(ສພຊ) – ຕອນບ່າຍວັນທີ 9 ຕຸລາຜ່ານມາ ທີ່ຫໍປະຊຸມແຫ່ງຊາດ, ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ເປັນປະທານກອງປະຊຸມພົບປະລະຫວ່າງອາຊຽນ ແລະ ຜູ້ຕາງໜ້າຈາກສະມັດຊາລັດຖະສະພາລະຫວ່າງຊາດອາຊຽນ ຫຼືໄອປາ (AIPA) ເຊິ່ງນຳໂດຍທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ໃນນາມປະທານໄອປາ ຄັ້ງທີ 45.

ທີ່ກອງປະຊຸມ, ທ່ານນາຍົກລັດຖະມົນຕີ ສອນໄຊ ສີພັນດອນ ໄດ້ແຈ້ງໃຫ້ຝ່າຍໄອປາຊາບກ່ຽວກັບສະພາບການຂອງອາຊຽນໃນປັດຈຸບັນ ໂດຍສະເພາະຄວາມຄືບໜ້າຂອງການຈັດຕັ້ງປະຕິບັດວິໄສທັດປະຊາຄົມອາຊຽນ 2025 ແລະ ຜົນ ສຳເລັດການຈັດຕັ້ງປະຕິບັດບັນດາຂົງເຂດບຸລິມະສິດການເປັນປະທານອາຊຽນຂອງ ສປປລາວ ພາຍໃຕ້ຄໍາຂວັນ: “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ” ແນໃສ່ເຮັດໃຫ້ພາກພື້ນມີການເຊື່ອມຈອດ ແລະ ມີຄວາມເຂັ້ມແຂງ ເພື່ອນຳໃຊ້ກາລະໂອກາດ ແລະ ຮັບມືກັບສິ່ງທ້າທາຍຕ່າງໆໃນທ່າມກາງສະພາບການຂອງພາກພື້ນ ແລະ ຂອງໂລກ ທີ່ພວມຜັນແປຢ່າງໄວວາ ແລະ ສະຫຼັບຊັບຊ້ອນ; ນອກຈາກນີ້, ທ່ານ ສອນໄຊ ສີພັນດອນ ກໍໄດ້ແຈ້ງໃຫ້ຊາບຄວາມຄືບໜ້າຂອງການສ້າງບັນດາແຜນຍຸດທະສາດ ເພື່ອຜັນຂະຫຍາຍວິໄສທັດປະຊາຄົມອາຊຽນ 2045 ເຊິ່ງເປັນວິໄສທັດທີ່ກໍານົດທິດທາງຂອງອາຊຽນສຳລັບ 20 ປີຕໍ່ໜ້າ ແນໃສ່ສ້າງປະຊາຄົມອາຊຽນທີ່ເຂັ້ມແຂງ, ມີນະວັດຕະກໍາ, ຄ່ອງແຄ້ວ ແລະ ມີປະຊາຊົນເປັນແກນກາງ.

ໃນໂອກາດນີ້, ທ່ານ ປອ. ໄຊສົມພອນ ພົມວິຫານ ກໍໄດ້ແຈ້ງຄວາມຄືບໜ້າຂອງວຽກງານພາຍໃຕ້ຄວາມຮັບ ຜິດຊອບຂອງໄອປາ ໃຫ້ອາຊຽນຊາບ ແລະ ນຳສະເໜີຂໍ້ສະເໜີແນະຂອງໄອປາກ່ຽວກັບການສົ່ງເສີມການຮ່ວມມື ເພື່ອເຮັດໃຫ້ອາຊຽນມີການເຊື່ອມຈອດ ແລະ ເຂັ້ມແຂງຫຼາຍຂຶ້ນ, ຮັດແຄບຄວາມແຕກໂຕນທາງດ້ານການພັດທະນາ, ການພັດທະນາພື້ນ ຖານໂຄງລ່າງ, ແລະ ສົ່ງເສີມການຄ້າ-ການລົງທຶນ ແລະ ການທ່ອງທ່ຽວ ກໍຄືການຮັດແໜ້ນຄວາມເປັນແກນກາງອາຊຽນໃນການຮ່ວມມືກັບພາຍນອກ ເຊິ່ງສອດຄ່ອງກັບບັນດາຂົງເຂດບຸລິມະສິດຂອງອາຊຽນໃນປີ 2024 ທີ່ພວມໄດ້ຮັບການຈັດຕັ້ງປະຕິບັດ.

ພ້ອມນີ້, ບັນດາຜູ້ນຳອາຊຽນ ໄດ້ສະແດງຄວາມຊົມເຊີຍໄອປາຕໍ່ການປະກອບສ່ວນເຂົ້າໃນຂະບວນການສ້າງປະຊາຄົມອາຊຽນ ແລະ ຫວັງວ່າ ໄອປາ ຈະສືບຕໍ່ໃຫ້ການສະໜັບສະໜູນ ແລະ ປະກອບສ່ວນເຂົ້າໃນການສ້າງຄວາມເຂັ້ມແຂງຂອງປະຊາຄົມອາຊຽນ ໂດຍສະເພາະແມ່ນການຈັດຕັ້ງປະຕິບັດວິໄສທັດປະຊາຄົມອາຊຽນ 2025, ບັນດາເອກະສານຜົນຂອງກອງປະຊຸມສຸດຍອດອາຊຽນຄັ້ງນີ້ ກໍຄືຄັ້ງຜ່ານມາ ແລະ ວິໄສທັດປະຊາຄົມອາຊຽນ 2045 ທີ່ຈະຖືກຮັບຮອງເອົາໃນປີ 2025 ໃຫ້ມີປະສິດທິພາບ ແລະ ປະສິດທິຜົນ.