(ສພຊ) – ຕອນບ່າຍວັນທີ 19 ຕຸລານີ້ ທີ່ຫໍປະຊຸມແຫ່ງຊາດ ໄດ້ມີກອງປະຊຸມສະມາຊິກລັດຖະສະພາເພດຍິງໄອປາ ຫຼື ໄວປາ (WAIPA) ໂດຍການເປັນປະທານຂອງທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດລາວ, ປະທານໄອປາ 45; ເຂົ້າຮ່ວມມີທ່ານ ນາງ ທຸມມາລີ ວົງພະຈັນ ປະທານກໍາມາທິການຍຸຕິທໍາ, ປະທານໄວປາ 45 ພ້ອມດ້ວຍບັນດາທ່ານຫົວໜ້າຄະນະຜູ້ແທນໄວປາ, ສະມາຊິກລັດຖະສະພາເພດຍິງ ແລະ ແຂກຖືກເຊີນ.

ທ່ານ ປອ. ໄຊສົມພອນ ພົມວິຫານ ໄດ້ຢືນຢັນເຖິງຄວາມສຳຄັນຂອງກອງປະຊຸມໄວປາ ເພາະເປັນເວທີທີ່ມີຄວາມໝາຍສໍາຄັນຂອງສະມາຊິກລັດຖະສະພາເພດຍິງຂອງບັນດາປະເທດສະມາຊິກອາຊຽນ ເພື່ອຍົກສູງບົດບາດ, ສົ່ງເສີມຄວາມສະເໝີພາບຍິງ-ຊາຍ, ສ້າງຄວາມເຂັ້ມແຂງໃຫ້ແກ່ແມ່ຍິງ ແລະ ພັດທະນາຄວາມກ້າວໜ້າຂອງແມ່ຍິງໃນເວທີການເມືອງຂອງພາກພື້ນ ແລະ ສາກົນຫຼາຍຂຶ້ນ ດ້ວຍການສ້າງນິຕິກຳ ແລະ ກົນໄກຕ່າງໆ; ທ່ານຍັງໄດ້ເນັ້ນໜັກອີກວ່າ: ກອງປະຊຸມໄວປາຄັ້ງນີ້ ຈະເປັນການສານຕໍ່ປະເພນີທີ່ໄດ້ປະຕິບັດຜ່ານມາ ແລະ ບັນດາຜູ້ແທນຈະພ້ອມກັນປຶກສາຫາລືກັນ ດ້ວຍຄວາມຮັບຜິດຊອບ ແລະ ຢ່າງສ້າງສັນ ຕາມວິຖີຂອງໄອປາ ເພື່ອເຮັດໃຫ້ກອງປະຊຸມໄວປາຄັ້ງນີ້ ປະສົບຜົນສໍາເລັດຕາມຈຸດປະສົງ ແລະ ລະດັບຄາດໝາຍທີ່ວາງໄວ້.

ໃນກອງປະຊຸມ ໄດ້ປຶກສາຫາລື ແລະ ແລກປ່ຽນຄໍາຄິດເຫັນເຊິ່ງກັນແລະກັນ ແລະ ຊອກຫາວິທີທາງຮ່ວມກັນ ໃນບັນຫາທີ່ພົວພັນເຖິງບົດບາດຂອງເພດຍິງໃນສັງຄົມ ພ້ອມທັງຜ່ານຮ່າງມະຕິກ່ຽວກັບການສົ່ງເສີມລັດຖະສະພາທີ່ເອົາໃຈໃສ່ບົດບາດຍິງ-ຊາຍ ເພື່ອປະຊາຄົມອາຊຽນທີ່ເຂັ້ມແຂງ, ເຊື່ອມຈອດ ແລະ ກວມລວມ; ຮ່າງມະຕິກ່ຽວກັບການສົ່ງເສີມການລຶບລ້າງຄວາມຮຸນແຮງຕໍ່ແມ່ຍິງ ແລະ ເດັກຍິງຂອງອາຊຽນ.

(ນາງ ອາລິນ ສຸພິມມະປະດິດ)