ວັນທີ 19 ມິຖຸນາ 2023 ທີ່ສຳນັກງານສະພາປະຊາຊົນແຂວງຄໍາມ່ວນ, ຄະນະເລຂາທິການສະພາປະຊາຊົນແຂວງຄໍາມ່ວນ ໄດ້ເປີດກອງປະຊຸມສະຫຼຸບວຽກງານການເຄື່ອນໄຫວຂອງຄະນະເລຂາທິການສະພາປະຊາຊົນແຂວງ ປະຈຳປີ 6 ເດືອນຕົ້ນປີ 2023, ໂດຍການເປັນປະທານຂອງທ່ານ ນາງ ອານົງໄຊ ສັງທອງເພັດ ຮອງເລຂາທິການສະພາປະຊາຊົນແຂວງ, ເປັນກຽດເຂົ້າຮ່ວມປະທານກິດຕິມະສັກຂອງ ທ່ານ ບຸນມີ ພິມມະສອນ ຮອງເລຂາພັກແຂວງ ປະທານສະພາປະຊາຊົນແຂວງຄໍາມ່ວນ, ມີຮອງປະທານສະພາປະຊາຊົນແຂວງ, ບັນດາທ່ານຄະນະປະຈໍາສະພາປະຊາຊົນແຂວງ, ຄະນະກຳມະການ, ຄະນະເລຂາທິການ, ຫົວໜ້າ/ຮອງຫົວໜ້າຂະແໜງ ແລະ ພະນັກງານວິຊາການ ພາຍໃນສະພາປະຊາຊົນແຂວງເຂົ້າຮ່ວມຢ່າງພ້ອມພຽງ.
ກອງປະຊຸມໃນຄັ້ງນີ້, ແມ່ນເພື່ອສະຫລຸບຕີລາຄາຄືນຜົນງານ, ຈຸດດີ, ຈຸດອ່ອນ ແລະ ຂໍ້ຄົງຄ້າງໃນການເຄື່ອນໄຫວວຽກງານ ປະຈໍາ 6 ເດືອນຕົ້ນປີ 2023 ແລະ ທິດທາງແຜນການ ປະຈໍາ 6 ເດືອນທ້າຍປີ 2023 ຂອງຄະນະເລຂາທິການ ສພຂ ຄໍາມ່ວນ, ໃນການເຮັດໜ້າທີ່ຕາມພາລະບົດບາດ, ສິດ ແລະ ໜ້າທີ່ເປັນເສນາທິການຮອບດ້ານໃຫ້ແກ່ ສະພາປະຊາຊົນແຂວງຄໍາມ່ວນ, ຄະນະປະຈໍາ ສພຂ, ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ ແລະ ຄະນະສະມາຊິກສະພາປະຊາຊົນແຂວງປະຈໍາເຂດເລືອກຕັ້ງເມືອງ.
ທ່ານ ນາງ ອານົງໄຊ ສັງທອງເພັດ ຮອງເລຂາທິການສະພາປະຊາຊົນແຂວງຄໍາມ່ວນ ຂຶ້ນຜ່ານບົດສະຫຼຸບ ປະຈໍາ 6 ເດືອນຕົ້ນປີ 2023
ໃນກອງປະຊຸມໄດ້ຮັບຟັງການຜ່ານຮ່າງບົດລາຍງານການເຄື່ອນໄຫວວຽກງານ ປະຈໍາ 6 ເດືອນຕົ້ນປີ 2023 ແລະ ທິດທາງແຜນການ ປະຈໍາ 6 ເດືອນ ທ້າຍປີ 2023 ຂອງຄະນະເລຂາທິການ ສະພາປະຊາຊົນແຂວງຄໍາມ່ວນ, ບົດສະເໜີ ກ່ຽວກັບການສ້າງຮ່າງມະຕິຂອງຄະນະເລຂາທິການວ່າດ້ວຍລະບຽບການຄຸ້ມຄອງພາຍໃນ ຄະນະເລຂາທິການສະພາປະຊາຊົນແຂວງຄໍາມ່ວນ ( ສະບັບສ້າງໃໝ່), ຂໍ້ຕົກລົງຂອງເຈົ້າແຂວງຄໍາມ່ວນ ສະບັບເລກທີ 853/ຈຂ, ລົງວັນທີ 26 ພຶດສະພາ 2023 ວ່າດ້ວຍການຍ້ອງຍໍ ບຸກຄົນທີ່ມີຜົນງານເຂົ້າໃນຂະບວນການ ແຂ່ງຂັນ-ຍ້ອງຍໍ ຮັກຊາດ ແລະ ພັດທະນາປະຈໍາປີ 2022, ຂໍ້ຕົກລົງ ຄະນະເລຂາທິການສະພາປະຊາຊົນແຂວງຄໍາມ່ວນ ສະບັບເລກທີ 993/ຄລຂ.