(ສພຊ) – ເພື່ອປະຕິບັດແນວທາງການຕ່າງປະເທດສັນຕິພາບ, ເອກະລາດ, ມິດຕະພາບ ແລະ ການຮ່ວມມືເພື່ອການພັດທະນາ, ຮັດແໜ້ນຄວາມສາມັກຄີລະຫວ່າງ ສປປລາວ ກັບບັນດາປະເທດໃນພາກພື້ນ ແລະ ສາກົນ; ກອງປະຊຸມສະພາທີ່ປຶກສາໄອປາ ກ່ຽວກັບໄພອັນຕະລາຍຂອງຢາເສບຕິດ (AIPA Advisory Council on Dangerous Drugs – AIPACODD) ຄັ້ງທີ 7 ພາຍໃຕ້ຫົວ ຂໍ້ “ເພີ່ມທະວີບົດບາດຂອງລັດຖະສະພາ ໃນການຮ່ວມມືເພື່ອແກ້ໄຂບັນຫາຢາເສບຕິດຢ່າງເປັນຮູບປະທໍາ” (Strengthening the Role of Parliaments in Addressing the Drug Matters for a Drug – Free ASEAN Realization) ໂດຍການເປັນເຈົ້າພາບຂອງ ສປປລາວ ໄດ້ໄຂຂຶ້ນຢ່າງເປັນທາງການໃນວັນທີ 7 ສິງຫາ 2024 ທີ່ໂຮງແຮມຫຼວງພະບາງວິວ, ນະຄອນຫຼວງພະບາງ ໂດຍການເປັນປະທານຂອງທ່ານ ຄຳໃບ ດຳລັດ ຮອງປະທານສະພາແຫ່ງຊາດ, ຕາງໜ້າປະທານກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຫຼື ໄອປາ ຄັ້ງທີ 45; ເຂົ້າຮ່ວມມີບັນດາປະເທດສະ ມາຊິກລັດຖະສະພາລະຫວ່າງຊາດອາຊຽນ ຄື: ບຣູໄນ, ກໍາປູເຈຍ, ອິນໂດເນເຊຍ, ມາເລເຊຍ, ຟີລິບປິນ, ສິງກະໂປ, ໄທ, ຫວຽດນາມ ແລະ ຕາງໜ້າຈາກລັດຖະສະພາມຽນມາ, ເລຂາທິການໃຫຍ່ໄອປາ ແລະ ກອງເລຂາໄອປາ, ບັນດາອົງການຈັດຕັ້ງທີ່ກ່ຽວຂ້ອງເຊັ່ນ: ກອງປະຊຸມເຈົ້າໜ້າທີ່ອາວຸໂສອາຊຽນ ກ່ຽວກັບບັນຫາຢາເສບຕິດ (ASEAN Senior Officials Meeting on Drug Matters – ASOD) ແລະ ອົງການສະຫະປະຊາຊາດ ເພື່ອຄວບຄຸມຢາເສບຕິດ (UNODC) ແລະ ບັນດາແຂກທີ່ຖືກເຊີນ.
