກາງພັກ ເຈົ້າແຂວງຈໍາປາສັກ, ບັນດາທ່ານຮອງປະທານສະພາປະຊາຊົນແຂວງ, ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 15 ແຂວງຈໍາປາສັກ, ປະຈໍາເຂດເລືອກຕັ້ງ 9 ເມືອງ, 1 ນະຄອນ, ການນໍາພະແນກການກົມກອງອ້ອມຂ້າງແຂວງ ແລະ ໜ່ວຍງານທີ່ກ່ຽວຂ້ອງ ເຂົ້າຮ່ວມ.ກອງປະຊຸມຄັ້ງນີ້, ໄດ້ຮັບຟັງການລາຍງານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2021 ແລະ ແຜນການ ປະຈໍາປີ 2022 ຈາກ ທ່ານ ປອ ວິໄລວົງ ບຸດດາຄໍາ ເຈົ້າແຂວງແຂວງຈໍາປາສັກ; ຮັບຟັງບົດລາຍງານຂອງອົງການກວດກາລັດ ປະຈໍາປີ 2021 ແລະ ທິດທາງແຜນການ ປະຈໍາປີ 2022, ຜົນການກວດກາຕາມຜົນການກວດສອບ ປີ 2019 ຈາກທ່ານ ປາດິດ ວັນນະລັດສະໝີ ປະທານອົງການກວດກາລັດແຂວງຈໍາປາສັກ; ບົດລາຍງານຂອງອົງການກວດສອບ ປະຈໍາພາກໃຕ້ ປະຈໍາປີ 2021 ແລະ ແຜນການ ປະຈໍາປີ 2022; ຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານຂອງປີ 2020 ຈາກ ທ່ານ ໄພທູນ ສີພູມມາ ປະທານອົງການກວດສອບ ປະຈໍາພາກໃຕ້; ຮັບຟັງການລາຍງານຂອງສານປະຊາຊົນພາກໃຕ້, ບົດລາຍງານຂອງອົງການໄອຍະການປະຊາຊົນພາກໃຕ້, ບົດລາຍງານຂອງສານປະຊາຊົນແຂວງຈໍາປາສັກ ແລະ ບົດລາຍງານຂອງອົງການໄອຍະການປະຊາຊົນແຂວງຈໍາປາສັກ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2021 ແລະ ທິດທາງແຜນການ ປະຈໍາປີ 2022. ຈາກນັ້ນ ຄະນະປະຈໍາສະພາ ແລະ ສະມາຊິກສະພາປະຊາຊົນແຂວງ ກໍໄດ້ຜັດປ່ຽນກັນປະກອບຄໍາເຫັນ ແລະ ເຈາະຈີ້ມປັນຫາຕ່າງໆທີ່ຍັງຄ້າງໃນແຕ່ລະວຽກງານ ເຊິ່ງການນໍາພະແນກການກົມກອງທີ່ກ່ຽວຂ້ອງ ກໍໄດ້ອະທິບາຍ-ໃຫ້ຄວາມກະຈ່າງແຈ້ງ ຕໍ່ບັນຫາທີ່ສະມາຊິກສະພາປະຊາຊົນແຂວງ ເຈາະຈີ້ມ-ຊັກຖາມ.
ພ້ອມນີ້ ກໍໄດ້ຮັບຟັງບົດລາຍງານຂອງສະພາປະຊາຊົນແຂວງຈໍາປາສັກ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2021 ແລະ ແຜນການ ປະຈໍາປີ 2022 ຈາກທ່ານ ສົມສີມະນີນິນ ຮອງປະທານສະພາປະຊາຊົນແຂວງຈໍາປາສັກ; ພ້ອມດຽວກັນ, ອົງການແນວລາວສ້າງຊາດແຂວງ ແລະ ສະມາຊິກສະພາປະຊາຊົນແຂວງ ກໍໄດ້ປະກອບຄໍາເຫັນ ຕໍ່ການເຄື່ອນໄຫວຂອງສະພາປະຊາຊົນແຂວງ.
ກອງປະຊຸມຄັ້ງນີ້ ຍັງໄດ້ຜ່ານຮ່າງມະຕິຂອງສະພາປະຊາຊົນແຂວງ ລວມມີ 9 ສະບັບຄື: #ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ປະຈໍາປີ 2021 ແລະ ແຜນງົບປະມານແຫ່ງລັດ ປະຈໍາປີ 2022 ຂອງແຂວງຈໍາປາສັກ; ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາບົດລາຍງານການເຄື່ອນໄຫວຈັດຕັ້ງປະຕິບັດວຽກງານ ປະຈໍາປີ 2021 ແລະ ແຜນການ ປະຈໍາປີ 2022 ຂອງສານປະຊາຊົນພາກໃຕ້, ອົງການໄອຍະການປະຊາຊົນພາກໃຕ້, ສານປະຊາຊົນແຂວງຈໍາປາສັກ ແລະ ຂອງອົງການໄອຍະການປະຊາຊົນແຂວງຈໍາປາສັກ; ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາການຈັດຕັ້ງປະຕິບັດວຽກງານ ປະຈໍາປີ 2021 ແລະ ແຜນການ ປະຈໍາປີ 2022, ຜົນການກວດກາຕາມຜົນການກວດສອບ ປີ 2019 ຂອງອົງການກວດກາລັດແຂວງຈໍາປາສັກ; ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາບົດລາຍງານການຈັດຕັ້ງປະຕິບັດວຽກງານ ປະຈໍາປີ 2021 ແລະ ແຜນການ ປະຈໍາປີ 2022, ຜົນການກວດສອບບົດສະຫຼຸບຂາດຕົວ ຂອງອົງການກວດສອບ ປະຈໍາພາກໃຕ້; ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາບົດລາຍງານການເຄື່ອນໄຫວ ປະຈໍາປີ 2021 ແລະ ແຜນການ ປີ 2022 ຂອງສະພາປະຊາຊົນແຂວງຈໍາປາສັກ ຈາກທ່ານ ທີບພະສອນ ສາມະເລິກ ເລຂາທິການສະພາປະຊາຊົນແຂວງ; ຈາກນັ້ນ, ສະມາຊິກສະພາປະຊາຊົນແຂວງ ກໍໄດ້ພິຈາລະນາ ແລະ ລົງຄະແນນສຽງ ຮັບຮອງເອົາມະຕິຂອງສະພາປະຊາຊົນແຂວງ 9 ສະບັບ ວ່າດ້ວຍການຮັບຮອງເອົາບັນຫາສໍາຄັນພື້ນຖານຂອງແຂວງ. ຕອນທ້າຍກອງປະຊຸມ ທ່ານ ສົມມາດ ພົນເສນາ ກຳມະການສູນກາງພັກ ຮອງປະທານສະພາແຫ່ງຊາດ ກໍໄດ້ມີຄໍາເຫັນໂອ້ລົມຊີ້ທິດເຍືອງທາງ ຕື່ມອີກ.
( ຂ່າວ-ພາບ: ສົມວິຈິດ ໄຊມົນຕີ)