ກອງປະຊຸມພົບປະແລກປ່ຽນບົດຮຽນ ລະຫວ່າງ ຄະນະຄຸ້ມຄອງດ່ານສາກົນບໍ່ເຕ່ນ ກັັບ ຄະນະຜູ້ແທນສະພາປະຊາຊົນແຂວງສາລະວັນ ໄດ້ຈັດໃນຂຶ້ນຕອນເຊົ້າຂອງວັນທີ 03 ເມສາ 2024 ທີ່່ຜ່ານມາ ທີ່ດ່ານສາກົນບໍ່ເຕ່ນ ແຂວງຫຼວງນ້ໍາທາ ໂດຍການເປັນປະທານກອງປະຊຸມຂອງທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານຄະນະສະມາຊິກສະພາແຫ່ງຊາດ ເຂດເລືອກຕັ້ງທີ 14 ປະທານສະພາປະຊາຊົນແຂວງສາລະວັນ; ແຂວງຫຼວງນ້ໍາທາ ເຂົ້າຮ່ວມຂອງທ່ານ ນາງ ອຸ່ນຫຼ້າ ອ້ຽງລໍລາດ ກຳມະການພັກແຂວງ ຮອງປະທານສະພາປະຊາຊົນແຂວງຫຼວງນໍ້າທາ, ທ່ານ ພັທ ອໍາໄພ ອິນທະປັນຍາ ຫົວໜ້າຄະນະຄຸ້ມຄອງດ່ານສາກົນບໍ່ເຕ່ນ, ທ່ານ ວິລະກອນ ເກດຕະວົງ ຫົວໜ້າດ່ານພາສີສາກົນບໍ່ເຕ່ນ ພ້ອມດ້ວຍຄະນະຄຸ້ມຄອງດ່ານສາກົນບໍ່ເຕ່ນ; ແຂວງສາລະວັນ ເຂົ້າຮ່ວມຂອງທ່ານ ນາງ ສູນໄຖ ໄຊຍະແສງ ກຳມະການພັກແຂວງ ຮອງປະທານສະພາປະຊາຊົນແຂວງສາລະວັນ, ທ່ານ ສຸລັດ ອິນທະວົງ ຫົວໜ້າດ່ານພາສີສາກົນລະໄລ ເມືອງສະໝ້ວຍ, ທ່ານ ລິດທິພົນ ແດງມະນີຕາ ຮອງຫົວໜ້າດ່ານພາສີສາກົນລະໄລ ເມືອງສະໝ້ວຍ ພ້ອມດ້ວຍສະມາຊິກສະພາປະຊາຊົນແຂວງ ປະຈໍາ 8 ເມືອງ, ຄະນະເລຂາທິການ ແລະ ພະນັກງານ ສະພາປະຊາຊົນ 02 ແຂວງ ເຂົ້າຮ່ວມ;

