ເພື່ອສ້າງຄວາມເຂັ້ມແຂງວຽກງານຕິດຕາມກວດກາ ເປັນພາລະບົດບາດໜຶ່ງທີ່ສໍາຄັນ ຂອງສະພາປະຊາຊົນຂັ້ນແຂວງ ໃນການຕິດຕາມກວດກາຈັດຕັ້ງປະຕິບັດລັດຖະທໍາມະນູນ, ກົດໝາຍ ແລະ ແຜນພັດທະນາເສດຖະກິດ – ສັງຄົມ, ແຜນງົບປະມານແຫ່ງລັດຂອງແຂວງ ຂອງອົງການບໍລິຫານລັດຂັ້ນແຂວງ ຮັບປະກັນໃຫ້ການຄຸ້ມຄອງການບໍລິຫານລັດຂັ້ນແຂວງ ໄດ້ຮັບການຈັດຕັ້ງປະຕິບັດ ຕາມກົດໝາຍ ແລະ ນິຕິກໍາທີ່ກ່ຽວຂ້ອງໄດ້ກໍານົດ ເຮັດໃຫ້ການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍມີຄວາມເຂັ້ມງວດຂຶ້ນເທື່ອລະກ້າວ. ໃນລະຫວ່າງວັນທີ 13 -14 ທັນວາ 2024 ທີ່ເມືອງບົວລະພາ ແຂວງຄໍາມ່ວນ ສະພາປະຊາຊົນແຂວງຄໍາມ່ວນ ໄດ້ຈັດກອງປະຊຸມຝຶກອົບຮົມສ້າງຄວາມເຂັ້ມແຂງໃນວຽກງານຕິດຕາມກວດກາ ໃຫ້ແກ່ສະມາຊິກສະພາປະຊາຊົນຂັ້ນແຂວງ ແລະເສນາທິການຊ່ວຍວຽກສະພາປະຊາຊົນຂັ້ນແຂວງ ໂດຍການເປັນປະທານຂອງ ບຸນມີ ພິມມະສອນ ຮອງເລຂາພັກແຂວງ ປະທານສະພາປະຊາຊົນແຂວງຄໍາມ່ວນ, ເຂົ້າຮ່ວມມີ ຮອງປະທານສະພາປະຊາຊົນຂັ້ນແຂວງ, ເຈົ້າເມືອງບົວລະພາ, ບັນດາທ່ານຄະນະປະຈໍາສະພາປະຊາຊົນຂັ້ນແຂວງ, ຄະນະປະຈຳພັກເມືອງບົວລະພາ, ສະມາຊິກສະພາປະຊາຊົນຂັ້ນແຂວງປະຈໍາເຂດເລືອກຕັ້ງ 10 ຕົວເມືອງ, ນັກວິທະຍາກອນຈາກສະພາແຫ່ງຊາດ ແລະ ພະນັກງານເສນາທິການຊ່ວຍວຽກ ຂອງສະພາປະຊາຊົນແຂວງຄໍາມ່ວນ ເຊິ່ງມີຜູ້ເຂົ້າຮ່ວມທັງໝົດ 80 ທ່ານ, ຍິງ 25 ທ່ານ.