ໃນພິທີເປີດກອງປະຊຸມ, ທ່ານ ຄຳຂັນ ຈັນທະວີສຸກ ເຈົ້າແຂວງໆຫຼວງພະບາງ ໄດ້ກ່າວຕ້ອນຮັບຄະນະຜູ້ແທນ, ທ່ານ ນາງ ຊິຕິ ໂຣໄຊເມຣິຢັນຕີ ດາໂຕະ ຮາຈິ ອັບດຸນ ຣາມັນ (Siti Rozaimeriyanty Dato Haji Abdul Rahman) ເລຂາທິການໃຫຍ່ໄອປາ ໄດ້ມີຄໍາເຫັນ; ຫຼັງຈາກນັ້ນ, ທ່ານ ຄຳໃບ ດຳລັດ ໄດ້ກ່າວສູນທອນພົດເປີດກອງປະຊຸມຢ່າງເປັນທາງການ ເຊິ່ງທ່ານໄດ້ສະ ແດງຄວາມຊົມເຊີຍ ແລະ ຕີລາຄາສູງຕໍ່ການຮ່ວມມືໃນຂອບອາຊຽນ ແລະ ໄອປາ ໃນໄລຍະຜ່ານມາ ທີ່ໄດ້ນໍາໃຊ້ກົນໄກ ແລະ ບັນດາມາດຕະການໃນການສະກັດກັ້ນ, ປາບປາມ, ຄວບຄຸມ, ແກ້ໄຂ ແລະ ທຳ ລາຍແຫຼ່ງການຜະລິດ, ການປຸງແຕ່ງ, ການຄ້າຂາຍ, ການລັກລອບຂົນສົ່ງ ກໍຄືການນຳໃຊ້ຢາເສບຕິດທີ່ຜິດກົດໝາຍ ເຮັດໃຫ້ບັນຫາຢາເສບຕິດຫຼຸດຜ່ອນລົງພໍສົມຄວນ ເຊິ່ງຫຼາຍປະເທດສະມາຊິກອາຊຽນ ກໍໄດ້ມີບົດຮຽນທີ່ດີໃນການປິ່ນປົວ, ບໍາບັດ ແລະ ຟື້ນຟູຜູ້ໄດ້ຮັບເຄາະຮ້າຍຈາກຢາເສບຕິດ ໃຫ້ກັບມາໃຊ້ຊີວິດເປັນປົກກະຕິໃນສັງຄົມ. ສຳລັບ ສປປລາວ ແມ່ນໄດ້ຖືເອົາວຽກງານການແກ້ໄຂບັນຫາຢາເສບຕິດ ເປັນວຽກງານສຳຄັນ ແລະ ສະພາແຫ່ງຊາດ ໄດ້ຮັບຮອງເອົາເປັນວາລະແຫ່ງຊາດ ມາແຕ່ປີ 2021; ຜ່ານການສຸມໃສ່ຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໃນໄລຍະປີ 2021-2023 ສາມາດສະກັດກັ້ນ ແລະ ແກ້ໄຂບັນຫາຢາເສບຕິດໄດ້ຫຼາຍກໍລະນີ. ດັ່ງນັ້ນ, ຈຶ່ງໄດ້ຕົກລົງສືບຕໍ່ຈັດຕັ້ງປະຕິບັດວາລະແຫ່ງຊາດດັ່ງກ່າວຕໍ່ໄປອີກໃນໄລຍະປີ 2024-2025 ເພື່ອເຮັດໃຫ້ບັນຫາຢາເສບຕິດຢູ່ ສປປລາວ ຫຼຸດລົງເທື່ອລະກ້າວ.”
ການເປັນເຈົ້າພາບຈັດກອງປະຊຸມຄັ້ງນີ້ ຍັງເປັນການຍົກສູງຖານະບົດບາດຂອງ ສປປລາວ ກໍຄືບົດບາດຂອງສະພາແຫ່ງຊາດ ໃຫ້ສູງເດັ່ນຂຶ້ນໃນເວທີພາກພື້ນ ແລະ ສາກົນ, ເປັນກາລະໂອກາດອັນດີໃນການໂຄສະນາແນວທາງນະໂຍບາຍອັນຖືກຕ້ອງຂອງພັກ ແລະ ລັດຖະບານ, ເປັນການເຮັດສໍາເລັດໜ້າທີ່ ແລະ ພັນທະຄວາມຮັບຜິດຊອບ ໃນຖານະທີ່ສະພາແຫ່ງຊາດລາວ ເປັນສະມາຊິກສົມບູນຂອງອົງການສະມັດຊາລັດຖະສະພາລະຫວ່າງຊາດອາຊຽນ ແລະ ປະຕິບັດຕາມຮອບວຽນໃນການຜັດປ່ຽນເປັນເຈົ້າພາບ; ທັງເພື່ອໂຄສະນາແຜນນະໂຍບາຍ, ລະບຽບກົດໝາຍ ແລະ ຍຸດທະສາດຂອງ ສປປລາວ ເພື່ອຕ້ານກັບບັນຫາຢາເສບຕິດ.
(ຂ່າວ: ບຸນເກີດ ວົງໄຊຍາ, ພາບ: ອານຸສອນ ພູມມີທອນ)