ທ່ານ ພັທ ອໍາໄພ ອິນທະປັນຍາ ຫົວໜ້າຄະນະຄຸ້ມຄອງດ່ານສາກົນບໍ່ເຕ່ນ ໄດ້ລາຍງານສະພາບໂດຍລວມຈຸດພິເສດການຄຸ້ມຄອງດ່ານສາກົນບໍ່ເຕ່ນ ໂດຍສັງເຂບ ໃຫ້ຮູ້ວ່າ: ດ່ານສາກົນບໍ່ເຕ່ນ ແຫ່ງ ສປປ ລາວ ເປັນດ່ານໜຶ່ງ ຕັ້ງຢູ່ທາງທິດຕາເວັນອອກຂອງແຂວງຫຼວງນໍ້າທາ ເຊິ່ງໜ້າຕິດຈອດກັບດ່ານສາກົນບໍ່ຫານ ແຫ່ງ ສປ ຈີນ, ເປັນດ່ານດິນຕໍ່ແຜ່ນລະຫວ່າງເມືອງຫຼວງນໍ້າທາ ແຂວງຫຼວງນໍ້າທາ ແລະ ເມືອງຫຼ້າກິ່ງ ແຂວງສິບສອງປັນນາ ມົນທົນຢຸນນານ ສປ ຈີນ ມີການເດີນທາງໄປ-ມາ, ທ່ອງທ່ຽວ, ການຄ້າຂາຍ, ຂົນສົ່ງ ແລະ ແລກປ່ຽນດ້ານຕ່າງໆ, ໃນປີ 2023 ທີ່ຜ່ານມາ ມີຄົນເດີນທາງເຂົ້າ-ອອກດ່ານ ຜ່ານດ່ານ ແລະ ດ້ວຍລົດໄຟ ທັງໝົດ 1.200.000 ກວ່າຄົນ; ພາຫະນະໜັກ-ເບົາ ເຂົ້າ-ອອກດ່ານ ເກືອບ 3 ແສນຄັນ; ດ່ານພາສີສາກົນບໍ່ເຕ່ນ ສາມາດເກັບລາຍຮັບໄດ້ 1,243.75 ຕື້ກີບ ທຽບໃສ່ແຜນປີ 944.30 ຕືກີບ ປະຕິບັດເກີນແຜນປີ ເທົ່າກັບ 131,71%; ຈາກນັ້ນ, ຮັບຟັງການລາຍງານ ສະພາບໂດຍລວມການຈັດຕັ້ງປະຕິບັດວຽກງານຂອງພາສີປະຈໍາດ່ານ ຈາກທ່ານຫົວໜ້າດ່ານພາສີສາກົນ ບໍ່ເຕ່ນ; ວາລະຕໍ່ມາ ຕາງໜ້າຄະນະຄຸ້ມຄອງດ່ານ ສອງຝ່າຍ ໄດ້ແລກປ່ຽນ ຂໍ້ສະດວກ, ຂໍ້ຫຍຸ້ງຍາກ ແລະ ວິທີແກ້ໄຂ ຂອງວຽກງານການຄຸ້ມຄອງດ່ານພາສີສາກົນ ໂດຍສະເພາະ ການປັນປະຕິບັດ ດໍາລັດ 558/ລບ ລົງວັນທີ 31 ທັນວາ 2018 ວ່າດ້ວຍ ດ່ານຊາຍແດນ ແລະ ສະໜາມບິນສາກົນ, ການພົວພັນປະສານງານກັບພາກສ່ວນຕ່າງໆ, ການປັບປຸງກົນໄກການຄຸ້ມຄອງ, ໂຄງປະກອບກົງຈັກການຈັດຕັ້ງບຸກຄະລາກອນ, ການປະຕິບັດກົດໝາຍ ທີ່ພົວພັນກັບການຄຸ້ມຄອງດ່ານ, ການປະຕິບັດການຈັດເກັບລາຍຮັບເຂົ້າງົບປະມານ ແລະ ອື່ນໆ;

ຕອນບ່າຍຂອງວັນດຽວກັນ ຄະນະຄຸ້ມຄອງດ່ານສາກົນບໍ່ເຕ່ນ ໄດ້ນຳພາຄະນະຜູ້ແທນ ສະພາປະຊາຊົນແຂວງສາລະວັນ ເດີນທາງໄປທັດສະນະ ແລະ ທ່ຽວຊົມ ສູນວາງສະແດງແຜນຜັງຂອງເຂດເສດຖະກິດພິເສດບໍ່ເຕ່ນແດນງາມ, ຈຸດກວດກາຂາເຂົ້າຂອງລົດບັນທຸກສິນຄ້າ ແລະ ຈຸດກວດກາ ເຂົ້າ-ອອກ ດ່ານສາກົນບໍ່ເຕ່ນ ແລະ ທິວທັດຕຶກອາຄານຕ່າງໆ ທີ່ຢູ່ໃນຈຸດເຂດເສດຖະກິດພິເສດ.

ພາບ-ຂ່າວ: ດີລຳພົນ ພົມມະຈັນ