ໃນວັນທີ 7 ມິຖຸນາ 2023 ຢູ່ທີີີ່ຫ້ອງປະຊຸມສະພາປະຊາຊົນແຂວງ ໄດ້ເປີດກອງປະຊຸມຮ່ວມລະຫວ່າງກຳມາທິການບັນດາເຜົ່າສະພາແຫ່ງຊາດ ກັບສະພາປະຊາຊົນແຂວງຊຽງຂວາງ ເພື່ອເກັບກຳຂໍ້ມູນການຈັດຕັ້ງປະຕິບັດວຽກງານຊົນເຜົ່າ, ວຽກງານສາສະໜາ, ວຽກງານພັດທະນາຊົນນະບົດ ແລະ ວຽກງານແກ້ໄຂຄວາມທຸກຍາກ ປະຈຳປີ 2023 ພາຍໃຕ້ການເປັນປະທານຮ່ວມຂອງທ່ານ ແກ້ວຈະເລີນ ເຊ່ຍຢີ້ງຢ່າງ ຮອງປະທານກຳມາທິການບັນດາເຜົ່າສະພາແຫ່ງຊາດ ແລະ ທ່ານ ນ. ສົມພອນ ໂສພິລາວັນ ຮອງປະທານສະພາປະຊາຊົນແຂວງ; ເປັນກຽດເຂົ້າຮ່ວມຂອງທ່ານ ນ. ບົວສີ ນາຖາວົງ ຄະນະປະຈຳ, ປະທານແນວລາວສ້າງຊາດແຂວງ ມີຄະນະປະທານຄະນະກຳມະວັດທະນາທຳ, ສັງຄົມ ແລະ ບັນດາເຜົ່າ, ບັນດາທ່ານຕ່າງໜ້າພະແນກການກ່ຽວຂ້ອງ, ພະນັກງານຂອງທີມງານສະພາແຫ່ງຊາດ ແລະ ສະພາປະຊາຊົນແຂວງເຂົ້າຮ່ວມ.

   ໃນວາລະຂອງກອງປະຊຸມໄດ້ຮັບຟັງການລາຍງານ ຂອງຮອງປະທານຄະນະກຳມະວັດທະນາທຳ, ສັງຄົມ ແລະ ບັນດາເຜົ່າ ໃນການຈັດຕັ້ງປະຕິບັດວຽກງານໃນໄລຍະຜ່ານມາ ໂດຍສະເພາະແມ່ນພາລະບົດບາດຂອງຂອງສະມາຊິກສະພາປະຊາຊົນແຂວງ ເຊິ່ງໄດ້ມີຫຼາຍດ້ານເຮັດໄດ້ດີ ມີຜົນສຳເລັດເປັນ ຕົ້ນແມ່ນການລົງຕິດຕາມກວດກາບັນຫາຄວາມຫຍຸ້ງຍາກຂອງທ້ອງຖິ່ນ, ການແກ້ໄຂຄຳຮ້ອງຂໍຄວາມເປັນທຳຂອງປະຊາຊົນ, ເອົາໃຈໃສ່ກະກຽມເນື້ອໃນ ແລະ ເຂົ້າຮ່ວມກອງປະຊຸມຕ່າງໆເປັນປົກກະຕິ; ຫຼັງຈາກນັ້ນຍັງໄດ້ຮັບຟັງການປະກອບຄຳຄິດເຫັນ ຂອງບັນດາທ່ານຕາງໜ້າພະແນກການທີ່ເຂົ້າຮ່ວມ ກ່ຽວກັບການຈັດຕັ້ງປະຕິບັດໜ້າທີ່ວຽກງານຂອງຕົນໃນໄລຍະຜ່ານມາ ພ້ອມທັງຍົກບັນຫາທີ່ມີຄວາມຫຍຸ້ງຍາກໂດຍສະເພາະວຽກງານຊົນເຜົ່າ, ວຽກງານສາສະໜາ, ວຽກງານພັດທະນາຊົນ ນະບົດ ແລະ ວຽກງານແກ້ໄຂຄວາມທຸກຍາກຂຶ້ນມາເພື່ອແລກປ່ຽນ, ຄົ້ນຄວ້າປຶກສາຫາລືຢ່າງເລິກເຊິ່ງ ເພື່ອຊອກຫາທາງແກ້ໄຂໃຫ້ທ່ວງທັນກັບເວລາ ແລະ ເປັນຂໍ້ມູນໃຫ້ແກ່ສະພາແຫ່ງຊາດ.

ໃນຕອນທ້າຍຄະນະປະທານຍັງໄດ້ມີຄຳເຫັນສັງລວມບັນດາຄຳຄິດເຫັນໃນກອງປະຊຸມ ພ້ອມທັງມີທິດຊີ້ນຳໃນວຽກງານບາງດ້ານທີ່ມີຄວາມຫຍຸ້ງຍາກ ບັນຫາທີ່ກ່ຽວຂ້ອງກັບຂະແໜງການໃດແມ່ນໃຫ້ເອົາໃຈໃສ່ ປະສານງານສົມທົບກັບພາກສ່ວນທີ່ກ່ຽວຂ້ອງ ຄົ້ນຄ້ວາແກ້ໄຂ ແລະ ເກັບກຳສັງລວມ ເພື່ອນຳສະເໜີຕໍ່ຂັ້ນເທິງ.

ສະພາປະຊາຊົນແຂວງຊຽງຂວາງ

ບຸນສີ ສິດທິເດດ

020 99 77 7890