ຕອນເຊົ້າຂອງວັນທີ 26 ສິງຫາ 2023 ຢູ່ທີຫ້ອງປະຊຸມສະພາປະຊາຊົນແຂວງຫລວງນ້ໍາທາ ໄດ້ເປີດກອງປະຊຸມລາຍງານກ່ຽວກັບການຟື້ນຟູ-ປັບປຸງຊີວິດການເປັນຢູ່ຂອງປະຊາຊົນທີໄດ້ຮັບຜົນກະທົບຈາກໂຄງການກໍ່ສ້າງເຂື່ອນໄຟຟ້ານ້ຳທາ1 ເມືອງນາແລ ແຂວງຫລວງນ້ໍາທາ ໂດຍການເປັນປະທານຂອງ ທ່ານ  ຮສ ປອ ລິນຄໍາ ດວງສະຫວັນ ກໍາມະການສໍາຮອງສູນກາງພັກ, ຄະນະປະຈຳສະພາແຫ່ງຊາດ ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ, ໃຫ້ກຽດເຂົ້າຮ່ວມໂດຍ  ທ່ານ ຄຳຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງຫຼວງນໍ້າທາ, ມີບັນດາທ່ານຫົວໜ້າ, ຮອງຫົວຫນ້າບັນດາພະແນກການທີກ່ຽວຂ້ອງຂອງແຂວງ,ຄະນະຮັບຜິດຊອບໂຄງການກໍ່ສ້າງເຂື່ອນໄຟຟ້ານ້ຳທາ 1, ມີຜູ້ເຂົ້າຮ່ວມທັງຫມົດ 27 ທ່ານ, ຍິງ 4 ທ່ານ.

          ໃນກອງປະຊຸມໄດ້ຮັບການລາຍງານຈາກພະແນກພະລັງງານບໍ່ແຮ່, ພະແນກຊັບພະຍາກອນທຳມະຊາດ ແລະ ສີ່ງແວດລ້ອມ,ພະແນກໂຍທາທິການ ແລະ ຂົນສົ່ງ, ພະແນກກະສິກຳ ແລະ ປ່າໄມ້, ພະແນກສຶກສາທິການ ແລະ ກິລາ,ພະແນກອຸດສາຫະກຳ ແລະ ການຄ້າ, ພະແນກສາທາລະນະສຸກ ເປັນຕົ້ນແມ່ນ ສະພາບການຈັດຕັ້ງປະຕິບັດໂຄງການເຂື່ອນໄຟຟ້ານ້ຳທາ 1, ຂໍ້ສະດວກ, ຂໍ້ຫຍຸ້ງຍາກ, ການມີສ່ວນຮ່ວມຂອງແຂວງໃນການຄຸ້ມຄອງ ແລະ ການຈັດຕັ້ງໂຄງການ,ການຈັດຕັ້ງປະຕິບັດ ແກ້ໄຂຜົນກະທົບຕໍ່ສິ່ງແວດລ້ອມສັງຄົມ ແລະ ທຳມະຊາດຈາການພັດທະນາໂຄງການ ຂໍ້ສະດວກ ແລະ ຂໍ້ຫຍຸ້ງຍາກ ແລະ ຈັດສັນຍົກຍ້າຍປະຊາຊົນທີໄດ້ຮັບຜົນກະທົບຈາກໂຄງການ, ການມີສ່ວນຮ່ວມຂອງແຂວງ, ຜູ້ຮັບຜິດຊອບ ແລະ ການຈັດສັນຍົກຍ້າຍ, ການຕິດຕາມກວດກາ ແລະ ປະເມີນການຈັດຕັ້ງປະຕິບັດວຽກງານດັ່ງກ່າວ, ມາດຕະການ ແລະ ວິທີການແກ້ໄຂການຟື້ນຟູຊີວິດການເປັນຢູ່ ແລະ ການພັດທະນາອາຊີບຄົງທີ່ໃຫ້ແກ່ປະຊາຊົນ, ສະພາບລວມຂອງບ້ານທີ່ຖຶກຈັດສັນຍົກຍ້າຍເປັນຕົ້ນແມ່ນ ລະບົບພຶ້ນຖານໂຄງລ່າງ, ເສັ້ນທາງ, ໄຟຟ້າ, ນ້ຳດື່ມ, ນໍ້າໃຊ້, ສຸກສາລາ, ໂຮງຮຽນ ແລະ ສະພາບລວມທາງດ້ານເສດຖະກິດ-ສັງຄົມຂອງປະຊາຊົນ ແລະ ບ້ານທີ່ຖຶກຈັດສັນຍົກຍ້າຍ, ມີຕິດຕາມ, ກວດກາ, ຊຸກຍູ້ ແລະ ປະເມີນຊີວິດການເປັນຢູ່ຂອງປະຊາຊົນທີ່ຖຶກຜົນກະທົບ, ຊີວິດການເປັນຢູ່ຂອງປະຊາຊົນທຽບໃສ່ກ່ອນ, ຂໍ້ສະດວກ ແລະ ຂໍ້ຫຍຸ້ງຍາກກົນໄກ ແລະ ມາດຕະການຄຸ້ມຄອງໃນການຈັດຕັ້ງປະຕິບັດວຽກງານການຄຸ້ມຄອງປ່າໄມ້, ຟຶ້ນຟູປ່າໄມ້ ແລະ ປູກໄມ້ທົດແທນຄືນຂອງໂຄງການດັ່ງກ່າວ

