ໃນຕອນເຊົ້າວັນທີ 1 ກຸມພາ 2022 ທີ່ຫ້ອງປະຊຸມສະພາປະຊາຊົນແຂວງໆສະຫວັນນະເຂດ ໄດ້ຈັດກອງປະຊຸມສະຫຼຸບຖອດຖອນບົດຮຽນໃນການກະກຽມ ແລະ ດໍາເນີນກອງປະຊຸມສະໄໝສາມັນເທື່ອທີ 02 ຂອງ ສະພາປະຊາຊົນແຂວງຊຸດທີ II ໂດຍການເປັນປະທານຂອງທ່ານ ກົງແກ້ວ ມີວໍລະຈັກ ຮອງເລຂາພັກແຂວງ ຄະນະປະຈຳສະພາປະຊາຊົນແຂວງ ປະທານສະພາປະຊາຊົນແຂວງ ເຂົ້າຮ່ວມມີບັນດາທ່ານຄະນະປະຈໍາສະພາປະຊາຊົນແຂວງ, ປະທານ-ຮອງປະທານຄະນະກຳມະການ, ຄະນະເລຂາທິການ, ຫົວໜ້າ-ຮອງຫົວໜ້າຂະແໜງ ພ້ອມດ້ວຍພະນັກງານວິຊາການພາຍໃນສະພາປະຊາຊົນແຂວງເຂົ້າຮ່ວມຢ່າງພ້ອມພຽງ.
ທ່ານ ບົວລົມ ອິນທິທະວົງ ຮອງເລຂາທິການສະພາປະຊາຊົນແຂວງ ກໍ່ໄດ້ຂຶ້ນຜ່ານຮ່າງບົດສະຫຼຸບຜົນສໍາເລັດການກະກຽມ ແລະ ດຳເນີນກອງປະຊຸມສະໄໝສາມັນ ເທື່ອທີ 2 ຂອງສະພາປະຊາຊົນແຂວງສະຫວັນນະເຂດ ຊຸດທີ II ວ່າ: ການກະກຽມ ແລະ ດຳເນີນກອງປະຊຸມສະໄໝສາມັນ ເທື່ອທີ 2 ຂອງສະພາປະຊາຊົນແຂວງ ຊຸດທີ II ໄດ້ດຳເນີນໄປໃນທ່າມກາງທີ່ທົ່ວພັກ, ທົ່ວກອງທັບ ແລະ ທົ່ວປວງຊົນຊາວແຂວງສະຫວັນນະເຂດ ສຸມໃສ່ການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງສູນກາງພັກ, ມະຕິກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງ, ບັນດາມະຕິຂອງກອງປະຊຸມສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ໃນໄລຍະຜ່ານມາ, ລວມທັງການຜັນຂະຫຍາຍຄໍາສັ່ງເລກທີ 15/ນຍ ແລະ ບັນດາແຈ້ງການຕ່າງໆ ຂອງຄະນະສະເພາະກິດ ຂັ້ນສູນກາງ ແລະ ຂັ້ນແຂວງ ກ່ຽວກັບການເພີ່ມທະວີມາດຕະການ ປ້ອງກັນ, ສະກັດກັ້ນ ແລະ ຄວບຄຸມ ການແຜ່ລະ ບາດພະຍາດໂຄວິດ-19 ທີ່ຍັງລະບາດໃນຊຸມຊົນ ແລະ ມີທ່າອ່ຽງເພີ່ມທີ່ຈະເພີ່ມຂຶ້ນໃນບາງເຂດບ້ານ, ເມືອງ ຊຶ່ງໄດ້ສົ່ງຜົນກະທົບ ຕໍ່ການພັດທະນາເສດຖະກິດ-ສັງຄົມຂອງແຂວງ ກໍ່ຄືປະເທດເຮົາຫຼາຍສົມຄວນ.
