ໃນວັນທີ 24 ພຶດສະພາ 2022 ນີ້ ທີ່ຫ້ອງປະຊຸມສະພາປະຊາຊົນແຂວງວຽງຈັນ ໄດ້ເປີດກອງປະຊຸມຝຶກອົບຮົມ ແນະນໍາດ້ານຫຼັກການ ເຕັກນິກການສ້າງ-ຮ່າງເອກະສານທາງລັດຖະການ ໃຫ້ແກ່ພະນັກງານ-ລັດຖະກອນ ພາຍໃນສະພາປະຊາຊົນແຂວງວຽງຈັນ ຂຶ້ນ, ໂດຍການເປັນປະ ທານ ຂອງທ່ານ ຄໍາຫຼ້າ ສີສຸວົງ ຄະນະປະຈໍາ, ເລຂາທິການສະພາປະຊາຊົນແຂວງວຽງຈັນ, ເຂົ້າຮ່ວມມີ ທ່ານ ຮອງເລຂາທິການສະພາປະຊາຊົນແຂວງ, ວິທະຍາກອນທີ່ມາຈາກພະແນກພາຍໃນແຂວງ, ບັນດາທ່ານຫົວໜ້າຂະແໜງ-ຮອງຂະແໜງ ຕະຫຼອດຮອດພະນັກງານ-ລັດຖະກອນ ພາຍໃນສະພາປະຊາຊົນແຂວງເຂົ້າຮ່ວມຢ່າງພ້ອມພຽງ.

ຈຸດປະສົງ ກໍ່ເພື່ອສ້າງຄວາມເຂັ້ມແຂງໃຫ້ແກ່ພະນັກງານ-ລັດຖະກອນ ພາຍໃນສະພາປະຊາ ຊົນແຂວງ ເປັນຕົ້ນແມ່ນ: ການຝຶກຫຼັກການ ເຕັກນິກການສ້າງ-ຮ່າງເອກະສານທາງລັດຖະການ ເພື່ອຮັບປະກັນການເປັນເສນາທິການທີ່ມີຄວາມຮູ້-ຄວາມສາມາດ ໃຫ້ແກ່ສະມາຊິກສະພາປະຊາຊົນແຂວງ ພ້ອມທັງເປັນການຍົກລະດັບ ຄວາມຮູ້ຄວາມສາມາດຂອງຕົນໃຫ້ມີຄຸນນະພາບ ແລະ ສໍາເລັດຕາມລະດັບຄາດໝາຍໃນແຕ່ລະໄລຍະ, ກອງປະຊຸມຄັ້ງນີ້ວິທະຍາກອນໄດ້ສະເໜີກ່ຽວກັບຄໍາແນະນໍາກ່ຽວກັບການຈັດຕັ້ງປະຕິບັດກົດໝາຍວ່າດ້ວຍເອກະສານ, ຮູບຮ່າງເອກະສານທາງລັດຖະການ,ການນໍາໃຊ້ຂະໜາດຕົວອັກສອນ ແລະ ອື່ນໆ ທີ່ຕິດພັນກັບການຮ່າງເອກະສານເພື່ອໃຫ້ພະນັກງານ-ລັດຖະກອນທີ່ເຂົ້າຮ່ວມຝຶກອົບຮົມໄດ້ຮຽນຮູ້ ແລະ ສ້າງຄວາມເຂົ້າໃຈເພື່ອໄປຈັດຕັ້ງປະຕິບັດເຂົ້າໃນວຽກງານຕົວຈິງ, ດ້ວຍບັນຍາກາດຟົດຟື້ນ ບັນດາທ່ານວິທະຍາກອນ ໄດ້ຖ່າຍທອດຄວາມຮູ້, ວິທີການ, ຮູບແບບ ການສົນທະນາ, ແລກປ່ຽນບົດຮຽນ ຄຽງຄູ່ກັບການຝຶກປະຕິບັດຕົວຈິງ, ສຸມໃສ່ ປະກອບຄໍາຄິດ-ຄໍາເຫັນ ເພື່ອຈະໄດ້ນໍາເອົາບົດຮຽນດັ່ງກ່າວໄປໜູນໃຊ້ເຂົ້າໃນວຽກງານຕົວຈິງ ພ້ອມທັງເປັນການປັບປຸງແບບແຜນວິທີເຮັດວຽກໃຫ້ມີຄຸນນະພາບດີຂຶ້ນໄປເລື້ອຍໆ.