ກອງປະຊຸມຝຶກອົບຮົມວຽກງານຄຸ້ມຄອງແຜນ ການລົງທຶນຂອງລັດ ຂອງສະພາແຫ່ງຊາດ ໄດ້ຈັດຂຶ້ນໃນຕອນເຊົ້າຂອງວັນ 20 ທັນວາ 2024 ຢູ່ທີ່ຫ້ອງປະຊຸມຊັ້ນ 3 ຫ້ອງວ່າການແຂວງອຸດົມໄຊ, ໂດຍການເປັນປະທານຂອງທ່ານ ນາງ ອໍາໄພວອນ ລ້ອມບຸນແພງ ກໍາມະການສໍາຮອງສູນກາງພັກ, ເລຂາທິການ ສະພາແຫ່ງຊາດ, ເຂົ້າຮ່ວມມີທ່ານ ຄໍາດີ ວົງລ້ອມ ປະທານສະພາປະຊາຊົນແຂວງ, ປະທານ-ຮອງປະທານ, ສະມາຊິກສະພາແຫ່ງ, ສະມາຊິກສະພາປະຊາຊົນແຂວງ 8 ແຂວງພາກເໜືອ ແລະ 1 ແຂວງພາກກາງ, ຄະນະຮັບຜິດຊອບຈາກສະພາແຫ່ງຊາດ ແລະ ຄະນະເລຂາທິການ, ພະນັກງານຂະແໜງກ່ຽວຂ້ອງ.

ກອງປະຊຸມໄດ້ຮັບຟັງ ວິທະຍາກອນຈາກ ກົມແຜນການ ກະຊວງແຜນການ ແລະ ການລົງທຶນ ສະເໜີກ່ຽວກັບ ຂັ້ນຕອນການວາງແຜນການລົງທຶນຂອງລັດ; ເຜີຍແຜ່ຄໍາແນະນໍາກ່ຽວກັບການຈັດຕັ້ງປະຕິບັດກົດໝາຍການລົງທຶນຂອງລັດ, ສະບັບເລກທີ 0889/ກຜທ; ວິທີຄົ້ນຄວ້າຈັດສັນງົບປະມານລົງທຶນຂອງລັດ ໃຫ້ກະຊວງ, ອົງການ; ກົນໄກ-ວິທີການຄຸ້ມຄອງການລົງທຶນຂອງລັດ, ຕິດຕາມກວດກາ, ຢັ້ງຢືນເອກະສານຊໍາລະໂຄງການ, ຄົ້ນຄວ້າການດັດແກ້ມູນຄ່າໂຄງການ, ອວ່າຍທຶນ, ໂຈະ ແລະ ຍົກເລີກໂຄງການລົງທຶນຂອງລັດ, ຮູບແບບການລົງທຶນຮ່ວມລະຫວ່າງພາກລັດ ແລະ ເອກະຊົນ.

 

ຫລັງຈາກນັ້ນ ຜູ້ແທນເຂົ້າຮ່ວມກອງປະຊຸມໄດ້ມີຄໍາຄິດຄໍາເຫັນ, ສະເໜີແລກປ່ຽນບົດຮຽນເຊິ່ງກັນ ແລະ ກັນ ຢ່າງກົງໄປກົງມາ. ປະຕິບັດຕາມວາລະ, ກອງປະຊຸມຍັງຈະໄດ້ສືບຕໍ່ຮັບຟັງການສະເໜີບັນດາເອກະສານທີ່ກ່ຽວຂ້ອງ ແລະ ຈະດໍາເນີນກອງປະຊຸມຈົນເຖິງວັນທີ 21 ທັນວາ 2024 ຈຶ່ງຈະສໍາເລັດ.