ໃນຕອນບ່າຍຂອງວັນທີ 12 ພະຈິກ 2024 ທີ່ສະພາປະຊາຊົນແຂວງຄໍາມ່ວນ ໄດ້ຈັດກອງປະຊຸມພົບປະຢ້ຽມຢາມຂອງຜູ້ໃຫ້ທຶນແຜນງານ ເຊກາ CEGGA II, ໂດຍການເປັນປະທານຮ່ວມມີທ່ານ ນາງ ສາທິດ ຈັນສີ ຄະນະປະຈຳສະພາປະຊາຊົນຂັ້ນແຂວງ ປະທານຄະນະກຳມະການເສດຖະກິດ, ແຜນການ ແລະ ການເງິນ ສະພາປະຊາຊົນແຂວງຄໍາມ່ວນ ແລະ ທ່ານ ອານເດຣຍ ເກີຣິດ ( Andreas Gerrits ) ຮອງຜູ້ອຳນວຍການ ການຮ່ວມມືຂອງອົງການເພື່ອພັດທະນາ ແລະ ການຮ່ວມມືຂອງສະວິດເຊີແລນ, ເຂົ້າຮ່ວມມີບັນດາທ່ານ ຄະນະປະຈໍາສະພາປະຊາຊົນຂັ້ນແຂວງ, ຄະນະກຳມະການ, ບັນດາທ່ານຕາງໜ້າຈາກໂຄງການ ແລະ ພະນັກງານຊ່ວຍວຽກເຂົ້າຮ່ວມ.
ຈຸດປະສົງຂອງກອງປະຊຸມຄັ້ງນີ້: ກໍ່ເພື່ອພົບປະ, ແລກປ່ຽນ ລະຫວ່າງ ສະພາປະຊາຊົນແຂວງຄໍາມ່ວນ ແລະ ຜູ້ສະໜັບສະໜູນບັນດາກິດຈະກຳ ແຜນງານການມີສ່ວນຮ່ວມຂອງປະຊາຊົນຕໍ່ວຽກງານການປົກຄອງທີ່ດີ ແລະ ການສ້າງລັດທີ່ປົກຄອງດ້ວຍກົດໝາຍ (CEGGA II ), ແລະ ເພື່ອລາຍງານການຈັດຕັ້ງປະຕິບັດບັນດາແຜນກິດຈະກຳຂອງແຜນງານເຊກາ ປີ 2024. ພ້ອມດຽວກັນນີ້, ຜູ້ເຂົ້າຮ່ວມກອງປະຊຸມຍັງໄດ້ສົນທະນາ-ແລກປ່ຽນຄຳຄິດຄຳເຫັນກ່ຽວກັບການຈັດຕັ້ງປະຕິບັດວຽກງານຜ່ານມາ, ຂອດປະສານງານລະຫວ່າງຂັ້ນສູນກາງ ແລະ ຂັ້ນແຂວງ ເພື່ອຮັບປະກັນການຈັດຕັ້ງປະຕິບັດແຜນງານເຊກາ ໃຫ້ມີຄວາມສະດວກ ແລະ ວ່ອງໄວ.
ໃນວາລະກອງປະຊຸມ ທ່ານ ນາງ ສາທິດ ຈັນສີ ປະທານຄະນະກຳມະການເສດຖະກິດ, ແຜນການ ແລະ ການເງິນ ສະພາປະຊາຊົນແຂວງຄໍາມ່ວນ ໄດ້ກ່າວຕ້ອນຮັບ ແລະ ຕີລາລາສູງຕໍ່ກອງປະຊຸມຮ່ວມໃນຄັ້ງນີ້, ເຊິ່ງແມ່ນໄດ້ຈະຮັບໝາກຜົນຫລາຍໃນການເຄື່ອນໄຫວຈັດຕັ້ງປະຕິບັດວຽກງານຂອງສະພາປະຊາຊົນຂັ້ນແຂວງ ແລະ ອົງການຈັດຕັ້ງສັງຄົມໃນການເພີ່ມທະວີການຮ່ວມມືຂອດການປະສານງານຂອງລະຫວ່າງ ສະພາປະຊາຊົນແຂວງຂັ້ນ ແລະ ອົງການຈັດຕັ້ງສັງຄົມ ໃຫ້ມີຜົນສຳເລັດ.
ກອງປະຊຸມໄດ້ຮັບການສະໜັບສະໜູນໂດຍ: ຈາກແຜນງານການມີສ່ວນຮ່ວມຂອງປະຊາຊົນ ຕໍ່ວຽກງານການປົກຄອງທີ່ດີ ແລະ ການສ້າງລັດ ທີ່ປົກຄອງດ້ວຍກົດໝາຍ (ແຜນງານເຊກາ – CEGGA II ).
ໂດຍ: ເອື້ອ ມະໂນສິງ