ຄມ, ລົງວັນທີ 14 ມິຖຸນາ 2023 ວ່າດ້ວຍການຍ້ອງຍໍ ບຸກຄົນທີ່ມີຜົນງານ ເຂົ້າໃນຂະບວນການ ແຂ່ງຂັນ-ຍ້ອງຍໍ ຮັກຊາດ ແລະ ພັດທະນາ ປະຈໍາປີ 2022 ແລະ ຜ່ານຮ່າງບົດບັນທຶກກອງປະຊຸມວຽກງານຄະນະເລຂາທິການສະພາປະຊາຊົນແຂວງຄໍາມ່ວນ ປະຈໍາ 6 ເດືອນທ້າຍປີ 2023, ຈາກນັ້ນ, ຄະນະຜູ້ແທນເຂົ້າຮ່ວມກອງປະຊຸມຍັງໄດ້ປະກອບຄໍາຄິດຄໍາເຫັນ ຢ່າງມີບັນຍາກາດອັນຟົດຟື້ນ ແລະ ເປັນເຈົ້າການເຂົ້າໃສ່ເນື້ອໃນຄັ້ງນີ້ ໃຫ້ມີອັນຄົບຖ້ວນສົມບູນເລິກເຊິ່ງຖືກຕ້ອງ, ສອດຄ່ອງກັບສະພາບຄວາມເປັນຈິງ ທັງເປັນບ່ອນອີງໃຫ້ແກ່ການຈັດຕັ້ງປະຕິບັດວຽກງານໃນຕໍ່ໜ້າໃຫ້ໄດ້ຮັບປະສິດທິພາບ ແລະ ປະສິດທິຜົນດີຂຶ້ນເປັນກ້າວໆ, ຈາກນັ້ນ, ຍັງໄດ້ມີ ພິທິມອບໃບຍ້ອງຍໍບຸກຄົນທີ່ມີຜົນງານເຂົ້າໃນຂະບວນການ ແຂ່ງຂັນ-ຍ້ອງຍໍ ຮັກຊາດ ແລະ ພັດທະນາ ປະຈໍາປີ 2022.
ໃນໂອກາດດັ່ງກ່າວນີ້, ທ່ານ ບຸນມີ ພິມມະສອນ ປະທານສະພາປະຊາຊົນແຂວງຄໍາມ່ວນ ໄດ້ມີຄໍາເຫັນໂອ້ລົມ ທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້ໃນໄລຍະ 6 ເດືອນຕົ້ນປີ 2023 ໃນການຈັດຕັ້ງປະຕິບັດໜ້າທີ່ວຽກງານເຊິ່ງສະຫລຸບຕີລາຄາຄືນຜົນງານ, ຈຸດດີ, ຈຸດອ່ອນ ແລະ ຂໍ້ຄົງຄ້າງ ໃນວຽກງານຜ່ານມາ, ແຕ່ນັ້ນກໍ່ເປັນພຽງຜົນສໍາເລັດໃນເບື້ອງຕົ້ນຈົ່ງສືບຕໍ່ຜັນຂະຫຍາຍທິດທາງແຜນການ 6 ເດືອນທ້າຍປີ 2023 ຫັນເຂົ້າສູ່ລົງເລິກໃນການຈັດຕັ້ງປະຕິວຽກງານໃຫ້ໄດ້ຕາມທິດທາງແຜນການເຄື່ອນໄຫວທີ່ວາງໄວ້ ແລະ ສືບຕໍ່ເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ພະນັກງານ-ລັດຖະກອນທີ່ຢູ່ໃນຄວາມຮັບຜິດຊອບຂອງຕົນ ໃຫ້ເປັນປົກກະຕິ, ພ້ອມນັ້ນ, ປະທານ ສພຂ ໄດ້ເນັ້ນໜັກຕື່ມໃຫ້ເອົາໃຈໃສ່ຍົກສູງສ້າງຂີດຄວາມສາມາດວຽກງານເປັນເສນາທິການຮອບດ້ານບົນພື້ນຖານກົດໝາຍ ທັງຕ້ອງຄົ້ນຄວ້ານິຕິກຳໃຫ້ເລິກເຊິ່ງ, ເອົາໃຈໃສ່ປະຕິບັດໜ້າທີ່ທັງຕິດຕາມກວດກາລະອຽດໃນການເຄື່ອນໄຫວວຽກງານຂອງຄະນະເລຂາທິການ ແລະ ຂະແໜງການຢ່າງເປັນປົກກະຕິຕໍ່ເນື່ອງໃນການເປັນເສນາທິການໃຫ້ໄດ້ຮັບຜົນດີ, ໃນແຕ່ລະດ້ານ ບັນລຸຜົນສໍາເລັດ ແລະ ມີປະສິດຜົນສູງຂຶ້ນກວ່າເກົ່າ.
ໂດຍ: ເອື້ອ ມະໂນສິງ.