ໃນວັນທີ 29 ມິຖຸນາ 2023 ທີ່ສະພາປະຊາຊົນແຂວງຄໍາມ່ວນ ໄດ້ເປີດກອງປະຊຸມປຶກສາຫາລືກ່ຽວກັບຄວາມຄືບໜ້າ ແລະ ການກະກຽມຄວາມພ້ອມ ຂອງການສ້າງຮ່າງນິຕິກຳ ທີ່ຈະນຳເຂົ້າພິຈາລະນາຮັບຮອງໃນ ກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງຄໍາມ່ວນ ຊຸດທີ II ໂດຍການເປັນປະທານຂອງ ທ່ານ ບົວພັນ ແສງຈັນ  ກໍາມະການພັກແຂວງ, ຮອງປະທານສະພາປະຊາຊົນແຂວງຄໍາມ່ວນ ທັງເປັນຫົວຫນ້າຄະນະຮັບຜິດຊອບກວດກາ, ສ້າງ ແລະ ປັບປຸງນິຕິກຳ, ເຂົ້າຮ່ວມມີ ຄະນະກໍາມະການ, ພະແນກການທີ່ກ່ຽວຂ້ອງ, ຄະນະເລຂາທິການ, ຫ້ອງວ່າການແຂວງ ແລະ ກອງເລຂາຊ່ວຍວຽກເຂົ້າຮ່ວມ. ຮ່າງນິຕິກຳທີ່ນຳເຂົ້າທາບທາມໃນກອງປະຊຸມຄັ້ງນີ້ ມີຈຳນວນ 5 ສະບັບຄື: ຮ່າງຂໍ້ຕົກລົງ ວ່າດ້ວຍການຄຸ້ມຄອງເຂດສະຫງວນທາງຫຼວງ ແຂວງຄໍາມ່ວນ, ຮ່າງຂໍ້ຕົກລົງ ວ່າດ້ວຍແຜນຈັດສັນທີ່ດິນ, ຄຸ້ມຄອງຊັບພະຍາກອນທຳມະຊາດ ແລະ ສິ່ງແວດລ້ອມ ເມືອງຄູນຄໍາ ແຂວງຄໍາມ່ວນ, ຮ່າງຂໍ້ຕົກລົງວ່າດ້ວຍ ການຄຸ້ມຄອງພະນັກງານ-ລັດຖະກອນຄູ, ຜູ້ບໍລິຫານການສຶກສາ ແລະ ກິລາ, ນັກຮຽນ, ນັກສຶກສາ, ຮ່າງຂໍ້ຕົກລົງ ວ່າດ້ວຍການຄຸ້ມຄອງແຮງງານພາຍໃນ ແລະ ຕ່າງປະເທດ ຢູ່ແຂວງຄໍາມ່ວນ ແລະ ຮ່າງຂໍ້ຕົກລົງ ວ່າດ້ວຍການຢັ້ນຢືນຄວາມຖືກຕ້ອງທາງດ້ານກົດໝາຍ ຂອງສັນຍາ ແລະ ເອກະສານຕ່າງໆ.

    ທ່ານ ບົວພັນ ແສງຈັນ ກຳມະການພັກແຂວງ ຮອງປະທານສະພາປະຊາຊົນແຂວງຄໍາມ່ວນ

  ເຊິ່ງໃນກອງປະຊຸມບັນດາທ່ານຜູ້ແທນ ແລະ ທ່ານທີ່ເຂົ້າຮ່ວມກອງປະຊຸມກໍ່ໄດ້ພ້ອມກັນລະດົມແນວຄິດ, ຄົ້ນຄວ້າປຶກສາຫາລື ແລະ ແລກປ່ຽນຄໍາຄິດເຫັນຕໍ່ກັບຮ່າງຂໍ້ຕົກລົງດັ່ງກ່າວໃຫ້ມີຄວາມຄົບຖ້ວນສົມບູນ, ແທດເໝາະ, ສອດຄ່ອງຕາມພາລະບົດບາດ, ສິດ ແລະ ໜ້າທີ ຕາມກົດໝາຍກຳນົດໄວ້, ສອດຄ່ອງກັບສະພາບຕົວຈິງ ແລະ ຮັບປະກັນເນື້ອໃນກຽມຄວາມພ້ອມກ່ອນນໍາເອົາຮ່າງນິຕິກຳເຂົ້າພິຈາລະນາ ແລະ ຮັບຮອງໃນກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນແຂວງຄໍາມ່ວນ ຊຸດທີ II.

ໃນຕອນທ້າຍກອງປະຊຸມ ທ່ານ ບົວພັນ ແສງຈັນ ໄດ້ສະແດງຄວາມຍ້ອງຍໍຊົມເຊີຍ ແລະພ້ອມທັງຕີລາສູງຕໍ່ກອງປະຊຸມໃນຄັ້ງນີ້ ແລະ ທ່ານ ຍັງຮຽກຮ້ອງໃຫ້ ຄະນະຮັບຜິດຊອບກວດກາ, ສ້າງ ແລະ ປັບປຸງນິຕິກຳສະພາປະຊາຊົນແຂວງຄໍາມ່ວນ ກັບພະແນກການການທີ່ກ່ຽວຂ້ອງ ໃຫ້ເອົາໃຈໃສ່, ຍົກສູງຄວາມຮັບຜິດຊອບໃນການປັບປຸງ ຮ່າງນິຕິກຳຈໍານວນ 5 ສະບັບໃຫ້ມີເນື້ອໃນຄົບຖ້ວນ, ຖືກຕ້ອງ ແລະ ສອດຄ່ອງກັບລະບຽບການກົດໝາຍທີ່ໄດ້ກຳນົດໄວ້ ແລະ ທີ່ຈະນຳເຂົ້າພິຈາລະນາ, ຮັບຮອງເອົາໃນກອງປະຊຸມສະໄໝາສາມັນເທື່ອທີ 5 ຂອງສະພາປະຊາຊົນແຂວງຄໍາມ່ວນ ຊຸດທີ II ທີ່ຈະໄດ້ໄຂຂຶ້ນໃນບໍ່ດົນຕໍ່ໜ້ານີ້.

ໂດຍ: ເອື້ອ ມະໂນສິງ