ພ້ອມນັ້ນໄດ້ມີການປະກອບຄຳເຫັນຢ່າງຫລາກຫລາຍໃສ່ຫລາຍບັນຫາທີ່ປິ່ນອ້ອມໂດຍສະເພາະແມ່ນວຽກງານການຟຶ້ນຟູ-ປັບປຸງຊີວິດການເປັນຢູ່ຂອງປະຊາຊົນທີໄດ້ຮັບຜົນກະທົບຈາກໂຄງການດັ່ງກ່າວ ເພື່ອຊອກຫາວິທີແກ້ໄຂທີ່ຖຶກຕ້ອງ ແລະ ເໜາະສົມ.              ຕອນທ້າຍທ່ານປະທານກອງປະຊຸມໄດ້ມີຄຳເຫັນໂອ້ລົມ ແລະ ເນັ້ນໜັກ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕ່ບັນດາພະແນກການອ້ອມຂ້າງແຂວງທີໄດ້ເອົາໃຈໃສ່ປະຕິບັດໜ້າທີ່ວິຊາສະເພາະຂອງຕົນຈົນມີຜົນສຳເລັດຕາມລະດັບຄາດໝາຍ ແລະ ສະແດງຄວາມຊົມເຊີຍທີຜູ້ເຂົ້າຮ່ວມກອງປະຊຸມໄດ້ພ້ອມກັນປະກອບຄໍາເຫັນຢ່າງຫລາກຫລາຍບັນຫາຕໍ່ກັບການພັດທະນາພຶ້ນຖານໂຄງລ່າງຕ່າງໆທີ່ປີ່ນອ້ອມ, ສະໜອງຂໍ້ມູນສະພາບບັນຫາສີ່ງທ້າທາຍຕ່າງໆເຊິ່ງເປັນຂໍ້ມູນສຳຄັນເພື່ອນຳໄປສັງລວມແລ້ວນຳສະເຫນີຕໍ່ຄະນະປະຈຳສະພາແຫ່ງຊາດ ເພື່ອຫາວິທີທາງແກ້ໄຂຕໍ່ບັນຫາຕ່າງໆ,  ພ້ອມທັງເນັ້ນໜັກໃຫ້ບັນດາພະແນກການທີ່ກ່ຽວຂ້ອງຂອງແຂວງສືບຕໍ່ປະສານສົມທົບກັບພາກສ່ວນກ່ຽວຂ້ອງສືບຕໍ່ວຽກງານຟຶ້ນຟູຊີວິດການເປັນຢູ່ຂອງປະຊາຊົນໃຫ້ດີຂຶ້ນກວ່າເກົ່າ, ຮີບຮ້ອນຄົ້ນຄວ້າຊອກຫາການພັດທະນາອາຊີບຄົງທີ່ໃຫ້ປະຊາຊົນ, ຈັດຝືກອົບຮົມສ້າງວິຊາຊີບໃຫ້ຖືກກັບເງື່ອນໄຂຕົວຈິງຂອງແຕ່ລະຂົງເຂດ, ພ້ອມທັງຕິດຕາມກວດກາຄືນການພັດທະນາພຶ້ນຖານໂຄງລ່າງ ເປັນຕົ້ນແມ່ນ ເສັ້ນທາງເຂົ້າບ້ານ, ສືບຕໍ່່ປັບປຸງຄືນ, ເອົາໃຈໃສ່ຄຸ້ມຄອງປົກປັກຮັກສານ້ຳໃຈຟື້ນຟູປ່າໄມ້ໃຫ້ອຸດົມສົມບູນ ເພື່ອຮັກສາແຫລ່ງນ້ຳ, ຮຽກຮ້ອງໃຫ້ສະພາປະຊາຊົນແຂວງຫລວງນໍ້າທາສືບຕໍ່ຕິດຕາມກວດກາບັນດາພະແນກການທີ່ກ່ຽວຂ້ອງຂອງແຂວງຕາມສິດ ແລະ ພາລະບົດບາດຂອງຕົນ, ຮີບຮ້ອນຈັດກອງປະຊຸມກັບບັນດາຂະແໜງການທີ່ກ່ຽວຂ້ອງເພື່ອຊອກຫາວິທີແກ້ໄຂທີ່ຖຶກຕ້ອງ ແລະ ເໜາະສົມໃຫ້ກັບຄອບຄົວທີ່ຖຶກຜົນກະທົບດັ່ງກ່າວ.

ໂອກາດດັ່ງກ່າວທ່ານ  ຮສ ປອ ລິນຄໍາ ດວງສະຫວັນ ກໍາມະການສໍາຮອງສູນກາງພັກ, ຄະນະປະຈຳສະພາແຫ່ງຊາດ ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ພ້ອມດ້ວຍຄະນະ ໄດ້ນຳເອົາຄອມພີວເຕີຕັ້ງໂຕະ ຈຳນວນ 1 ເຄື່ອງ ມູນຄ່າ 4,000,000 ກວ່າກີບມອບໃຫ້ສະພາປະຊາຊົນແຂວງເພື່ອນຳໃຊ້ເຂົ້າໃນວຽກງານຕົວຈິງໃຫ້ເກີດປະໂຫຍດສູງສຸດ.

ໂດຍ ນາງ ອໍາພອນ ສີປະເສີດ