ໃນກອງປະຊຸມ, ໄດ້ຮັບຟັງການນຳ ສະເໜີກ່ຽວກັບຫົວຂໍ້ບົດຮຽນສຳຄັນເປັນຕົ້ນ: ຂັ້ນຕອນ ແລະ ວິທີການໃນການຕິດຕາມກວດກາແຜນງົບປະມານແຫ່ງລັດ; ຂັ້ນຕອນ ແລະວິທີການໃນການຕິດຕາມກວດກາ ການສ້າງແຜນການລົງທຶນຂອງລັດ, ການຈັດຕັ້ງປະຕິບັດ ແລະການປະເມີນໂຄງການລົງທຶນຂອງລັດ: ສະເໜີໂດຍ ທ່ານ ປອ. ສາຍທອງ ພົມມະວົງ ຫົວໜ້າກົມແຜນການ ແລະ ການລົງທຶນ ສະພາແຫ່ງຊາດ ແລະຮັບຟັງໃນຫົວຂໍ້: ການຕິດຕາມກວດກາວຽກງານກວດສອບ-ກວດກາ; ການພິຈາລະນາຮັບຮອງວຽກງານກວດສອບ-ກວດກາສະເໜີໂດຍ: ທ່ານ ລີວື່ ເນັ່ງທົ່ງ ຮອງຫົວໜ້າກົມການເງິນ,​ ການທະນາຄານ ແລະ ການກວດສອບ ສະພາແຫ່ງຊາດ, ຈາກນັ້ນ, ບັນດາທ່ານຜູ້ແທນ ແລະ ຜູ້ເຂົ້າຮ່ວມກອງປະຊຸມໄດ້ຈັດແບ່ງກຸ່ມ ເພື່ອຄົ້ນຄວ້າສົນທະນາແລກປ່ຽນ, ປະກອບຄໍາເຫັນ ແລະ ແຕ່ລະກຸ່ມໄດ້ຝຶກຫັດຮ່າງເອກະສານກ່ຽວກັບວຽກງານຕິດຕາມກວດກາ, ໄດ້ພ້ອມກັນຍົກສູງຄວາມຮັບຜິດຊອບໂດຍສຸມໃສ່ການຕັ້ງຄໍາຖາມສົນທະນາແລກປ່ຽນໃນແຕ່ລະຫົວຂໍ້ ອັນໄດ້ເຮັດໃຫ້ເຂົ້າສູ່ລວງເລິກ ແລະ ມີໝາກຜົນຫຼາຍຂຶ້ນ.

ຕອນທ້າຍຂອງກອງປະຊຸມ ທ່ານ ບຸນມີ ພິມມະສອນ ປະທານສະພາປະຊາຊົນແຂວງຄໍາມ່ວນ ໄດ້ສະແດງຄວາມຍ້ອງຍໍຊົມເຊີຍຜູ້ເຂົ້າຮ່ວມ ທີ່ພ້ອມກັນຄົ້ນຄວ້າປະກອບຄຳຄິດ ຄຳເຫັນຢ່າງສ້າງສັນເພື່ອນຳເອົາບົດຮຽນທີ່ໄດ້ຮັບຄັ້ງນີ້ ໄປໝູນໃຊ້ເຂົ້າໃນການປະຕິບັດວຽກງານຕົວຈິງ ໃນການຈັດຕັ້ງປະຕິບັດ ສາມພາລະບົດບາດຕົ້ນຕໍຂອງຂອງສະພາປະຊາຊົນຂັ້ນແຂວງ ທີ່ກົດໝາຍກຳນົດໄວ້ຄື: ດ້ານນິຕິກຳ, ດ້ານຕົກລົງບັນຫາສຳຄັນພຶ້ນຖານຂອງແຂວງ ແລະ ດ້ານຕິດຕາມກວດກາ; ເພື່ອໃຫ້ວຽກງານດັ່ງກ່າວມີປະສິດທິພາບ ແລະ ປະສິດທິຜົນດີ ຂຶ້ນກວ່າເກົ່າ. ພ້ອມນັ້ນ, ທ່ານ ຍັງຍົກໃຫ້ເຫັນການຈັດກອງປະຊຸມໃນເທື່ອນີ້ ແມ່ນເປັນບາດກ້າວທີ່ສຳຄັນ ໃນການສ້າງຄວາມເຂັ້ມແຂງໃຫ້ແກ່ສະມາຊິກສະພາປະຊາຊົນຂັ້ນແຂວງ, ສາມາດນຳໄປໝູນໃຊ້ ໃນວຽກງານຕາມພາລະບົດບາດຕົວຈິງຂອງແຕ່ລະທ້ອງຖິ່ນຂອງຕົນໃນການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍ ໃຫ້ມີຄວາມສັກສິດສູງຂຶ້ນ, ສັງຄົມມີຄວາມສະຫງົບ, ປະຊາທິປະໄຕ, ຍຸຕິທຳ ແລະ ສີວິໄລ.

ການຝຶກອົບຮົມຄັ້ງນີ້ ໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກໂຄງການມູນນິທິເວສມິນສະເຕີ (WFD).

ໂດຍ: ເອື້ອ ມະໂນສິງ