ກອງປະຊຸມສະໄໝສາມັນ ເທື່ອທີ 2 ຂອງສະພາປະຊາຊົນແຂວງ ຊຸດທີ II ໄດ້ດໍາເນີນເປັນເວລາ 3 ວັນ ນັບແຕ່ວັນທີ 12-14 ມັງກອນ 2022 ທີ່ຫໍວັດທະນະທໍາໄກສອນພົມວິຫານ ນະຄອນໄກສອນພົມວິຫານ ແຂວງສະຫວັນນະເຂດ ພາຍໃຕ້ການເປັນປະທານຂອງ ທ່ານ ກົງແກ້ວ ມີວໍລະຈັກ ຮອງເລຂາພັກແຂວງ ປະທານສະພາປະຊາຊົນແຂວງ, ມີສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13 ທີ່ປະຈຳຢູ່ສູນກາງ ເຂົ້າຮ່ວມທັງໝົດ 05 ທ່ານ, ຍິງ 01 ທ່ານ ແລະ ສະມາຊິກສະພາປະຊາຊົນແຂວງ ເຂົ້າຮ່ວມ 49 ທ່ານ, ຍິງ 15 ທ່ານ. ເຊິ່ງກອງປະຊຸມສະໄໝສາມັນເທື່ອທີ 02 ຂອງສະພາປະຊາຊົນແຂວງ ຊຸດທີ II ໄດ້ຄົ້ນຄ້ວາພິຈາລະນາໃນແຕ່ລະວຽກຄື:ວຽກງານ ຂອງອົງການປົກຄອງແຂວງ ມີ 7 ເນື້ອໃນ; ວຽກງານ ຂອງອົງການກວດສອບ ປະຈຳພາກກາງ ມີ 2 ເນື້ອໃນ; ວຽກງານ ຂອງອົງການກວດກາລັດແຂວງ ມີ 1 ເນື້ອໃນ; ວຽກງານ ຂອງອົງການໄອຍະການປະຊາຊົນແຂວງ ແລະ ສານປະຊາຊົນແຂວງ ມີ 1 ເນື້ອໃນ; ວຽກງານ ຂອງສະພາປະຊາຊົນແຂວງ ມີ 3 ເນື້ອໃນ.
ເຊິ່ງໄລຍະການດຳເນີນກອງປະຊຸມສະໄໝສາມັນ ເທື່ອທີ 2 ຂອງສະພາປະຊາຊົນແຂວງ ຊຸດທີ II, ມີຜູ້ມີສິດເລືອກຕັ້ງໂທເຂົ້າສາຍດ່ວນ ຕາມໝາຍເລກ 041 156 ສັງລວມໄດ້ 9 ສາຍ, ມີ 6 ເນື້ອໃນ ບັນຫາທີ່ສະເໜີ ແລະ ຕ້ອງການໃຫ້ຊ່ວຍແກ້ໄຂແມ່ນ: ບັນຫາການຊົດເຊີຍທີ່ດິນທີ່ໄດ້ຮັບຜົນກະທົບຈາກບັນດາໂຄງການຕ່າງໆ ແລະ ການປະຕິບັດໜ້າທີ່ວຽກງານຂອງເຈົ້າໜ້າທີ່ລັດ ຊຶ່ງມີ 4 ຄຳສະເໜີ ທີ່ພົວພັນໃນຂົງເຂດເສດຖະກິດຄື: ພະແນກຊັບ ພະຍາກອນທຳມະຊາດ ແລະ ສິ່ງແວດລ້ອມແຂວງ, ຮອງລົງມາແມ່ນໃນຂົງເຂດວັດທະນະທໍາ-ສັງຄົມມີ 1 ຄຳສະເໜີ ຄື: ພະແນກສາທາລະນາສຸກແຂວງ, ສ່ວນຄຳສະເໜີທີ່ພົວພັນເຖີງສະພາປະຊາຊົນແຂວງມີ 1 ຄຳສະເໜີ ທີ່ຢາກໃຫ້ຕິດຕາມກວດກາ ແລະ ຊຸກຍູ້ພາກສ່ວນທີ່ກ່ຽວຂ້ອງ ໃນການແກ້ໄຂຂໍ້ຂັດແຍ່ງ ລະຫວ່າງ ບໍລິສັດ ສ້ອມແປງຂົນສົ່ງ ແລະ ໂດຍສານທາງບົກ ກັບ ບໍລິສັດ ສູນກວດກາເຕັກນິກ ເຫຼົ່ານີ້ເປັນຕົ້ນ ຈາກບັນດາທ່ານຄະນະກຳມະການ ແລະ ວິຊາການ ໃນອະນຸກໍາມະການຕ່າງໆທີ່ຮັບໃຊ້ໃນການກະກຽມ ແລະ ດໍາເນີນກອງປະຊຸມສະໄໝສາມັນເທື່ອທີ 02 ຂອງສະພາປະຊາຊົນແຂວງສະຫວັນນະເຂດ ຊຸດທີII ກໍ່ໄດ້ມີການປະກອບຄຳຄິດ-ຄຳເຫັນຢ່າງກົງໄປກົງມາ ເຊິ່ງສາມາດສະຫຼຸບຕີລາຄາດ້ານດີ ແລະ ຂໍ້ຄົງການທີ່ຈະຕ້ອງໄດ້ພ້ອມກັນແກ້ໄຂໃຫ້ດີຂຶ້ນ.