ໃນວັນທີ 3 ກໍລະກົດ 2024 ຢູ່ທີ່ຫ້ອງປະຊຸມສະພາປະຊາຊົນແຂວງໄດ້ເປີດກອງປະຊຸມຝຶກອົບຮົມການນໍາໃຊ້ລະບົບເຄືອຂ່າຍພາຍໃນຂອງສະພາແຫ່ງຊາດ ໃຫ້ພະນັກງານສະພາປະຊາຊົນແຂວງຊຽງຂວາງ ໂດຍການເປັນປະທານຂອງທ່ານ ນາງ ສາຍພູເງິນ ອຸດົມສຸກ ເລຂາທິການສະພາປະຊາຊົນແຂວງ, ມີບັນດາທ່ານປະທານ–ຮອງປະທານຄະນະກໍາມະການ, ຄະນະເລຂາທິການ, ບັນ​ດາ​ທ່ານ​ຫົວໜ້າ-ຮອງຫົວໜ້າຂະແໜງ ແລະ ພະນັກງານ-ລັດຖະກອນ ສະພາປະຊາຊົນແຂວງ ເຂົ້າຮ່ວມ.

ເພື່ອເປັນການຍົກຂີດຄວາມສາມາດໃຫ້ແກ່ພະນັກງານສະພາປະຊາຊົນແຂວງ ໃນການນໍາໃຊ້ລະບົບເຄືອຂ່າຍພາຍໃນຂອງສະພາແຫ່ງຊາດ ແລະ ເປັນການແນະນໍາວິທີນໍາໃຊ້ລະບົບເຄືອຂ່າຍພາຍໃນ ໃຫ້ແກ່ພະນັກງານ-ລັດຖະກອນສະພາປະຊາຊົນແຂວງ ໄດ້ຮັບຮູ້, ເຂົ້າໃຈໃນການນໍາໃຊ້ລະບົບເຄື່ອຂ່າຍພາຍໃນຂອງສະພາແຫ່ງຊາດ ເພື່ອສະດວກໃນການຊອກຫາຂໍ້ມູນຕ່າງໆຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ເຂົ້າໃນການຈັດຕັ້ງປະຕິບັດວຽກງານຂອງຕົນ. ກອງປະຊຸມໄດ້ຮັບຟັງການສະເໜີວິທີການສະໝັກການນຳໃຊ້ລະບົບເຄືອຂ່າຍພາຍໃນສະພາແຫ່ງຊາດ, ການເຂົ້າເຖິງ ແລະ ຊອກຫາເອກະສານ ແລະ ນິຕິກຳຂອງສະພາແຫ່ງຊາດ, ສະພາປະຊາຊົນຂັ້ນແຂວງ ແລະ ບັນດາອົງການລັດ ໃນລະບົບເຄືອຂ່າຍພາຍໃນ. ພ້ອມດຽວກັນນີ້, ຜູ້ເຂົ້າຮ່ວມກໍໄດ້ແລກປ່ຽນຖາມ-ຕອບຢ່າງກົງໄປກົງມາ ທັງໄດ້ລົງທະບຽນສະໝັກເຂົ້ານຳໃຊ້ເຄືອຂ່າຍດັ່ງກ່າວ ແລະ ທົດລອງນຳໃຊ້ຕົວຈິງໃນການເຂົ້າລະບົບ ແລະ ຊອກຄົ້ນບັນດາເອກະສານທີ່ຕ້ອງການ ສາມາດເຂົ້າໃຈຢ່າງຈະແຈ້ງ ແລະ ນຳໃຊ້ໄດ້ຢ່າງຄ່ອງຕົວ ຮັບປະກັນໃນການຄົ້ນຄວ້າ ແລະ ສະໜອງຂໍ້ມູນໃຫ້ມີຄວາມວ່ອງໄວ ແລະ ໄດ້ຮັບຂໍ້ມູນຖືກຕ້ອງ ໃຫ້ແກ່ ສສຊ ແລະ ສສຂ.

ໃນຕອນທ້າຍ ທ່ານນາງ ສາຍພູເງິນ ອຸດົມສຸກ ເລຂາທິການສະພາປະຊາຊົນແຂວງ ໄດ້ຍ້ອງຍໍຊົມເຊີຍຕໍ່ກັບຄະນະຮັບຜິດຊອບກອງປະຊຸມທີ່ໄດ້ກະກຽມບັນດາເນື້ອໃນຕ່າງໆ ແລະ ທ່ານໄດ້ຮຽກຮ້ອງມາຍັງ ພະນັກງານ-ລັດຖະກອນທັງໝົດຈົ່ງພ້ອມກັນນຳເອົາ ເນື້ອໃນຫົວຂໍ້ທີ່ຝຶກອົມຮົມໃນຄັ້ງນີ້ ໄປຜັນຂະຫຍາຍເຂົ້າໃນວຽກງານຂອງຕົນ ແລະ ສາມາດນຳໃຊ້ເຂົ້າໃນໜ້າທີ່ວຽກງານໃຫ້ມີຜົນສໍາເລັດເປັນຢ່າງດີ.

ສະພາປະຊາຊົນແຂວງຊຽງຂວາງ

ຂ່າວໂດຍ: ນາງ ສຸກສະຫວັນ ອິນທະແສງ