ໃນວັນທີ 4 ຕຸລາ 2024 ທີ່ຫ້ອງປະຊຸມສະພາປະຊາຊົນແຂວງ ໄດ້ຈັດກອງປະຊຸມຮ່ວມລະຫວ່າງ ຄະນະປະຈໍາສະພາປະຊາຊົນແຂວງ ກັບ ຄະນະຮັບຜິດຊອບ ແລະ ພາກສ່ວນກ່ຽວຂ້ອງຂັ້ນແຂວງ ເພື່ອປຶກສາຫາລື ກ່ຽວກັບຮ່າງນິຕິກໍາໃຕ້ກົດໝາຍ ຂອງອົງການປົກຄອງແຂວງ 2 ສະບັບ ຄື: ຮ່າງຂໍ້ຕົກລົງແຂວງທ່ານເຈົ້າແຂວງວ່າດ້ວຍແຜນຜັງຕົວເມືອງໃນຊົນນະບົດ, ຂໍ້ຕົກລົງວ່າດ້ວຍການອະນຸມັດສ້າງຕັ້ງກົງຈັກອົງການພັດທະນາ ແລະ ບໍລິຫານຕົວເມືອງ ໂດຍການເປັນປະທານຮ່ວມຂອງ ທ່ານ ທອງສີ ເສົມສຸລິພົມ ຮອງເລຂາພັກແຂວງ, ປະທານຄະນະປະຈໍາສະພາປະຊາຊົນແຂວງ ແລະ ທ່ານ ວີສອນ ລາວເມົາ ຮອງເຈົ້າແຂວງຜົ້ງສາລີ, ເຂົ້າຮ່ວມມີ ບັນດາທ່ານຄະນະປະຈໍາສະພາປະຊາຊົນແຂວງ, ບັນດາພະແນກ, ອົງການທີ່ກ່ຽວຂ້ອງຂັ້ນແຂວງ ກໍຄືຄະນະຮັບຜິດຊອບສ້າງຮ່າງຂໍ້ຕົກລົງ, ມີບັນດາທ່ານຈາກຄະນະກໍາມະການຍຸຕິທໍາ ແລະ ປກຊ-ປກສ, ຄະນະກໍາມະການເສດຖະກິດ ແຜນການ ແລະ ການເງິນ ສະພາປະຊາຊົນແຂວງ ເຂົ້າຮ່ວມ

ໃນກອງປະຊຸມໄດ້ຮັບຟັງ ຕາງໜ້າຄະນະປະຈໍາສະພາປະຊາຊົນແຂວງ ລາຍງານຜົນການຄົ້ນຄວ້າ 2 ນິຕິກໍາດັ່ງກ່າວ; ຮັບຟັງ ຕາງໜ້າຄະນະຮັບຜິດຊອບຂັ້ນແຂວງ ຊີ້ແຈງ ແລະ ຢັ້ງຢືນ ເຫດຜົນ ແລະ ຄວາມຈໍາເປັນ ໃນການສ້າງນິຕິກໍາ ຈາກນັ້ນ, ຜູ້ເຂົ້າຮ່ວມກອງປະຊຸມ ກໍໄດ້ປະກອບຄໍາຄິດຄໍາເຫັນ ຕາມຄໍາເຈາະຈິ້ມຂອງປະທານກອງປະຊຸມ, ທັງນີ້ ກໍເພື່ອປຶກສາຫາລື ແລະ ສ້າງຄວາມເປັນເອກະພາບ ກ່ຽວກັບຫົວຂໍ້, ໂຄງຮ່າງ, ເນື້ອໃນ, ຂັ້ນຕອນໃນການສ້າງ ເພື່ອຮັບປະກັນໃຫ້ສາມາດນໍາເຂົ້າກອງປະຊຸມສະພາປະຊາຊົນແຂວງ ຄົ້ນຄວ້າ, ພິຈາລະນາ ແລະ ຮັບຮອງເອົາ

ພາບ-ຂ່າວ: ສູນທອງ