ວັນທີ 27 ກັນຍາ 2024 ທີ່ສະພາປະຊາຊົນແຂວງຄໍາມ່ວນ ໄດ້ຈັດກອງປະຊຸມ ເກັບກຳຂໍ້ມູນເພື່ອສະໝອງໃຫ້ແກ່ການຄົ້ນຄວ້າບົດວິທະຍາສາດ ໂດຍການເປັນປະທານຂອງທ່ານ ບົວພັນ ແສງຈັນ ຮອງປະທານສະພາປະຊາຊົນແຂວງຄໍາມ່ວນ, ເຂົ້າຮ່ວມມີ ທ່ານ ບໍ ຫານປະເສີດ ຫົວໜ້າສູນຄົ້ນຄວ້າວິທະຍາສາດ ແລະ ນິຕິກໍາ ສະຖາບັນຄົ້ນຄວ້ານິຕິກໍາສະພາແຫ່ງຊາດ, ບັນດາປະທານ/ຮອງປະທານຄະນະກໍາມະການ, ຄະນະເລຂາທິການ, ຫົວໜ້າ/ຮອງຫົວໜ້າຂະແໜງ ແລະ ພະນັກງານສະພາປະຊາຊົນແຂວງຄໍາມ່ວນເຂົ້າຮ່ວມ.

       ຈຸດປະສົງ ຂອງການຈັດກອງປະຊຸມໃນຄັ້ງນີ້, ເພື່ອເກັບກໍາຂໍ້ມູນ ແລະ ລະດົມຄໍາຄິດຄໍາເຫັນ ເຂົ້າໃສ່ຫົວຂໍ້, ໂຄງຮ່າງ ຂອງບົດຄົ້ນຄວ້າວິທະຍາສາດ ໃຫ້ມີຄວາມຖືກຕ້ອງ, ສອດຄ່ອງກັບສະພາບການຈັດຕັ້ງປະຕິບັດຕົວຈິງ ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ; ທັງເປັນການສະໜອງຂໍ້ມູນ-ຂ່າວສານ ໃນການຍົກສູງຂີດຄວາມສາມາດ ໃຫ້ແກ່ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ໃນການຈັດຕັ້ງປະຕິບັດວຽກງານໃຫ້ມີປະສິດທິຜົນດີຂຶ້ນກວ່າເກົ່າ.

       ກອງປະຊຸມໄດ້ຮັບ ຟັງຫົວຂໍ້ບົດຄົ້ນຄວ້າວິທະຍາສາດ ປະກອບມີ: ຮ່າງບົດ ການພົວພັນປະສານງານລະຫວ່າງ ສະພາປະຊາຊົນຂັ້ນແຂວງ ກັບບັນດາອົງການປົກຄອງຂັ້ນທ້ອງຖິ່ນ; ຮ່າງບົດ ກົງຈັກທີ່ເປັນເສນາທິການໃຫ້ແກ່ສະພາປະຊາຊົນຂັ້ນແຂວງ ແລະ ຄະນະປະຈໍາສະພາປະຊາຊົນຂັ້ນແຂວງ; ຮ່າງບົດ ຄວາມຮູ້ພື້ນຖານໃນການສ້າງມະຕິຂອງກອງປະຊຸມສະພາແຫ່ງຊາດ ແລະ ຄະນະປະຈໍາສະພາແຫ່ງຊາດ; ຮ່າງບົດ ການຮັບ ແລະ ພິຈາລະນາຄໍາຮ້ອງຂໍຄວາມເປັນທໍາຂອງຄະນະປະຈໍາສະພາແຫ່ງຊາດ ແລະ ຄະນະປະຈໍາສະພາປະຊາຊົນຂັ້ນແຂວງ; ຮ່າງບົດ ຈັນຍາບັນຂອງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ. ຈາກນັ້ນ, ບັນດາທ່ານຜູ້ເຂົ້າຮ່ວມໄດ້ຄົ້ນຄວ້າສຸມສະຕິປັນຍາ ແລະ ປະກອບຄຳຄິດຄຳເຫັນຕໍ່ຮ່າງບົດເນື້ອໃນດັ່ງກ່າວ ຢ່າງມີຈຸດສຸມ, ກົງໄປກົງມາ ແລະ ເປັນຂະບວນຟົດຟື້ນ, ບັນດາຄໍາຄິດຄໍາເຫັນຄັ້ງນີ້ ຈະເປັນຂໍ້ມູນສຳຄັນໃຫ້ແກ່ຄະນະຮັບຜິດຊອບ ນຳໄປຄົ້ນຄວ້າ, ວິເຄາະວິໄຈ ປັບປຸງຮ່າງບົດໂຄງຮ່າງແຕ່ລະສະບັບ ເຮັດໃຫ້ແຕ່ລະຮ່າງບົດ ມີເນື້ອໃນຈະແຈ້ງ, ຄົບຖ້ວນ, ຮັດກຸມ ແລະ ສາມາດຈັດຕັ້ງປະຕິບັດໄດ້ ດ້ວຍຄຸນນະພາບສູງ.

ກອງປະຊຸມໃນເທື່ອນີ້, ເຊິ່ງໄດ້ຮັບການສະໜັບສະໜູນໂດຍ: ມູນລະນິທິເອເຊຍ ( TAF ) ປະຈໍາ ສປປ ລາວ.

ໂດຍ: ເອື້ອ ມະໂນສິງ